ភ្នំពេញ ៖ សិក្ខាសាលា ស្តីពី “ការធ្វើទំនើបភាវូបនីយកម្មផ្នែករដ្ឋបាល នៃ ប.ស.ស” បានបិទបញ្ចប់ហើយ កាលពីរសៀលថ្ងៃទី០១ ខែមីនា ឆ្នាំ២០១៩ នៅសណ្ឋាគារសាន់វ៉េ ក្រោមអធិបតីភាព លោក អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជានាយកបេឡាជាតិរបបសន្តិសុខសង្គម (ប.ស.ស) នៃក្រសួងការងារ និងបណ្ដុះបណ្ដាលវិជ្ជាជីវៈ ដោយមានការចូលរួមពីសំណាក់ថ្នាក់ដឹកនាំ នៃ ប.ស.ស និងតំណាង នៃអង្គការអន្តរជាតិខាងការងារ (ILO) សរុបប្រមាណជាង៣០នាក់។
លោក អ៊ុក សមវិទ្យា បានវាយតម្លៃខ្ពស់ថា វគ្គសិក្ខាសាលានេះ គឺពិតជាមានសារៈសំខាន់បំផុតចំពោះគម្រោង នៃការរៀបចំរចនាសម្ព័ន្ធ នៃផែនការយុទ្ធសាស្ត្រ ក្នុងការធ្វើទំនើបកម្ម នៃប្រតិបត្តិការ និងការគ្រប់គ្រង ដែលជា “គម្រោង នៃការធ្វើទំនើបភាវូបនីយកម្មផ្នែករដ្ឋបាល នៃ ប.ស.ស”។
លោកប្រតិភូរាជរដ្ឋាភិបាល បានថ្លែងទៀតថា ៖ ដូច្នេះ ឆ្លងកាត់វគ្គសិក្ខាសាលា ដោយមានការចូលរួមពីសំណាក់ថ្នាក់ដឹកនាំ នៃ ប.ស.ស និងតំណាង នៃអង្គការអន្តរជាតិខាងការងារ (ILO) ដែលមានជំនាញពោរពេញទៅដោយបទពិសោធន៍ដ៏ច្រើននាពេលកន្លងមក ឯកឧត្ដមមានមោទនភាពយ៉ាងខ្លាំងចំពោះលទ្ធផលដែលកើតចេញពីសិក្ខាសាលាដ៏ល្អមួយនេះ ព្រោះថាវាប្រាកដណាស់ នឹងធ្វើឲ្យប្រសើរឡើងចំពោះការអនុវត្តការងារនាពេលបច្ចុប្បន្ន ដើម្បីឈានដល់ការទទួលស្គាល់នៅក្នុងតំបន់ និងជាសកលនាពេលអនាគត។
គួរបញ្ជាក់ផងដែរថា វគ្គសិក្ខាសាលានេះ ប្រព្រឹត្តទៅមានរយៈពេលចំនួន២ថ្ងៃ គឺចាប់ពីថ្ងៃទី២៨ ខែកុម្ភៈ ឆ្នាំ២០១៩ រហូតដល់ថ្ងៃទី១ ខែមីនា ឆ្នាំ២០១៩ ដោយមានការរៀបចំពីអង្គការអន្តរជាតិខាងការងារ (ILO) ក្រោមគម្រោងមូលនិធិរបស់រដ្ឋាភិបាលប្រទេសចិន និងនាយកដ្ឋានសេដ្ឋកិច្ច និងសង្គមកិច្ច នៃអង្គការសហប្រជាជាតិ៕
Source: Kampuchea Thmey Daily
0 Comments