កណ្តាល ៖ ស្ត្រីម្នាក់ ដែលគិតថាសត្វឆ្កែរបស់ខ្លួន ត្រូវគេវាយ បានស្ទុះយកដំបងឫស្សីវាយលោកតាម្នាក់ បណ្តាលឲ្យរបួសធ្ងន់ ត្រូវបាននគរបាលចាប់ខ្លួនភ្លាមៗផងដែរ។
ហេតុការណ៍នេះបានកើតឡើងនៅថ្ងៃចន្ទ ១៣ រោចខែមាឃ ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី ០៤ខែមីនា ឆ្នាំ២០១៩ វេលាម៉ោង១៦និង២០នាទី នៅចំណុចភូមិស្វាយតានី ឃុំព្រែកគយ ស្រុកស្អាង ខេត្តកណ្តាល។
នគរបាលស្រុកស្អាងបានឲ្យដឹងថា ជនរងគ្រោះ ឈ្មោះ លីវ ឈៀង ភេទប្រុស អាយុ៩៤ឆ្នាំ ជនជាតិខ្មែរ ចាស់ជរា មានទីលំនៅភូមិ-ឃុំកើតហេតុ(របួស ក្បាល និងដៃឆ្វេង)។
ជនសង្ស័យ ឈ្មោះ ម៉ូវ ង៉ិចហៀក ភេទស្រី អាយុ២៨ឆ្នាំ ជនជាតិខ្មែរ មុខរបរកម្មការិនី មានទីលំនៅភូមិ-ឃុំកើតហេតុ។
លោកវរសេនីយ៍ សេង សុជាតិ អធិការនគរបាលស្រុកស្អាងបានឲ្យដឹងថា នៅថ្ងៃទី០៤ ខែមិនា ឆ្នាំ២០១៩ វេលាម៉ោង១៦និង២០នាទី ជនរងគ្រោះ ឈ្មោះ លីវ ឈៀង បានដើរកាន់ឈើច្រត់តាមផ្លូវលំ កាត់មុខផ្ទះរបស់ ឈ្មោះ ម៉ូវ ង៉ិចហៀក។ ពេលនោះ ឆ្កែរបស់ឈ្មោះ ម៉ូវ ង៉ិចហៀក ចំនួន២ក្បាល បានព្រុសខ្លាំងៗចេញពីក្នុងផ្ទះមកដេញខាំជនរងគ្រោះ។ ខណៈនោះ ជនរងគ្រោះបានយកឈើច្រត់របស់ខ្លួនយារ វាយឆ្កែ ដើម្បីកុំឲ្យឆ្កែខាំ ក៏ត្រូវ ឈ្មោះ ម៉ូវ ង៉ិចហៀក ថាគេវាយឆ្កែរបស់ខ្លួន ក៏យកដំបងឫស្សីមកវាយជនរងគ្រោះ បណ្តាលឲ្យបែកចំពីលើក្បាល និងមានស្នាមមុតដៃចេញឈាមទៀតផង។
បច្ចុប្បន្ន ជនរងគ្រោះ កំពុងសម្រាកព្យាបាល របួសនៅមន្ទីរពេទ្យឯកជនមួយ នៅស្វាយតានី។ ជនសង្ស័យ បានឃាត់ខ្លួននៅអធិការដ្ឋាននគរបាលស្រុកស្អាង ដើម្បីបន្តចាត់ការតាមនីតិវិធី៕
Source: Kampuchea Thmey Daily
0 Comments