ការជឿទុកចិត្តពីសប្បុរសជន និងការគិតគូរពីថ្នាក់ដឹកនាំគ្រប់ជាន់ថ្នាក់ ធ្វើឲ្យសាខាកាកបាទក្រហមកម្ពុជាខេត្តបន្ទាយមានជ័យ ឆ្លើយតបបានទាន់ពេលលើការងារមនុស្សធម៌

បន្ទាយមានជ័យ ៖ លោក លី សារី អភិបាលរងខេត្តបន្ទាយមានជ័យ និងជាប្រធានគណៈកម្មាធិការសាខាកាកបាទក្រហមខេត្តបន្ទាយមានជ័យ សូមអំពាវនាវ និងសង្ឃឹមថាឆ្នាំ២០១៩ សប្បុរសជនក្នុងនិងក្រៅខេត្ត នឹងបន្តការជឿទុកចិត្តចូលរួមជាទ្រព្យធនដល់សាខាកាកបាទក្រហមខេត្តនាឧកាសប្រារព្ធទិវាពិភពលោក កាកបាទក្រហម អឌ្ឍចន្ទក្រហម៨ឧសភា២០១៩នាពេលខាងមុខ ដើម្បីបានយកទៅទ្រទ្រង់ បានបន្តឆ្លើយតបបានទាន់ពេលក្នុងកិច្ចការមនុស្សធម៌ដល់ប្រជាពលរដ្ឋ ដែលរងគ្រោះដោយគ្រោះធម្មជាតិ អគ្គិភ័យ ឬគ្រោះមហន្តរាយផ្សេងៗ ជាពិសេសពលរដ្ឋដែលមានជីវភាពលំបាក។

ការលើកឡើងយ៉ាងដូចនេះ កាលពីថ្ងៃទី៨ ខែមីនា ឆ្នាំ២០១៩ នៅនឹងសាខាកាកបាទក្រហមកម្ពុជាសាខាខេត្តបន្ទាយមានជ័យ ក្នុងការផ្តល់បទសម្ភាសន៍ដល់អ្នកសារព័ត៌មានស្ដីពីសកម្មភាពមួយឆ្នាំ២០១៨ និងការងារបន្តឆ្នាំ២០១៩ របស់សាខាកាកបាទក្រហមកម្ពុជាខេត្តបន្ទាយមានជ័យ។

លោកបានបន្តឲ្យដឹងទៀតថា ដោយតែងតែទទួលការណែនាំ និងការដាក់ទិសដៅពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន លើវិស័យទាំង៤ ដល់សាខាកាកបាទក្រហមទាំង២៥រាជធានីខេត្ត ជាពិសេសការឆ្លើយតប ឲ្យទាន់ពេលវេលាដល់ជនរងគ្រោះ និងងាយរងគ្រោះ នៅឆ្នាំ២០១៨ សាខាកាកបាទក្រហមខេត្តបន្ទាយមានជ័យ ដោយមានការគាំទ្រពី ឯកឧត្ដមឧបនាយករដ្ឋមន្ត្រី កែ គឹមយ៉ាន និង ជាប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ ឯកឧត្ដម សួន បវរ អភិបាល នៃគណៈអភិបាលខេត្តបន្ទាយមានជ័យ និងជាប្រធានកិត្តិយសសាខា និងក្រោមការដឹកនាំគ្រប់គ្រងពីលោកផ្ទាល់ ព្រមទាំងសមាជិកសមាជិកា គណៈកម្មាធិការសាខាទាំងអស់ បានយកចិត្តទុកដាក់រួបរួមគ្នា ប្រកបដោយស្មារតីសាមគ្គីភាព និងមនសិការ ទទួលខុសត្រូវ និងបានលះបង់ទាំងពេលវេលា ធនធានផ្ទាល់ខ្លួន ក្នុងការជំរុញសកម្មភាពសាខាដំណើរការបោះជំហាន ឈានឡើងក្នុងទិសដៅឆ្ពោះទៅសម្រេចតាមទស្សនវិស័យរួមរបស់កាកបាទក្រហមកម្ពុជា ដែលបានបំពេញភារកិច្ច តាមវិស័យស្នូលទាំង៤រួមមាន ៖ វិស័យគ្រប់គ្រងគ្រោះមហន្តរាយ វិស័យសុខភាព និងការថែទាំសុខភាពក្នុងសហគមន៍ វិស័យលើកកម្ពស់គោលការណ៍គ្រឹះ និងតម្លៃមនុស្សធម៌ និង វិស័យអភិវឌ្ឍន៍ស្ថាប័ន និងអភិវឌ្ឍន៍ធនធានមនុស្ស។

ក្នុងឆ្នាំ២០១៨សាខាកាកបាទក្រហមកម្ពុជាខេត្តបន្ទាយមានជ័យ បានផ្តល់អំណោយមនុស្សធម៌ជូនជនរងគ្រោះ មហន្តរាយ និងងាយរងគ្រោះបំផុតសរុប៨៦៤គ្រួសារ ក្នុងនោះចំនួនពីរគ្រួសារទទួលពីថ្នាក់កណ្តាល ចំនួន៧៧១គ្រួសារ ទទួលបានពីសាខា និង៩១គ្រួសារ ទទួលបានពីអនុសាខា។

ប្រជាពលរដ្ឋទទួលផលពីការឆ្លើយតបនីមួយៗរួមមាន គ្រួសារក្រីក្រ ទុរគតជនជំងឺរ៉ាំរ៉ៃ ជនពិការ លង់ទឹកស្លាប់ ឧបហេតុផ្សេងៗទាំង៩ស្រុក/ក្រុង សរុប៥០០គ្រួសារ។ ប្រជាពលរដ្ឋរងគ្រោះដោយខ្យល់កន្ត្រាក់ទាំ៩ស្រុក/ក្រុង សរុប៣២០គ្រួសារ។ ប្រជាពលរដ្ឋរងគ្រោះដោយសារភ្លើងឆេះផ្ទះទាំង៩ស្រុកក្រុង២៥គ្រួសារ។ ប្រជាពលរដ្ឋរងគ្រោះដោយសាររន្ទះបាញ់នៅ៦ស្រុក សរុប១០គ្រួសារ។
ប្រជាពលរដ្ឋរងគ្រោះដោយសារជំនន់ទឹកភ្លៀង នៅស្រុកអូរជ្រៅ៦គ្រួសារ។ ប្រជាពលរដ្ឋរងគ្រោះដោយសារផ្ទុះមីន៣គ្រួសារ។

ក្រៅពីការងារផ្តល់អំណោយមនុស្សធម៌ជូនជនរងគ្រោះ និងងាយរងគ្រោះខាងលើ សាខាកាកបាទក្រហមកម្ពុជា ខេត្តបន្ទាយមានជ័យ ក៏បានសកម្មយ៉ាងខ្លាំងថែមទៀត លើវិស័យបីទៀត គឺវិស័យសុខភាព និងការថែទាំសុខភាព ក្នុងសហគមន៍ វិស័យលើកកម្ពស់គោលការណ៍គ្រឹះ និងតម្លៃមនុស្សធម៌ និង វិស័យអភិវឌ្ឍន៍ស្ថាប័ន និងអភិវឌ្ឍន៍ធនធានមនុស្ស តាមរយៈការលើកកម្ពស់សុវត្ថិភាពចរាចរណ៍ផ្លូវគោក ការលើកកម្ពស់សុខភាពមាតា ទារក និងកុមារ ការពារជំងឺឆ្លងក្នុងសហគមន៍ ....។ល។

ជាមួយគ្នានោះ លោកក៏បាន ប្ដេជ្ញាចិត្តថា ធ្វើយ៉ាងណាឲ្យមានតម្លាភាព និងគណនេយ្យភាព ដោយមិនប៉ះពាល់ នូវសម្ភារៈ និងថវិកាដែល សប្បុរសជន ផ្តល់ជូនឡើយ គឺធ្វើយ៉ាងណាឲ្យដល់ដៃពលរដ្ឋ ៕