ភ្នំពេញ ៖ នៅព្រឹកថ្ងៃទី២៦មេសានេះ លោក ចេង មុនីរ៉ា អភិបាល នៃគណៈអភិបាលខណ្ឌច្បារអំពៅដោយមានការចូលរួមពី លោក លោកស្រីអភិបាលរងខណ្ឌ លោកនាយក នាយករងរដ្ឋបាលសាលាខណ្ឌ បាននាំយកអង្ករ និងថវិកាផ្តល់ដល់កម្លាំងប្រជាការពារសាលាខណ្ឌចំនួន៥០នាក់ ដើម្បីជាការលើកទឹកចិត្តក្នុងការខិតខំប្រឹងប្រែងបំពេញការងារជូនសាលាខណ្ឌ និងប្រជាពលរដ្ឋ។
លោក ចេង មុនីរ៉ា បានមានប្រសាសន៍ថា ថ្ងៃនេះ គណៈអភិបាលខណ្ឌច្បារអំពៅ បាននាំយកអង្ករ និងថវិកា មកផ្តល់ជូនបងប្អូនប្រជាការពារសាលាខណ្ឌសរុបចំនួន៥០នាក់ ដោយក្នុងម្នាក់ៗទទួលបានអង្ករ១បាវ ទម្ងន់៥០គីឡូក្រាម និងថវិកាមួយចំនួន។ ចំពោះអង្ករ និងថវិកានេះ គឺសម្រាប់ផ្តល់ជូនកម្លាំងប្រជាការពារយើងយកទៅឧបត្ថម្ភដល់គ្រួសារដើម្បីដោះស្រាយក្នុងជីវភាពប្រចាំថ្ងៃ។
លោកអភិបាលខណ្ឌបានបន្តថា សព្វថ្ងៃនេះ កម្លាំងប្រជាការពារសាលាខណ្ឌទាំង៥០នាក់ បានខិតខំប្រឹងប្រែងបំពេញការងារជូនសាលាខណ្ឌ ដោយមិនខ្លាចនឿយហត់ និងមិនថាយប់ ឬ ថ្ងៃឡើយ។
ក្នុងនោះ គឺពេលព្រឹកកម្លាំងប្រជាការពារយើងបានចុះសម្រួលចរាចរណ៍ដងផ្លូវ ដោយសហការជាមួយសមត្ថកិច្ច។ បន្ទាប់មក គឺចុះរៀបចំសណ្ដាប់ធ្នាប់តាមដងផ្លូវរហូតដល់ពេលយប់ គឺចូលរួមល្បាតការពារសន្តិសុខក្នុងមូលដ្ឋាន ដែលតាមពិនិត្យទៅ គឺពុំមានពេលទំនេរឡើយ។ ទន្ទឹមនឹងនោះ លោកអភិបាលខណ្ឌ បានធ្វើការផ្ដាំផ្ញើដល់កម្លាំងប្រជាការពារទាំងអស់នៅពេលចុះទៅបំពេញការងារត្រូវគោរពនូវភារកិច្ច ដែលគណៈអភិបាលបញ្ជា។ មិនត្រូវធ្វើកិច្ចការអ្វីតាមការនឹកឃើញរបស់ខ្លួននោះទេ ព្រោះកម្លាំងយើងមានអ្នកដឹកនាំបញ្ជាត្រឹមត្រូវ។ ហើយនៅពេលបំពេញការងារ ត្រូវមានកាយវិការ និងសំដីសំដៅទន់ភ្លន់តែកុំទន់ជ្រាយ។ ពិសេស គឺត្រូវគោរព និងស្រឡាញ់ប្រជាពលរដ្ឋដូចជាបងប្អូនបង្កើតរបស់យើងអញ្ចឹង៕
Source: Kampuchea Thmey Daily
0 Comments