មេដឹកនាំបក្សប្រឆាំងវេណេហ្ស៊ូអេឡាលោក Juan Guaido បានទទួលការស្វាគមន៍ពីអ្នកគាំទ្ររាប់ពាន់នាក់ខណៈដែលលោកបានវិលត្រឡប់មកទីក្រុង Caracas វិញកាលពីថ្ងៃចន្ទដោយផ្គើនទៅនឹងការគំរាមកំហែងនៃការចាប់ខ្លួនពីរដ្ឋាភិបាលរបស់លោកប្រធានាធិបតីNicolas Maduro។
លោក Guaido ដែលត្រូវបានទទួលស្គាល់ជាប្រធានាធិបតីស្តីទីពីបណ្តាប្រទេសជាង៥០បានប្រាប់ហ្វូងមនុស្សថា “យើងដឹងពីហានិភ័យដែលយើងប្រឈមមុខហើយវាមិនដែលរារាំងយើងបានទេ។ របបផ្តាច់ការត្រូវតែយល់ យើងមានកម្លាំងខ្លាំងជាងមុនមក។ តោះបន្តតាមដងផ្លូវ”។
ក្រុមអ្នកគាំទ្រ អ្នកសារព័ត៌មាននិងអ្នកការទូតមកពីបណ្តាប្រទេសជាសម្ព័ន្ធមិត្តបានចោមរោមលោក Guaido នៅពេលគាត់មកដល់អាកាសយានដ្ឋានអន្តរជាតិក្នុងទីក្រុង Caracas មុនពេលគាត់បានចូលទៅក្នុងទីក្រុងនេះដើម្បីប្រមូលផ្តុំការគាំទ្រពីអ្នកគាំទ្ររាប់ពាន់នាក់។
នៅទីនោះ លោក Guaido បានប្រកាសអំពីក្បួនតវ៉ាថ្មីមួយនៅថ្ងៃសៅរ៍ដើម្បីបង្កើនសម្ពាធលើលោក Maduro។ លោកបាននិយាយថា “ប្រជាជនវេណេហ្ស៊ូអេឡាទាំងអស់នឹងត្រឡប់មកតាមដងផ្លូវវិញ។ យើងនឹងមិនសម្រាកសូម្បីមួយវិនាទីរហូតទាល់តែមានសេរីភាពពេញលេញ”។
មុនពេលគាត់មកដល់ អនុប្រធានាធិបតីសហរដ្ឋអាមេរិកលោក Mike Pence បានផ្ញើសារព្រមានមួយទៅលោក Maduro ដើម្បីធានាសុវត្ថិភាពរបស់លោក Guaido ហើយក្រោយមករដ្ឋមន្ដ្រីការបរទេសលោក Mike Pompeo បានសាទរចំពោះការវិលត្រឡប់របស់គាត់ដោយសុវត្ថិភាព។
លោក Pence បានសរសេរនៅលើ Twitter ថា “ការគំរាមកំហែងអំពើហឹង្សាឬការបំភិតបំភ័យប្រឆាំងនឹងរូបគាត់នឹងមិនត្រូវបានអត់ធ្មត់ទេហើយនឹងត្រូវបានឆ្លើយតបយ៉ាងឆាប់រហ័ស”។
គួរបញ្ជាក់ថា លោក Guaido បានចាកចេញពីប្រទេសវេណេហ្ស៊ូអេឡាកាលពី១០ថ្ងៃមុននៅក្នុងការប៉ុនប៉ងមិនបានសម្រេចមួយដើម្បីបង្ខំឲ្យជំនួយមនុស្សធម៌ដែលត្រូវបានស្តុកទុកនៅក្នុងប្រទេសកូឡុំប៊ីអាចចូលក្នុងប្រទេសវេណេហ្ស៊ូអេឡាបាន។
បន្ទាប់មកលោកបានធ្វើដំណើរទស្សនកិច្ចសម្ព័ន្ធមិត្តក្នុងតំបន់ដូចជាប្រទេសកូឡុំប៊ី ប្រេស៊ីល អាហ្សង់ទីន ប៉ារ៉ាហ្គាយនិងអេក្វាឌ័រ៕ AFP
Source: Kampuchea Thmey Daily
0 Comments