ស្ត្រី​ជប៉ុន​អាយុ ១១៦ ឆ្នាំ​ត្រូវបាន​ទទួលស្គាល់​ដោយ​ហ្គី​ណេ​ស​ជា​ស្ត្រី​ចាស់​បំផុត​លើ​ពិភពលោក

ស្ត្រី​ជនជាតិ​ជប៉ុន​អាយុ ១១៦ ឆ្នាំ​ម្នាក់​ដែល​ចូលចិត្ត​លេងល្បែង​អុក​ឈ្មោះ Othello ត្រូវបាន​ទទួលស្គាល់​កាលពី​ថ្ងៃ​សៅរ៍​ជា​មនុស្ស​ដែល​ចាស់​ជាងគេ​នៅលើ​ពិភពលោក​ដោយ​កំណត់ត្រា​ពិភពលោក Guinness World Records។

អាជ្ញាធរ​កំណត់ត្រា​ពិភពលោក​បានទទួល​ស្គាល់​ជា​ផ្លូវការ​លោកយាយ Kane Tanaka នៅក្នុង​ពិធី​មួយ​នៅឯ​មណ្ឌល​ថែទាំ​មនុស្ស​ចាស់​ដែល​លោកយាយ​រស់នៅក្នុង​ទីក្រុង Fukuoka ភាគ​និរតី​ប្រទេស​ជប៉ុន ។ គ្រួសារ និង​ចៅហ្វាយក្រុង​របស់លោក​យាយ​ក៏មាន​វត្តមាន​ដើម្បី​អបអរសាទរ​ផងដែរ។

លោកយាយ Tanaka កើត​ថ្ងៃទី ២ ខែមករា ឆ្នាំ ១៩០៣ ជា​កូន​ទី​ប្រាំពីរ​ក្នុងចំណោម​កូន​ប្រាំ​បីនាក់ ។ លោកយាយ​បាន​រៀបការ​ជាមួយ​លោកតា Hideo Tanaka នៅ​ឆ្នាំ ១៩២២ ហើយ​ពួកគេ​មានកូន​បួន​នាក់ និង​បាន​យក​កូនចិញ្ចឹម​ម្នាក់ទៀត​ផងដែរ។

លោកយាយ​តែងតែ​ភ្ញាក់​នៅ​ម៉ោង ៦ ព្រឹក ហើយ​ចូលចិត្ត​សិក្សា​គណិតវិទ្យា ។​
មនុស្ស​ដែលមាន​វ័យ​ចំណាស់​ជាងគេ​កាលពីមុន​គឺ​ស្ត្រី​ជនជាតិ​ជប៉ុន​ម្នាក់​ឈ្មោះ Chiyo Miyako ដែល​បាន​ស្លាប់​កាលពី​ខែកក្កដា​នៅ​អាយុ ១១៧ ឆ្នាំ។

ជប៉ុន​មាន​និន្នាការ​បង្ហាញ​ពី​អាយុ​វែង និង​គ្របដណ្តប់​បញ្ជី​មនុស្ស​ចាស់​បំផុត ។ ទោះបីជា​ការផ្លាស់ប្តូ​រទ​ម្លា​ប់​នៃ​របប​អាហារ​មានន័យថា​ការ​ធាត់​បាន​កើនឡើង​ក៏​វា​នៅតែ​ជា​រឿង​កម្រ​ក្នុងប្រទេស​មួយ​ដែល​ប្រពៃណី​ធ្វើ​ម្ហូបអាហារ​ផ្តោតលើ​ត្រី អង្ករ បន្លែ និង​អាហារ​ដែលមាន​ជាតិ​ខ្លាញ់​ទាប។

អាយុ​ក៏ត្រូវ​បាន​គោរព​តាម​ប្រពៃណី​នៅទីនេះ​ផងដែរ មានន័យថា​ប្រជាជន​នៅមាន​សកម្មភាព និង​មាន​អារម្មណ៍​ថា​មាន​ប្រយោជន៍​នៅក្នុង​អាយុ ៨០ ឆ្នាំ​របស់​ពួកគេ។

ប៉ុន្តែ​លោកយាយ Tanaka មាន​មធ្យោបាយ​ឆ្ពោះទៅ​មុខមុន​ពេលដែល​គាត់​ជា​មនុស្ស​ចាស់​ជាងគេ​បំផុត​ក្រោយពី​ស្ត្រី​ជនជាតិ​បារាំង​ម្នាក់​ឈ្មោះ Jeanne Louise Calment ដែលមាន​អាយុ ១២២ ឆ្នាំ ។ នេះ​បើ​យោងតាម​កំណត់ត្រា​ពិភពលោក Guinness World Records។
កំណត់ត្រា​ពិភពលោក Guinness បាន​និយាយថា បុរស​ចំណាស់​ជាងគេ​នៅលើ​ពិភពលោក​កំពុង​ស្ថិតនៅក្រោម​ការស៊ើបអង្កេត បន្ទាប់ពី​បុរស​ដែល​ត្រូវ​បានទទួល​ស្គាល់ឈ្មោះ Masazo Nonaka រស់​នៅលើ​កោះ Hokkaido ភាគ​ខាងជើង​ប្រទេស​ជប៉ុន​បាន​ស្លាប់​នៅក្នុង​ខែមករា នៅ​អាយុ ១១៣ ឆ្នាំ៕ AP

​

Source: Kampuchea Thmey Daily