កណ្ដាល ៖ បុរសវ័យជាង៥០ឆ្នាំម្នាក់ ដែលក្រុមគ្រួសារអះអាងថា ស្រវឹងខួបស្ទើររាល់ថ្ងៃ បានដើរចេញពីផ្ទះបាត់១យប់១ថ្ងៃ ដោយមានការសង្ស័យក្រុមគ្រួសារបាននាំគ្នាដើររក ក៏ប្រទះឃើញក្រមានិងខោអាវរបស់ជនរងគ្រោះនៅក្បែរស្រះ ពេលក្រឡេកមើលទៅក្នុងស្រះទឹក ទើបឃើញសពអណ្ដែតទឹកស្លាប់បាត់ទៅហើយ មិនជាលង់ពីពេលណាទេ តែត្រូវបានប្រទះឃើញ កាលពីវេលាម៉ោង៨និង៣០នាទីព្រឹក ថ្ងៃទី២ ខែមីនា ឆ្នាំ២០១៩ នៅក្នុងស្រះទឹកខាងក្រោយ ភូមិព្រៃសំរោង ឃុំទួលព្រេជន ស្រុកអង្គស្នួល។
សពជនរងគ្រោះមាន ឈ្មោះ ឆឹម ឆន ភេទប្រុស អាយុ៥៤ឆ្នាំ ជនជាតិខ្មែរ មុខរបរកសិករ ស្ថិតនៅភូមិព្រៃសំរោង ឃុំទួលព្រេជ ស្រុកអង្គស្នួល ខេត្តកណ្តាល។
តាមប្រភពព័ត៌មានពីកក្រុមគ្រួសារបានឲ្យដឹងថា ជនរងគ្រោះជាមនុស្សញៀនស្រា ផឹកស្រវឹងស្ទើររាល់ថ្ងៃ។
កាលពីថ្ងៃទី១មិនា ជនរងគ្រោះ បានដើរចេញបាត់ពីផ្ទះរហូត មិនដឹងទៅណាមកណាទេ ពោលគឺបានបាត់ខ្លួនអស់រយៈពេល១យប់មួយថ្ងៃ ពេលនោះដោយមានការសង្ស័យអ្នកភូមិ និងក្រុមគ្រួសារបាននាំគ្នាដើររកមើល ព្រោះខ្លាចក្រែងជនរងគ្រោះលង់ទឹក នៅពេលទៅមាត់ស្រះ ក៏បានឃើញក្រមា និងខោអាវជនរងគ្រោះ សង្ស័យគាត់ចុះងូតទឹក នៅពេលដើរមើលជុំវិញស្រះទឹក ក៏ប្រទះឃើញសព ជនរងគ្រោះអណ្ដែតទឹកស្រះបាត់ទៅហើយ។
ក្រោយពេលឃើញបែបនេះ បាននាំគ្នាប្រាប់ទៅសមត្ថកិច្ចមូលដ្ឋាន ទើបហៅជំនាញកោសល្យវិច័យនៅអធិការដ្ឋាននគរបាលស្រុកនាំគ្នាចូលមកពិនិត្យឃើញថា សព មិនមានស្នាមរបួសស្នាមអីទេ ហើយក្រុមគ្រួសារសព ក៏មិនប្ដឹងផ្ដល់អ្វីដែរ ដោយបានយកសពទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments