ភ្នំពេញ ៖ លោកជំទាវកិត្តិសង្គហបណ្ឌិតម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចបានថ្លែងនូវការគាំទ្រនិងជំរុញឲ្យដំណើរទទួលបានជោគជ័យនៅកម្ពុជាលើការវិនិយោគទន់ផ្នែកសុខាភិបាលដែលជាការសហការគ្នាយ៉ាងល្អប្រសើររវាងដៃគូកម្ពុជានិងសិង្ហបុរី ដែលមានជំនាញបច្ចេកទេសពិតប្រាកដ។
លោកជំទាវថ្លែងគាំទ្របែបនេះខណៈអញ្ជើញជាអធិបតីក្នុងពិធីសម្ពោធដាក់ឲ្យប្រើប្រាស់ជាផ្លូវការមន្ទីរពហុព្យាបាល និងសម្ភព អរៀនដាអគារលេខ ៩A ផ្លូវលេខ ៤៦៦ ស.ទន្លេបាសាក់ ខ. ចំការមនភ្នំពេញ ថ្ងៃទី ២៦ ខែមេសា ឆ្នាំ២០១៩។
លោកជំទាវកិត្តិសង្គហបណ្ឌិតសម្ដែងនូវសេចក្តីសោមនស្សរីករាយ ដោយបានចូលរួមជាអធិបតី ក្នុងពិធីសម្ពោធ ដាក់ឲ្យប្រើប្រាស់ជាផ្លូវការ មន្ទីរមន្ទីរពហុព្យាបាលនិង សម្ភព អរៀនដា។ នេះក៏ជា ឱកាសដ៏ល្អមួយសម្រាប់រូបជំទាវដែលបានមកជួប សំណេះសំណាលដោយផ្ទាល់ជាមួយលោក លោកស្រី ក្មួយៗ ជា អ្នកជំនាញ ខាងផ្តល់សេវាថែទាំសុខភាពទាំងអស់ដែលមានវត្តមាននៅទីនេះ។
មន្ទីរពេទ្យ ដ៏ទំនើបនេះគឺជាសមិទ្ធផលថ្មីមួយទៀត ក្នុងវិស័យសុខាភិបាល នៅរាជធានីភ្នំពេញ ដែលជាបេះដូង និងដួងវិញ្ញាណរបស់ប្រទេសកម្ពុជា ដែលកំពុងមានសក្ដានុពលភាព យ៉ាង ល្អប្រសើរ ផ្នែកពាណិជ្ជកម្ម សេវាកម្ម និង វិនិយោគ។ នេះគឺការ ឆ្លុះបញ្ចាំងនូវការ លូតលាស់ ទៅ មុខ ឥតឈប់ ឈរ នៃវិស័យ សុខាភិបាល ជាពិសេស ការចូលរួមនៃវិស័យឯកជន ដែលបានសាងសង់ មន្ទីរពេទ្យ ដើម្បីបំពេញបន្ថែមលើការផ្តល់សេវាសុខភាព ដែលកំពុងមានស្រាប់ទាំងផ្នែករដ្ឋ និងឯកជន រួមចំណែកជំរុញកំណើនសេដ្ឋកិច្ចជាតិ។
ការអភិវឌ្ឍន៍ របស់ វិស័យឯកជនបាន និង កំពុង ទទួល បានការ គាំ ទ្រ យ៉ាង ពេញទំហឹង ពីសំណាក់រាជរដ្ឋាភិបាលកម្ពុជា តាមរយៈយុទ្ធសាស្ដ្រ ចតុកោណ ដំណាក់កាលទី៣ ដើម្បីកំណើន ការងារ សមធម៌ និង ប្រសិទ្ធភាព ដែលបាន កំណត់យក ការអភិវឌ្ឍន៍វិស័យ ឯកជនក្នុង បេសកកម្ម អភិវឌ្ឍសេដ្ឋកិច្ច-សង្គម។ លើសពីនេះទៀត នេះពិតជា គូសបញ្ជាក់ យ៉ាងច្បាស់ពីការទុកចិត្ត ពីសំណាក់ អ្នកវិនិយោគទុន ទាំងក្នុងប្រទេស និង ក្រៅប្រទេសលើ ការអភិវឌ្ឍន៍ សេដ្ឋកិច្ច និង ស្ថិរភាព នយោបាយដែលបង្កការងាយស្រួល ដល់ការបណ្តាក់ទុន និង ប្រកបអាជីវកម្ម នៅកម្ពុជា។
ក្នុងនាមរាជរដ្ឋាភិបាលកម្ពុជា និងលោកជំទាវផ្ទាល់សូម អបអរសាទរ និងកោតសរសើរដោយស្មោះ ចំពោះម្ចាស់ភាគហ៊ុនទាំងអស់ នៃមន្ទីរពេទ្យនេះ ដែលបានបោះទុនវិនិយោគកសាងអគារមន្ទីរពេទ្យ ដ៏ទំនើបមួយ ដើម្បីធ្វើសកម្មភាព ធុរកិច្ច ផ្ទាល់ខ្លួនផង និងរួមចំណែកក្នុងការអភិវឌ្ឍន៍ ប្រទេសជាតិផង តាមរយៈការផុ្ដល់សេវាសុខាភិបាល ប្រកបដោយគុណភាព។
លោកជំទាវសម្តែងនូវការអបអរសាទរដល់ការចុះអនុស្សរណៈយោគយល់ រវាងមន្ទីរពហុព្យាបាលនិង សម្ភព អរៀនដា និងស្ថាប័នសុខាភិបាលឯកជន សឹង្ហបុរី ខរនឺរស្តូនអាស៊ានហែល (Cornerstone Asia Health) ដែលរួម គ្នា សហការ ផ្តល់សេវាសុខាភិបាលនៅកម្ពុជា។
កិច្ចសហប្រតិបត្តិការនេះនឹងនាំ ឲ្យមន្ទីរពេទ្យថ្មីនេះ កាន់តែទទួលបានជោគជ័យទៅអនាគត។
លោកជំទាវកិត្តិសង្គហបណ្ឌិតសង្កត់ធ្ងន់ថា ចាប់តាំងពីថ្ងៃរំដោះ៧មករា ឆ្នាំ១៩៧៩ មកវិស័យសុខាភិបាលនៅកម្ពុជាមានការរីកចម្រើនជាលំដាប់ដោយចំនួនមន្ទីរពេទ្យ រដ្ឋ និងឯកជនដែល ត្រូវបានស្តារ និង កសាងជាថ្មី និង បានកើនឡើងពីមួយឆ្នាំទៅមួយឆ្នាំ។ ប្រទេសកម្ពុជាយើង បាន សម្រេចដោយជោគជ័យនូវគោលដៅអភិវឌ្ឍន៍ សហស្សវត្ស លើការកាត់បន្ថយមរណភាពមាតា ទារក និងកុមារ និងការកែលម្អកង្វះអាហារូបត្ថម្ភ ក៏ដូចជាការកាត់ បន្ថយការចម្លង នៃមេរោគអេដស៍។ ជាការពិត កត្ដាគន្លឹះ ដែលបានជំរុញឲ្យយើងសម្រេចបាននូវលទ្ធផល ជាវិជ្ជមានក្នុង ការលើកស្ទួយស្ថានភាពសុខភាព របស់ប្រជាពលរដ្ឋយើងនោះ គឺឆន្ទៈនយោបាយ ដ៏រឹងមាំ និងការគាំទ្រដ៏ប្តូរផា្ដច់របស់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃ ព្រះរាជាណាចក្រកម្ពុជា និងការជួយឧបត្ថម្ភគាំទ្រយ៉ាងពេញទំហឹង និងដោយទឹកចិត្តស្មោះសរបំផុតពី សម្តេច កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានសមាគមជាតិកាក បាទក្រហមកម្ពុជា។
