ប៉ូលិសបានចាប់ខ្លួនមនុស្សយ៉ាងតិច១៩នាក់នៅក្នុងការវាយឆ្មក់ទូទាំងប្រទេសប្រេស៊ីលកាលពីថ្ងៃព្រហស្បតិ៍ដែលកំណត់គោលដៅលើក្រុមមន្ត្រីការពារបរិស្ថាននិងក្រុមហ៊ុននានាដែលជាប់ពាក់ព័ន្ធក្នុងការកាប់ឈើខុសច្បាប់នៅក្នុងព្រៃអាម៉ាហ្សូន។
ប្រតិបត្តិការនេះគឺស្របពេលជាមួយនឹងការតវ៉ាដ៏ធំមួយនៅរដ្ឋធានី Brasilia ដោយជនជាតិដើមភាគតិចដែលទាមទារឲ្យមានការការពារដីរបស់ពួកគេឲ្យបានល្អប្រសើរជាងមុនពីអ្នកជីករ៉ែ អ្នកកាប់ឈើនិងកសិករក៏ដូចជារបាយការណ៍ថ្មីដែលព្រមានអំពីការបំផ្លិចបំផ្លាញព្រៃអាម៉ាហ្សូនផង ដែរ។ មន្ត្រីប៉ូលិសសហព័ន្ធដែល មានដីកាចាប់ខ្លួនចំនួន២៩និងដីកាឆែកឆេរនិងរឹបអូសជាង១០០បានអនុវត្តប្រតិបត្ដិការនៅក្នុងរដ្ឋចំនួនប្រាំបីនិងសង្កាត់សហព័ន្ធ Brasilia។
ប៉ូលិសបាននិយាយនៅ ក្នុងសេចក្ដីថ្លែងការណ៍មួយថា ពួកគេបានកំណត់គោលដៅលើអ្នកដែលពាក់ព័ន្ធក្នុងការយកចេញ កេងប្រវ័ញ្ចនិងជួញដូរឈើដោយខុសច្បាប់ព្រមទាំងមន្ត្រីពុករលួយនៅ ក្នុងភ្នាក់ងារការពារបរិស្ថាននិងក្រុមហ៊ុនឈើផងដែរ។ទឹកប្រាក់ប្រហែល៥០លាន Reais (១២លានដុល្លារ) ដែលជាកម្មសិទ្ធិរបស់ក្រុមហ៊ុនដែលស្ថិតក្រោមការស៊ើបអង្កេតក៏ត្រូវបានបង្កកផងដែរ។
អ្នកនាំពាក្យប៉ូលិសសហព័ន្ធបានប្រាប់ AFP ថា អតីតបុគ្គលិកម្នាក់នៃវិទ្យាស្ថានបរិស្ថាននិងធនធានកកើតឡើងវិញរបស់ប្រេស៊ីលគឺជាអ្នកស្ថិតក្នុងចំណោមមនុស្សចំនួន១៩នាក់ដែលត្រូវ បានចាប់ខ្លួន។ការស៊ើបអង្កេតដែលឈានទៅដល់ការវាយឆ្មក់កាលពីថ្ងៃព្រហស្បតិ៍ក៏បាននាំឲ្យមានការរឹបអូសកុងតឺន័រ ចំនួន៤០០ដែលផ្ទុកឈើ៨,០០០ម៉ែត្រគូបកាលពីខែធ្នូឆ្នាំ២០១៧ផងដែរនៅច្រកកំពង់ផែ Manaus ដែលជាទីក្រុងធំរបស់តំបន់អាម៉ាហ្សូន។
សេចក្តីថ្លែងការណ៍របស់ប៉ូលិសបាននិយាយថា ការដឹកជញ្ជូនដោយខុសច្បាប់រួមមានកុងតឺន័រចំនួន១៤០សម្រាប់នាំចេញទៅកាន់បណ្តាប្រទេសនៅទ្វីបអឺរ៉ុប អាស៊ីនិងអាមេរិកខាងជើង។ យោងតាមការវាយតម្លៃប្រចាំឆ្នាំរបស់អ្នកវិទ្យាសាស្ដ្រនៅអង្គការឃ្លាំមើលព្រៃឈើពិភពលោក (GFW) បានឲ្យដឹងថា ការបំផ្លិចបំផ្លាញព្រៃឈើបឋមជិត១ភាគ៣នៅ លើពិភពលោកគឺបានកើតឡើងក្នុងប្រទេសប្រេស៊ីលពោលគឺស្មើនឹង១៣,៥០០គីឡូម៉ែត្រការ៉េ៕ AFP
Source: Kampuchea Thmey Daily
0 Comments