ជម្លោះប្តីប្រពន្ធ ដែលរស់នៅជាមួយគ្នា២ឆ្នាំ ចុងក្រោយបញ្ចប់ត្រឹមធុងទឹកកក៣

ភ្នំពេញ ៖ ចំណងស្នេហ៍រវាងបុរសពោះម៉ាយ និង ស្ត្រីមេម៉ាយកូនពីរ ក្រោយពីចាស់ទុំផ្សំផ្គុំ ឈានដល់ការរស់នៅជាមួយគ្នាបានជាង២ឆ្នាំរួចមក ចំណងស្នេហ៍បានរលាយទៅវិញដោយភាពរកាំរកូសមិនចេះចប់មិនចេះហើយ និងបានឈ្លោះប្រកែកគ្នាញឹកញាប់ ហើយរស់នៅដោយឡែកពីគ្នាមួយរយៈពេលខ្លី តែខាងប្រុស ជូរមាត់ ទ្រាំមិនបាន ក៏លបលួចនាំស្រីថ្មីមកដេកស្នាក់នៅ ទើបដំណឹងនេះលេចឮដល់ភាគីប្រពន្ធដែលលែងលះគ្នាមិនទាន់ដាច់ផង ធ្វើឲ្យនាងខឹងច្រឡោត ចាប់កំហុសសុំលែងលះគ្នាតែម្ដង កុំឲ្យសៅហ្មងតទៅទៀត.

ករណីនេះបានកើតឡើងកាលពីព្រឹក ថ្ងៃទី០៥ ខែមីនា ឆ្នាំ២០១៩ នៅមុខរោងចក្រក្នុងភូមិអង្គកែវ សង្កាត់ចោមចៅ៣ ខណ្ឌពោធិ៍សែនជ័យ។

តាមសម្ដីភាគីខាងប្រពន្ធបានឲ្យដឹងថា គាត់ជាស្ត្រីមេម៉ាយកូន២នាក់ (ប្រុសម្នាក់ស្រីម្នាក់) បានយកគ្នាជាប្តីប្រពន្ធអស់រយៈពេលជាង២ឆ្នាំ ដោយរស់នៅជាមួយគ្នា មិនបានចុះសំបុត្រអាពាហ៍ពិពាហ៍ទេ តែបានរៀបការទទួលដឹងឮពីមេបាចាស់ទុំទាំងសងខាង និងឈានដល់បានកូនមួយ តែបានស្លាប់ទៅវិញ។

ភាគីខាងប្តីមាន ឈ្មោះ សឿន សាន អាយុ៤២ឆ្នាំ មុខរបរលក់ដូរមុខរោងចក្រ ស្នាក់នៅផ្ទះជួលក្នុងភូមិព្រៃស្វាយ សង្កាត់ចោមចៅ៣ មានទីលំនៅភូមិ ឈូកវ៉ា សង្កាត់ គោករកា ខណ្ឌព្រែកព្នៅ។

ចំណែកភាគីខាងប្រពន្ធ ឈ្មោះ ភឹម ស៊ីហ៊ាង អាយុ៤០ឆ្នាំ មុខរបរចុងភៅ រោងចក្រ ស្នាក់នៅផ្ទះជួល ភូមិព្រៃព្រីងជើង សង្កាត់ចោមចៅ៣ ខណ្ឌពោធិ៍សែនជ័យ មានស្រុកកំណើត ភូមិអំពិល ឃុំបឹងដោល ស្រុកព្រះស្តេច ខេត្តព្រៃវែង។

ក្រោយពីរស់នៅក្នុងជីវិតជាប្តីប្រពន្ធ ជាមួយបុរសនេះ អស់រយៈពេលជាង២ឆ្នាំ រហូតមកដល់ដើមឆ្នាំ២០១៩នេះ ក្នុងគ្រួសារ ឈានទៅរកភាពរង្គោះរង្គើ បែកបាក់ស្នេហា ដោយសារការរស់នៅមិនចុះសម្រុងគ្នា ហើយក៏ធ្លាប់មានការប្តឹងផ្ដល់គ្នា ទៅដល់អាជ្ញាធរសង្កាត់ចោមចៅ៣ម្តងមកហើយ។

រហូតមកដល់ព្រឹកថ្ងៃទី០៥ ខែមីនា ឆ្នាំ២០១៩នេះ ក្រោយពីលេចឮថាខាងប្តី ខណៈដែលលែងលះគ្នា មិនទាន់ដាច់ស្រេចផង មានស្រីថ្មីម្នាក់ទៀត នាំយកមកដេកស្នាក់នៅជាមួយគ្នាបាន៥ថ្ងៃមកហើយ ទើបខាងប្រពន្ធ បានដឹងហើយទៅយកសម្ភារៈសេសសល់ នូវធុងទឹកកកចំនួន៣មកវិញព្រោះជារបស់ខ្លួនទិញ ឯខាងប្តីបានឡូឡា រារាំងមិនអនុញ្ញាតឲ្យទេ ក៏ទាស់សម្ដីគ្នាផ្អើលទាំងព្រឹក
រហូតដល់កម្លាំងអាជ្ញាធរ សមត្ថកិច្ចចុះទៅប្រមូលលើកធុងទាំង៣ មកសាលាសង្កាត់ ធ្វើការសម្របសម្រួល ទីបំផុតទើបភាគីខាងប្តីប្រគល់ធុងទាំង៣នោះ ឲ្យទៅខាងប្រពន្ធ ជាថ្នូរនឹងនាំយកស្រីថ្មី មកជំនួស។

ភាគីខាងប្តីវិញ បានលើកឡើងថា លុយកាក់ របស់របរ ចែកគ្នារួចរាល់ម្ដងមកហើយ ចុះហេតុអ្វីមកយកធុង៣នេះទៀត? តែទោះជាយ៉ាងណាក្តី ខាងស្រីបានលើកឡើងដែរថា ធុងទាំង៣នេះ ជាលុយរបស់ខ្លួនទិញ ទើបមកយកទៅវិញបែបនេះ។ ជម្លោះរឿងស្នេហាប្ដីប្រពន្ធ១គូនេះ វាហាក់ផុយស្រួយណាស់ ព្រោះចុងក្រោយបញ្ចប់ត្រឹមធុងទឹកកក៣ បានទៅលើខាងស្រីជាប្រពន្ធ រួចដើរចាកចេញពីគ្នារៀងៗខ្លួន៕