បុរសម្នាក់បានស្លាប់នៅក្នុងមណ្ឌលឃុំឃាំងជនអន្តោប្រវេសន៍របស់ទីក្រុងស៊ីដនី ដែលនេះជាការស្លាប់ទី២ក្នុងរយៈពេលមិនដល់ពីរខែផង ហើយការស្លាប់នេះ បានបង្កើនការព្រួយបារម្ភអំពីលក្ខខណ្ឌនៅក្នុងបណ្តាញឃុំឃាំងឈូងសមុទ្ររបស់ប្រទេសអូស្ត្រាលី។
អ្នកតស៊ូមតិជនភៀសខ្លួនលោក Ian Rintoul បានប្រាប់ AFP ថា បុរសម្នាក់ដែលត្រូវបានគេជឿថាជាអ្នកស្វែងរកសិទ្ធិជ្រកកោនសញ្ជាតិអ៊ីរ៉ាក់គឺបានធ្វើអត្តឃាតខ្លួនឯងនៅមណ្ឌលឃុំឃាំងអន្តោប្រវេសន៍ Villawood កាលពីល្ងាចថ្ងៃចន្ទ។
មន្ត្រីអន្តោប្រវេសន៍អូស្ត្រាលីបានបញ្ជាក់ពីការស្លាប់របស់គាត់នៅថ្ងៃអង្គារប៉ុន្ដែមិនបានបញ្ចេញសេចក្តីលម្អិតបន្ថែមទេដោយគ្រាន់តែនិយាយថា បញ្ហានេះកំពុងស្ថិតនៅក្រោមការស៊ើបអង្កេតរបស់ភ្នាក់ងាររដ្ឋាភិបាលនិងអ្នកវិភាគសាកសពរបស់រដ្ឋ។
លោក Rintoul បាននិយាយអំពីអ្នកជាប់ឃុំថា “មនុស្សនៅខាងក្នុងមណ្ឌល Villawood បាននិយាយថា គាត់មានអារម្មណ៍បាក់ទឹកចិត្តនិងមិនបានចាកចេញពីបន្ទប់របស់គាត់ទេ”។
ការស្លាប់ចុងក្រោយបំផុតនេះបានកើតឡើងក្នុងរយៈពេល៦សប្តាហ៍បន្ទាប់ពីអ្នកជាប់ឃុំភេទប្រុសម្នាក់មកពីប្រទេសស៊ីរ៉ាឡេអូនបានស្លាប់នៅឯមណ្ឌល Villawood។ លោក Rintoul បាននិយាយថា គាត់ក៏ជាអ្នកស្វែងរកសិទ្ធិជ្រកកោនផងដែរនិងត្រូវបានគេជឿថាបានធ្វើអត្តឃាត។
ប្រទេសអូស្ត្រាលីមានគោលនយោបាយឃុំឃាំងជនអន្តោប្រវេសន៍ខុសច្បាប់រួមទាំងបទល្មើសតូចតាចដូចជាការស្នាក់នៅលើសទិដ្ឋាការជាដើម។
ក្រុមសិទ្ធិមនុស្សបានព្រមានអំពីការធ្វើទុក្ខទោសខ្លួនឯងនៅឯមណ្ឌលឃុំឃាំងឈូងសមុទ្រនិងឆ្នេរសមុទ្រអូស្ត្រាលីដោយនិយាយថា ជនជាប់ឃុំកំពុងតែតស៊ូជាមួយនឹងបញ្ហាសុខភាពផ្លូវចិត្តស្របពេលមានការឃុំឃាំងយូរអង្វែងដែលអាចមានរយៈពេលរាប់ឆ្នាំឯណោះ។
មន្ត្រីរដ្ឋាភិបាលកាលពីខែមុនបានបដិសេធថា មិនមានការធ្វើកូដកម្មអត់អាហារនៅទូទាំងបណ្តាញមណ្ឌលឃុំឃាំងដោយសារស្ថានភាពនៃមណ្ឌលនេះទេដោយនិយាយបន្ថែមថា អ្នកជាប់ឃុំត្រូវបានផ្តល់អាហារដែលមានគុណភាព ការថែទាំសុខភាពនិងសកម្មភាពនានា៕ AFP
Source: Kampuchea Thmey Daily
0 Comments