រតនគិរី ៖ មនុស្ស៣នាក់ បានរងរបួសធ្ងន់ស្រាល ក្រោយពីជួបហេតុការណ៍គ្រោះថ្នាក់ចរាចរណ៍ រវាងម៉ូតូ និងម៉ូតូបុកគ្នា ក្នុងទិសដៅស្របគ្នា ស្ថិតនៅក្នុងភូមិថារ៉ងជង ឃុំអូរជុំ ស្រុកអូរជុំ ខេត្តរតនគិរី កាលពីវេលាម៉ោង៦និង១០នាទីល្ងាច ថ្ងៃចន្ទ ១៣រោច ខែមាឃ ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី៤ ខែមីនា ឆ្នាំ២០១៩។
សមត្ថកិច្ចនគរបាលស្រុកអូរជុំបានឲ្យដឹងថា គ្រោះថ្នាក់ចរាចរណ៍នេះ បង្កឡើងដោយយុវសិស្ស២នាក់ ជិះម៉ូតូឌុបគ្នា បើកបរដោយឈ្មោះ ឡេ សុវណ្ណ ភេទប្រុស អាយុ១៦ឆ្នាំ ជនជាតិខ្មែរ មានទីលំនៅភូមិអូរកន្តិល សង្កាត់បឹងកន្សែង ក្រុងបានលុង(រងរបួសស្រាល) និងអ្នករួមដំណើរ ឈ្មោះ ឡេ បុប្ផា ភេទស្រី អាយុ១២ឆ្នាំ ជនជាតិខ្មែរ មានទីលំនៅជាមួយគ្នា(រងរបួសស្រាល)។ ពួកគេបើកបរខ្វះការប្រុងប្រយ័ត្ន មកដល់ចំណុចកើតហេតុ បានបុកម៉ូតូ ដែលបើកដោយជនរងគ្រោះ ឈ្មោះ លាវ រត្ន័សុធី ភេទប្រុស អាយុ៣២ឆ្នាំ ជនជាតិខ្មែរ មុខរបរកសិករ មានទីលំនៅភូមិអូរកន្តិល សង្កាត់បឹងកន្សែង ក្រុងបានលុង បណ្ដាលឲ្យរងរបួសធ្ងន់បាក់ជើងឆ្វេង។ ក្រោយកើតហេតុ ជនរងគ្រោះទាំង៣នាក់ ត្រូវបានដឹកបញ្ជូនទៅព្យាបាលនៅមន្ទីរពេទ្យបង្អែកខេត្ត។
ចំណែកម៉ូតូទាំងពីរគ្រឿង ត្រូវបានសមត្ថកិច្ចយកទៅរក្សាទុកនៅប៉ុស្តិ៍ ដើម្បីរង់ចាំធ្វើការដោះស្រាយនៅពេលក្រោយ។
គួរបញ្ជាក់ផងដែរថា នៅភូមិភាគឦសាន នៃខេត្តរតនគិរីនេះ ភាគច្រើនជាបងប្អូនជនជាតិដើមភាគតិច ទើប បើកបរទោចក្រយានយន្តសព្វថ្ងៃនេះ បើកបរគ្មានការប្រុងប្រយ័ត្ន ហើយថែមទាំងមិនបានពាក់មួកសុវត្ថិភាពទៀតផង។
ពួកគាត់មិនបានយល់ដឹងអំពីច្បាប់ចរាចរណ៍ផ្លូវគោកឡើយ អ្នកបើកបរមិនបានកាច់ជាសញ្ញាភ្លើងស៊ីញ៉ូឲ្យអ្នកនៅខាងក្រោយ បានឃើញនោះឡើយ ទើបធ្វើឲ្យជួបគ្រោះថ្នាក់ចរាចរណ៍ជាយថាហេតុជារៀងរាល់ថ្ងៃ។
មន្ត្រីសមត្ថកិច្ចជំនាញបានផ្សព្វផ្សាយនៅតាមបណ្តាស្រុក ក្រុងមួយចំនួន និងបានចែកខិត្តប័ណ្ណ និងមួកសុវត្ថិភាពឲ្យពួកគាត់បើកបរពាក់មួកសុវត្ថិភាពឲ្យបានត្រឹមត្រូវ ការពារអាយុជីវិតរបស់ពួកគាត់ថែមទៀតផង៕
Source: Kampuchea Thmey Daily
0 Comments