កំហឹង​ផ្ទុះឡើង​នៅ​ពេល​អ្នក​ទម្លាយ​ការសម្ងាត់​ ត្រូវបាន​បាញ់សម្លាប់​ក្នុងប្រទេស​ប៉ា​គី​ស្ថាន

សកម្មជន​សិទ្ធិនារី​កាលពី​ថ្ងៃ​សុក្រ​ បាន​ថ្កោលទោស​ការសម្លាប់​អ្នក​ទម្លាយ​ការសម្ងាត់​ម្នាក់​នៅក្នុង​ករណី “​ការសម្លាប់​ដើម្បី​កិត្តិយស​” ដ៏​ល្បីល្បាញ​ដែល​បាន​បំភ្លឺ​ពី​ការយកចិត្តទុកដាក់​អស់​រយៈពេល​ជាច្រើន​ឆ្នាំ​មកហើយ​ទៅលើ​ជនរងគ្រោះ​ជា​ស្ត្រី​និង​បុរស​ដែល​ការពារ​ពួកគេ។

ប៉ូលិស​បាន​និយាយថា លោក Afzal Kohistani ដែលជា​បុរស​ដំបូង​ដែល​បាន​ទាក់ទាញ​ការយកចិត្តទុកដាក់​ចំពោះ​ឧប្បត្តិហេតុ​ដ៏​អាក្រក់​កាលពី​ឆ្នាំ​២០១២​ត្រូវបាន​គេ​បាញ់សម្លាប់​នៅ​ទីក្រុង Abbottabad កាលពី​ថ្ងៃ​ពុធ។

គាត់​បាន​តាមដាន​រឿងក្តី​មួយ​ដែល​ក្នុងនោះ បព្វជិត​ម្នាក់​បាន​បញ្ជា​ឲ្យ​មានការ​សម្លាប់​ភ្ញៀវ​អាពាហ៍ពិពាហ៍​ប្រុស​និង​ស្រី​ដែល​បានបង្ហាញ​ពី​ការរីករាយ​ក្នុង​វីដេអូ​មួយ។

ព័ត៌មាន​លម្អិត​ច្បាស់លាស់​នៅតែ​ត្រូវបាន​លាក់ទុក​ក្នុង​ភាពអាថ៌កំបាំង​ប៉ុន្តែ​លោក Kohistani បានបញ្ជាក់​ជា​យូរ​មកហើយ​ថា ស្ត្រី​នៅក្នុង​វីដេអូ​នោះ​ត្រូវបាន​គេ​ធ្វើឃាត។

លោក Abdul Aziz Afridi មន្ត្រីប៉ូលិស​ជាន់ខ្ពស់​ម្នាក់​បាន​ប្រាប់ AFP ថា គាត់​ត្រូវបាន​គេ​បាញ់​ប្រាំ​គ្រាប់​នៅលើ​ផ្លូវ​ដ៏​មមាញឹក​មួយ​ហើយ​បាន​ស្លាប់​នៅនឹងកន្លែង។

ក្រុមមន្ត្រី​បាន​និយាយ​កាលពី​ថ្ងៃ​សុក្រ​ថា មនុស្ស​យ៉ាងតិច​ពីរ​នាក់​ត្រូវបាន​ចាប់ខ្លួន​។​
​លោក Shaukat Yousafzai រដ្ឋមន្ត្រី​ព័ត៌មាន​ខេត្ត​បាន​ប្រាប់ AFP ថា “​ជនល្មើស​នៃ​ឧក្រិដ្ឋកម្ម​ដ៏​សាហាវព្រៃផ្សៃ​នេះ​នឹងត្រូវ​នាំយកទៅ​កាត់ទោស”។

ឃាតកម្ម​របស់លោក Kohistani បាន​បង្ក​ឲ្យ​មាន​កំហឹង​នៅក្នុង​ប្រទេស​ប៉ា​គី​ស្ថាន​ដែលជា​កន្លែង​ក្រុម​សកម្មជន​សិទ្ធិមនុស្ស​បាន​ប្រយុទ្ធប្រឆាំង​ជា​យូរ​មកហើយ​លើ​ការសម្លាប់​ដើម្បី​កិត្តិយស​ដែល​ប្រកាន់យក​ជាទូទៅ​នៅ​ទូទាំង​តំបន់​អាស៊ី​ខាងត្បូង​មួយ​នេះ។

ស្ត្រី​ត្រូវបាន​បាញ់សម្លាប់ ចាក់​នឹង​កាំបិត គប់​ដុំថ្ម ដុត​និង​ចងក​ដោយសារ​ការនាំ “​ភាពអាម៉ាស់​” មក​ឲ្យ​ក្រុមគ្រួសារ​របស់​ពួកគេ​ដូចជា​ការបដិសេធ​សំណើ​រៀបការ​ឬ​រៀបការ​ជាមួយ​បុរស​ខុស​និង​ជួយ​មិត្តភក្តិ​ឲ្យ​លួចរ​ត់ទៅ​រៀបការ។

បុរស​ក៏​អាចជា​ជនរងគ្រោះ​ផងដែរ​បើទោះបីជា​វា​កម្រ​មាន​ក៏ដោយ។ សកម្មជន​សិទ្ធិមនុស្ស​ដែល​ចូលរួម​ក្នុង​ការ​ហែក្បួន​មួយ​ដើម្បី​ប្រារព្ធ​ទិវា​នារី​អន្តរជាតិ​កាលពី​ថ្ងៃ​សុក្រ​បាន​ថ្កោលទោស​ការបាញ់ប្រហារ​លើ​លោក Kohistani៕ AFP

​

Source: Kampuchea Thmey Daily