នៅនីតិកាលទី៦ នៃរដ្ឋសភា រាជរដ្ឋាភិបាលកម្ពុជា បានដាក់ចេញយុទ្ធសាស្ត្រចតុកោណដំណាក់កាលទី៤ ដែលរួមមានការកែទម្រង់ ស៊ីជម្រៅ តាមវិស័យនានា រួមទាំងវិស័យសុខាភិបាលផងដែរ។ កាលពីដើមឆ្នាំ២០១៦ ក្រសួងសុខាភិបាលបានដាក់ចេញផែនការយុទ្ធសាស្ត្រសុខាភិបាល ឆ្នាំ ២០១៦- ២០២០ ដែល ជាផែនទីចង្អុលបង្ហាញ ផ្លូវ ក្នុងវិស័យសុខាភិបាល សំដៅ លើកកម្ពស់សុខភាព និងសុខុមាលភាពប្រជាពលរដ្ឋកម្ពុជា តាមរយៈ ការពង្រឹងការផ្តល់សេវាថែទាំសុខភាព ពិសេសការធ្វើរោគវិនិច្ឆ័យ និងការផ្តល់សេវាព្យាបាល និងថែទាំ ប្រកបដោយគុណភាព មានសុវត្ថិភាព និងស័ក្តិសិទ្ធិភាព។
ស្របពេលជាមួយគ្នា នេះផងដែរ រាជរដ្ឋាភិបាលបានដាក់ចេញនូវគោលដៅជាយុទ្ធសាស្ត្រមួយចំនួនទៀត ដូចជាជំរុញការអភិវឌ្ឍន៍វិស័យ ឯកជនឲ្យកាន់តែមានភាពរស់រវើក និងមានលក្ខណៈប្រកួតប្រជែងខ្លាំងថែមទៀត ដើម្បីរួមចំណែកលើកស្ទួយកំណើនសេដ្ឋកិច្ច និងប្រែក្លាយ កម្ពុជា ទៅជាគោលដៅសម្រាប់ការវិនិយោគប្រកប ដោយ ភាពទាក់ទាញ នៅក្នុងតំបន់ ពិសេសក្នុងពេលដំណើរការនៃសហគមន៍សេដ្ឋកិច្ចអាស៊ាន ដែលបានចាត់ទុក វិស័យសុខាភិបាលជាវិស័យ អាទិភាពមួយ នៅក្នុងចំណោមវិស័យ អាទិភាព នានា សម្រាប់ការអភិវឌ្ឍន៍សេដ្ឋកិច្ច សង្គម ប្រកប ដោយចីរភាព។
ក្រសួងសុខាភិបាល បានលើកឡើងក្នុងរបាយការណ៍សមិទ្ធផល ឆ្នាំ ២០១៧ និងទិសដៅឆ្នាំ២០១៨ថា ការពង្រីកការគ្របដណ្តប់នៃសេវាសុខភាព និង អន្តរាគមន៍សុខភាពសាធារណៈ បានដើរទន្ទឹមគ្នានឹងការកែលម្អគុណភាពសេវាឲ្យកាន់តែប្រសើរឡើង។ ដូច្នេះ មន្ទីរពហុព្យាបាល និងសម្ភពនេះ នឹងរួមចំណែកលើកកម្ពស់គុណភាពសេវាថែទាំសុខភាពសម្រាប់ប្រជាពលរដ្ឋយើង តាមរយៈ ការពិគ្រោះ ការស្រាវជ្រាវ ការវិភាគ និងការព្យាបាលជំងឺទៅតាមស្តង់ដារជាតិ និងអន្តរជាតិ ធានាសុវត្ថិភាព សក្តិសិទ្ធភាព និងភាពជឿទុកចិត្ត។ លោកជំទាវជឿជាក់ថា ការបើកឲ្យដំណើរការ មន្ទីរពេទ្យនេះ គឺជាការឆ្លើយតបមួយទៅនឹងស្ថានភាពរីកចម្រើនរបស់ប្រទេសជាតិយើង ក៏ដូចជាការសម្របខ្លួនទៅនឹងចរន្តសមាហរណកម្មនៃសហគមន៍អាស៊ាន។ លើសពីនេះទៀត នេះ គឺជាការចូលរួមចំណែកពង្រឹង សេវា ថែទាំសុខភាព ក្នុងវិស័យឯកជន ឲ្យមានលក្ខណៈ ប្រកួតប្រជែងទៅតាម ទីផ្សារសេរី ដើម្បីបង្កលក្ខណៈឲ្យ អ្នកប្រើប្រាស់សេវា មាន ជម្រើសថែមទៀត ក្នុងការស្វែងរកការព្យាបាលទៅតាមតម្រូវការ និងលទ្ធភាព ផ្ទាល់របស់ខ្លួនក្នុងនោះរាប់ទាំងអ្នកប្រើប្រាស់សេវាសុខភាពជាជនបរទេស ដែលកំពុងរស់នៅ និងបំពេញការងារក្នុងប្រទេស ឬជាភ្ញៀវទេសចរណ៍ ដែលមក ទស្សនាប្រទេសកម្ពុជាយើងផងដែរ។
ម្យ៉ាងទៀតបច្ចុប្បន្នមានប្រជាពលរដ្ឋយើងមួយចំនួន ដែលមានជីវភាពមធ្យម និង ធូរធារ តែងតែ ស្វែងរកការពិនិត្យ និងព្យាបាលជំងឺ នៅក្រៅប្រទេស ដូចជា នៅប្រទេសវៀតណាម ថៃ ម៉ាឡេស៊ី និងសឹង្ហបុរីជាដើម ដោយត្រូវចំណាយ ពេលវេលា ប្រាក់កាស និងមានការលំបាកក្នុងការធ្វើដំណើរ។ ដូច្នេះពួកគាត់ អាចនឹងងាកមករកការប្រើប្រាស់សេវាថែទាំសុខភាព និងព្យាបាលជំងឺនៅក្នុងស្រុកវិញ នៅពេលដែលមានជម្រើស នៃជំនាញ និងសេវាឯកទេសក្នុងស្រុកមានកាន់តែច្រើន ហើយគុណភាពនិងជំនឿទុកចិត្ត កាន់តែត្រូវបានលើកកម្ពស់ ស្របតាមស្តង់ដារសកល។
ឆ្លៀតក្នុងឱកាសនេះដែរ ក្នុងនាមរាជរដ្ឋាភិបាលកម្ពុជា សូមវាយតម្លៃខ្ពស់ និងសូមកោតសរសើរដោយស្មោះចំពោះកិច្ចខិតខំប្រឹងប្រែងរបស់អ្នកគ្រប់គ្រង និងបុគ្គលិកមន្ទីរពហុព្យាបាល និងសម្ភពអូរៀនដា ដែលបានរួមគ្នាសម្រេចបាននូវសមិទ្ធផលគួរជាទីមោទនៈនេះ។ ក្រៅ ពីបានចូលរួមលើកកម្ពស់ គុណភាពសេវាថែទាំសុខភាព មន្ទីរពេទ្យ ថ្មីមួយនេះ ក៏បានជួយបង្កើតឱកាសការងារមួយចំនួន ដល់យុវជនជំនាន់ក្រោយរបស់យើង ដែលបានបញ្ចប់ការសិក្សាពី សាលាជំនាញ និងសាលា ឯកទេសនានា បានចូលបម្រើការងារ ពង្រីកការយល់ដឹង និងផ្លាស់ប្តូរបទពិសោធន៍ជាមួយគ្រូពេទ្យរៀម ច្បង និងគ្រូពេទ្យបរទេសខ្លះ ដើម្បីអភិវឌ្ឍន៍ខ្លួនឲ្យបានកាន់តែប្រសើរឡើង នៅក្នុងវិជ្ជាជីវៈវេជ្ជសាស្ត្រ ហើយប្រើប្រាស់នូវចំណេះដឹងថ្មីៗ របស់ខ្លួន រួមចំណែកពង្រឹង និងអភិវឌ្ឍន៍វិស័យសុខាភិបាលរបស់ជាតិយើង ឆ្ពោះទៅរកអនាគតត្រចះត្រចង់ ឆ្លើយតបទៅនឹងសេចក្តីត្រូវការរបស់សាធារណជនទូទៅ ក៏ដូចជាបានចូលរួម អនុវត្តគោលនយោបាយរបស់រាជរដ្ឋាភិបាល ក្នុងការកាត់បន្ថយភាពក្រីក្ររបស់ប្រជាពលរដ្ឋកម្ពុជា ផងដែរ។
