បើទោះបីជាការយល់ដឹងពីច្បាប់ចរាចរណ៍របស់ពលរដ្ឋនៅមានកម្រិតយ៉ាងណាក៏ដោយ ក្នុងឆ្នាំ២០១៨កន្លងទៅនេះ គ្រោះថ្នាក់ចរាចរណ៍ត្រូវបានកាត់បន្ថយ

តាកែវ ៖ នេះ ជាលទ្ធផលវិជ្ជមានមួយ ដែលទទួលបានពីការអនុវត្តជាក់ស្តែងលើការចុះផ្សព្វផ្សាយច្បាប់ចរាចរណ៍ផ្លូវគោកទៅដល់សាលារៀន ក៏ដូចជាភូមិឃុំ សិស្សានុសិស្ស និងបងប្អូនប្រជាពលរដ្ឋ រួមជាមួយនឹងការចុះរឹតបន្តឹងអនុវត្តច្បាប់ចរាចរណ៍ផ្លូវគោក ដែលក្រុមមន្ត្រីនគរបាលចរាចរណ៍ត្រួតពិនិត្យយ៉ាងសកម្មទៅលើជាតិស្រវឹង ការបើកបរមិនពាក់មួកសុវត្ថិភាព គ្មានកញ្ចក់មើលក្រោយ និងរថយន្តដឹកសំពីងសំពោង នៅតាមបណ្ដោយផ្លូវជាតិលេខ២ និងផ្លូវជាតិលេខ៣ ដោយក្នុងឆ្នាំ ២០១៨នេះ មានករណីគ្រោះថ្នាក់ចរាចរណ៍កើតមានឡើង១០៥លើក ខណៈដែរឆ្នាំ២០១៧ មានករណីគ្រោះថ្នាក់ចរាចរណ៍ដល់ទៅ១២២លើក ថយចុះ១៧លើក ស្មើនឹង១៣,៩ភាគរយ ចំនួនអ្នកស្លាប់ថយចុះ ២៧,៩ភាគរយ ដោយឆ្នាំ២០១៨នេះ មានអ្នកស្លាប់៦៧នាក់ លើ៩៣នាក់ និងមានអ្នករបួស ១២៦នាក់ លើ១៣២នាក់។

លោកឧត្ដមសេនីយ៍ត្រី ប៉ុក ពលរិទ្ធ ស្នងការរងទទួលបន្ទុកផែនការងារសណ្ដាប់ធ្នាប់ នៃស្នងការដ្ឋាននគរបាលខេត្តតាកែវបានឲ្យដឹងថា ដោយមានការយកចិត្តទុកដាក់និងបញ្ជាផ្ទាល់ពីសំណាក់ ឯកឧត្ដមឧត្ដមសេនីយ៍ទោ សុខ សំណាង ស្នងការនគរបាលខេត្តតាកែវ លោកតែងតែជំរុញដល់មន្ត្រីជំនាញ ចុះរឹតបន្តឹងច្បាប់ចរាចរណ៍ផ្លូវគោក ក៏ដូចជាការចុះធ្វើការផ្សព្វផ្សាយច្បាប់ចរាចរណ៍ទៅដល់យុវវ័យជំទង់ៗ សិស្សានុសិស្ស បងប្អូនប្រជាពលរដ្ឋ ឲ្យ្បានទូលំទូលាយ ដើម្បីឲ្យពួកគាត់បានយល់ដឹងអំពីផលប៉ះពាល់ពីគ្រោះថ្នាក់ចរាចរណ៍ ដែលធ្វើឲ្យមានការខាតបង់នូវអ្វីៗទាំងអស់ ប្រសិនបើយើងទាំងអស់គ្នាជួបនៅគ្រោះថ្នាក់ចរាចរណ៍ជាយថាហេតុ ដោយបើកបរមិនមានការប្រុងប្រយ័ត្នមិនគោរពច្បាប់ និងមិនមានពាក់មួកសុវត្ថិភាពការពារ ឬបើកបរនៅក្នុងស្ថានភាពស្រវឹង។

លោកស្នងការរងបានបន្តថា នៅបច្ចុប្បន្ននេះ ប្រជាពលរដ្ឋដែលបានយល់ដឹងពីច្បាប់ គឺនៅមានកម្រិត និងស្មារតីគោរពច្បាប់របស់អ្នកប្រើប្រាស់ផ្លូវមួយចំនួន គឺមានកាខ្លាចរអានគរបាលជាជាង ខ្លាចច្បាប់ទៅវិញ ជាពិសេសអ្នកបើកបរទោចក្រយានយន្ត អ្នកបើកបររថយន្តដឹកកម្មករ ដឹកអ្នកដំណើរ និងរថយន្តដឹកទំនិញ។

លោកឧត្ដមសេនីយ៍ត្រី ប៉ុក ពលរិទ្ធ បន្តថា ទន្ទឹមនឹងការកត់សម្គាល់ជាវិជ្ជមានខាងលើ ស្ថានភាពគ្រោះថ្នាក់ចរាចរណ៍ផ្លូវគោក ក្នុងឆ្នាំ២០១៨នេះ មានការប្រែប្រួលស្មុគស្មាញច្រើន ដោយគ្រោះថ្នាក់ចរាចរណ៍បានបង្កផលវិបាក ច្រើនជាងគ្រោះថ្នាក់សង្គម ដទៃទៀត ដែលបណ្តាលមកពី ការធ្វេសប្រហែស និងការបំពានច្បាប់របស់អ្នកប្រើប្រាស់ផ្លូវ ការបើកបរលើសល្បឿនកំណត់ មិនគោរពសិទ្ធ មិនប្រកាន់ស្តាំ និងការបើកបរក្រោមឥទ្ធិពល នៃជាតិស្រវឹងតែម្តង។

សូមបញ្ជាក់ផងដែរថា ករណីគ្រោះថ្នាក់ចរាចរណ៍ដែលកើតមានឡើងក្នុងឆ្នាំ២០១៨នេះ បង្កឲ្យខូចខាតមធ្យោបាយសរុបចំនួន១៨៧គ្រឿង លើ២៣២គ្រឿង ថយចុះ៤៥គ្រឿង ក្នុងនោះមានរថយន្តតូច ចំនួន៥៤គ្រឿង រថយន្តធំចំនួន៣៩គ្រឿង ម៉ូតូ៩០គ្រឿង និងយានផ្សេងៗចំនួន០៤គ្រឿង។ ចុះអនុវត្ត និងរឹតបន្តឹងច្បាប់ចរាចរណ៍ផ្លូវគោក ត្រួតពិនិត្យលើអ្នកបើកបររថយន្ត និងម៉ូតូបានចំនួន១២៩០គ្រឿង ក្នុងនោះម៉ូតូ១១៩៤គ្រឿង និងរថយន្តចំនួន៩៦គ្រឿង ដោយពិន័យបានជាទឹកប្រាក់សរុបចំនួន២៥,៧៦០,០០០រៀល៕