ភ្នំពេញ ៖ លោកជំទាវកិត្តិសង្គហបណ្ឌិតម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនង ជាមួយ រដ្ឋសភា-ព្រឹទ្ធសភាបានថ្លែងនូវការអបអរសាទរចំពោះសភាពាណិជ្ជកម្មខេត្តឡាវនិញ នៃសាធារណរដ្ឋប្រជាមានិតចិនក្នុងការមកវិនិយោគនិងការតាំងពិព័រណ៍ពាណិជ្ជកម្មនៅប្រទេសកម្ពុជាដែលកំពុងតែមានការអភិវឌ្ឍន៍ពោរពេញដោយសុខសន្តិភាព។ លោកជំទាវកិត្តិសង្គហបណ្ឌិតថ្លែងបែបនេះ ក្នុងឱកាសសម្ពោធពិព័រណ៍ពាណិជ្ជកម្ម ខេត្តឡាវនិញ-កម្ពុជានៅសណ្ឋាគារ សូហ្វីតែល ថ្ងៃទី២៦ ខែមេសា ឆ្នាំ២០១៩។
ក្នុងនាមរាជរដ្ឋាភិបាលកម្ពុជាលោកជំទាវកិត្តិសង្គហបណ្ឌិតថ្លែងនូវការអបអរសាទរ កោតសរសើរ និង ចំពោះសភាពាណិជ្ជកម្មខេត្តឡាវនិញ នៅកម្ពុជា ដែលបានរៀបចំតាំងពិព័រណ៍ពាណិជ្ជកម្ម នៅភ្នំពេញ។
ពិព័រណ៍នេះពិតជារួមចំណែក ជំរុញពាណិជ្ជកម្ម និងធុរកិច្ចចិន នៅក្នុងព្រះរាជាណាចក្រ កម្ពុជា ឲ្យកាន់តែរីកធំធាត់ថែមទៀត។ ម្យ៉ាងទៀត ពិព័រណ៍នេះនឹង ផ្សព្វផ្សាយផលិតផលពីប្រទេសចិន ដើម្បីរកទីផ្សារជូនអតិថិជនទាំងកម្ពុជា និងចិនឲ្យកាន់តែល្អ។
លោកជំទាវកិត្តិសង្គហបណ្ឌិតបានថ្លែងថា ក្នុងរយៈ ពេលប៉ុន្មានឆ្នាំចុងក្រោយនេះ ប្រទេសកម្ពុជាមាន កំណើនសេដ្ឋកិច្ច ជាមធ្យមប្រមាណ៧ភាគរយជាប់ៗគ្នា ដែលនាំឲ្យចំណូលរបស់ ប្រជាជនយើងមានការកើនឡើង និងមានជីវភាពកាន់តែធូរធារផងដែរ។ ដោយឡែករាជធានីភ្នំពេញ កំពុងតែរីកលូតលាស់ ក្លាយទៅជាមជ្ឈមណ្ឌល ពាណិជ្ជកម្មមួយដ៏ទាក់ទាញ និងរស់រវើកដែលមានសកម្មភាព អាជីវកម្ម មានញឹក មានហាងលក់ទំនិញ និងសំណង់ ធំៗ ជាពិសេស អគារ ខ្ពស់ៗ ជាច្រើន កំពុងតែសាងសង់ និង រីកដុះដាលដូច ផ្សិតបម្រើដល់ការរកស៊ី ស្នាក់នៅ និងធ្វើការងារប្រកបដោយផាសុកភាព។
កម្ពុជាកំពុងតែក្លាយជា គោលដៅថ្មីមួយ គួរឲ្យចាប់អារម្មណ៍បំផុតពី អ្នកវិនិយោគក្នុងស្រុក និងបរទេស ដោយសាររាជរដ្ឋាភិបាល មានគោលនយោបាយ ចាត់ទុកវិស័យឯកជន ជាក្បាលម៉ាស៊ីនរុញកំណើន សេដ្ឋកិច្ច និងការស្វាគមន៍យ៉ាងកក់ក្តៅ ដល់អ្នកវិនិយោគបរទេស ដោយគ្មានប្រកាន់ជាតិសាសន៍ និងកត្តា អំណោយផលផ្សេងទៀត រួមទាំងការលូតលាស់ ផ្នែកសេដ្ឋកិច្ចយ៉ាងលឿន ជាពិសេសខាង ពាណិជ្ជកម្មសំណង់ទេសចរណ៍ ហិរញ្ញវត្ថុ ទីផ្សារពលករមានតម្លៃទាប និងច្បាប់ វិនិយោគដែល អនុគ្រោះដល់ធុរកិច្ចជន។ ចំណងសាមគ្គីភាព មិត្តភាព និងសហប្រតិបត្តិការរវាង ចិន និងកម្ពុជា កាន់តែមានការរីកចម្រើនលើគ្រប់វិស័យ។ ចិន ជាប្រទេសដែលបានផ្តល់ជំនួយឥតសំណង និងផ្តល់ឥណទាន អនុគ្រោះ ច្រើនជាងគេ ដល់កម្ពុជា ជាប្រភពវិនិយោគទុនធំបំផុត និង ជាទីផ្សារទេសចរណ៍ធំបំផុតរបស់កម្ពុជា។
លោកជំទាវកិត្តិសង្គហបណ្ឌិតបន្ថែមថា ស្របពេលប្រទេសចិនមានគំរោងដ៏ធំមួយគឺ «គំនិត ផ្តួចផ្តើម ខ្សែក្រវាត់ និងផ្លូវ» ដែលកំពុងដំណើរការ និងបានទាក់ទាញ ការចូលរួមយ៉ាងសកម្ម ពីប្រទេសជាច្រើន ក្នុងតំបន់និងក្រៅតំបន់ រួមទាំងកម្ពុជាផងដែរ ការតាំងពិព័រណ៍នេះពិតជាទទួលបានផលប្រយោជន៍ និងជោគជ័យជាមិនខាន៕
Source: Kampuchea Thmey Daily
0 Comments