ឆ្លៀតក្នុងឱកាសដ៏ឱឡារិកនេះ លោកជំទាវសូមផ្ដាំផ្ញើដល់វិស័យឯកជន បម្រើសេវា សុខាភិបាល ជាពិសេសមន្ទីរពេទ្យឯកជន ដែលកំពុងធ្វើប្រតិបត្តិការ ផ្ដល់សេវាលើការសង្គ្រោះពិនិត្យជំងឺជូនប្រជាជន សូមប្រកាន់ភ្ជាប់ នូវក្រមសីលធម៌ វិជ្ជាជីវៈ និងតម្កល់នូវទឹកចិត្ដ អាណិតស្រលាញ់អ្នកជំងឺ ដែលជាអតិថិជន មក ទទួល និង ប្រើប្រាស់សេវានៅមន្ទីរពេទ្យ និងគ្លីនិកនានា។
សូមបុគ្គលិកពេទ្យប្រើប្រាស់កាយវិការទន់ភ្លន់ សម្តីផ្អែមល្ហែម ចេះគួរសម សុភាពរាបសារ ដាក់អ្នកជំងឺ ដូចដែលទំនៀមទម្លាប់ដូនតាយើងបានប្រៀនប្រដៅ។ តាមពិត ការធ្វើ អាជីវកម្មគ្រប់ប្រភេទ គឺដើម្បីប្រាក់ចំណេញ ប៉ុន្ដែដោយឡែក ចំពោះអាជីវកម្ម លើវិស័យសុខាភិបាល គឺត្រូវមានតុល្យភាព រវាងប្រាក់ចំណេញ និង ការសង្គ្រោះជីវិតមនុស្ស ដែលទាមទារ ជំនាញវិជ្ជាជីវៈ បទពិសោធន៍ និងក្រមសីលធម៌។ ប្រសិទ្ធភាពនៃការព្យាបាលក៏អាចបានមកពីអាកប្បកិរិយា ទន់ភ្លន់ ទឹកចិត្ដ អាណិតអាសូរ ការផ្តល់កម្លាំងចិត្ត និងការលើកទឹកចិត្តដល់អ្នកជំងឺ និងភាពកក់ក្តៅដែលគ្រូពេទ្យផ្តល់ជូនអ្នកជំងឺផងដែរ។ ម្យ៉ាងទៀតសូមស្នើមន្ទីរពេទ្យទាំងអស់ ត្រូវថែរក្សាអនាម័យ ភាពស្អាតស្អំ គ្មានធូលី និងមេរោគ ជាពិសេស ត្រូវសំអាត សម្ភារៈបរិក្ខារពេទ្យ កម្រាលឥដ្ឋ បន្ទប់អ្នកជំងឺ និងទីធ្លាពេទ្យទាំងមូល ជាប្រចាំ។
ដូច្នេះ លោកជំទាវសូមលើកទឹកចិត្តដល់ថ្នាក់ដឹកនាំ ក្រុមគ្រូពេទ្យ និងបុគ្គលិកនៅទីនេះ សូមប្រកាន់យកគោលការណ៍សម្រាប់ការធ្វើធុរកិច្ច គឺ៖ សេវាល្អ គុណភាពល្អ អនាម័យ តម្លៃសមរម្យ និងក្រមសីលធម៌វិជ្ជាជីវៈ ដើម្បីធានាបានឧត្តមភាពប្រកួតប្រជែង។
ដោយមានកិច្ចសហការពីភាគី សឹង្ហបុរី ខរនឺរស្តូនអាស៊ានហែល (Cornerstone Asia Health) ផង លោកជំទាវផ្ទាល់ជឿជាក់ថា មន្ទីរពហុព្យាបាល និងសម្ភព អូរៀនដា នឹងទទួលបានការគាំទ្រពីអតិថិជនគ្រប់មជ្ឈដ្ឋាន ពង្រីកបានវិសាលភាពកាន់តែធំធេង។
មុននឹងបញ្ចប់ លោកជំទាវសូមជូនពរឲ្យដំណើរការនៃការពិនិត្យ ថែទាំ និង ព្យាបាលជំងឺ របស់មន្ទីរពហុព្យាបាលអរៀនដាប្រព្រឹត្តិទៅដោយរលូន និងទទួលបានជោគជ័យ៕
Source: Kampuchea Thmey Daily
0 Comments