ភ្នំពេញ ៖ តារាចម្រៀងជើងចាស់មានប្រជាប្រិយភាព និងជាអតីតប្រធានសមាគមសិល្បករខ្មែរចំនួន២អាណត្តិ លោក សុះ ម៉ាច ព្រោះតែសង្កេតឃើញអំឡុងពេលមួយរយៈចុងក្រោយនេះ មានយុវជនខ្មែរមួយចំនួន ហាក់កាន់តែមិនឲ្យតម្លៃ និងចូលរួមក្នុងការអភិរក្សលើកតម្កើងលើវប្បធម៌ និងអរិយធម៌ខ្លួននោះ លោកក៏បានចេញសារបង្កប់អត្ថន័យដាស់តឿនស្មារតីដល់ពួកគេ។
បើតាមរយៈខ្លឹមសារនោះលោក សុះ ម៉ាច បានរៀបរាប់ថាជាតិសាសន៍មួយដែលមានវប្បធម៌អរិយធម៌ខ្ពង់ខ្ពស់ឧត្តុង្គឧត្ដម ដែលលើសកលលោកគេគោរពសរសើរកោតស្ញប់ស្ញែងនូវមរតកដែលបុព្វបុរសបានបង្កើតទាំងភាសាអក្សរសាស្ត្រសិល្បៈកីឡាប្រាង្គប្រាសាទសិលាភាពទន់ភ្លន់ថ្លៃថ្នូរម៉ឺងម៉ាត់ និងភាពក្លាហានដ៏អស្ចារ្យ។ កេរ្តិ៍ដំណែល និងទំនៀមទម្លាប់វប្បធម៌ទាំងនេះ ត្រូវបានខ្មែរពីមួយជំនាន់ទៅមួយជំនាន់បន្តថែរក្សា។
តារាចម្រៀង លោក សុំ ម៉ាច បានបន្តថា ចុះឥឡូវហេតុអ្វីមនុស្សសម័យនេះមិនយកគំរូដ៏ល្អនេះមកប្រើ និងអនុវត្តន៍ទៅ? ខ្ញុំសូមលើកយកតែភាសាការនិយាយ និងការសរសេរការសម្តែង និងច្រៀងដែលមនុស្សមួយចំនួន និងស្ទើរតែគ្រប់ស្រទាប់វណ្ណៈ ជាពិសេសបុគ្គលសាធារណៈបាននិងកំពុងយកមកប្រើជាលក្ខណ:សាធារណៈហាក់ប្រាសចាកបាត់អស់នូវសេចក្ដីថ្លៃថ្នូរ។ តើនេះជាគំរូល្អសម្រាប់មនុស្សជំនាន់ក្រោយ ឬទេ?។
លោក សុះ ម៉ាច បានបន្ថែមទៀតថា សូមចូលរួមពិចារណាទាំងអស់គ្នា! និងក្រឡេកមើលគេឯងជាតិសាសន៍ដទៃដែលនៅក្បែរៗយើងផង! សូមអភ័យទោសផងដែលសរសេរទៅប៉ះពាល់លោកអ្នក!ចូលចងចាំសុភាសិតខ្មែរយើងពីបរមបុរាណ(សម្ដីសរជាតិ មារយាទសពូជ)!។ ជាមួយគ្នា នៃការបញ្ចេញសារដាស់តឿនបង្កប់ន័យលើករណីបំផុសឲ្យចូលរួមអភិរក្សលើកតម្កើងលើវប្បធម៌ និងអរិយធម៌ខ្មែរខាងលើនេះ បានធ្វើមហាជន និងអ្នកសិល្បៈជាច្រើនបង្ហាញការគាំទ្រគ្រប់គ្នា៕
Source: Kampuchea Thmey Daily
0 Comments