ប្រធានាធិបតីស្រីលង្កាលោក Maithripala Sirisena បាននិយាយនៅថ្ងៃសុក្រថា ប៉ូលិសកំពុងស្វែងរកមនុស្សចំនួន១៤០នាក់ដែលគេជឿថាមានទំនាក់ទំនងជាមួយក្រុមរដ្ឋឥស្លាមដែលអះអាងទទួលខុសត្រូវចំពោះការបំផ្ទុះគ្រាប់បែកអត្តឃាតអំឡុងពិធីបុណ្យEasterថ្ងៃអាទិត្យលើព្រះវិហារគ្រិស្តនិងសណ្ឋាគារ។
ជនមូស្លីមនៅប្រទេសស្រីលង្កាត្រូវបានគេជំរុញឲ្យអធិស្ឋាននៅ ក្នុងផ្ទះនៅថ្ងៃសុក្រនិងកុំចូលវិហារឥស្លាមឬព្រះវិហារគ្រិស្តបន្ទាប់ពីសេវាស៊ើបការណ៍សម្ងាត់រដ្ឋបានព្រមានអំពីការវាយប្រហារគ្រាប់បែកក្នុងរថយន្តដែលអាចកើតមានចំពេលមានការភ័យខ្លាចអំពីអំពើហិង្សាសងសឹកចំពោះការបំផ្ទុះគ្រាប់បែកដែលបានសម្លាប់មនុស្សចំនួន២៥៣នាក់។
ស្ថានទូតអាមេរិកនៅប្រទេសស្រីលង្កាក៏បានជំរុញប្រជាពលរដ្ឋរបស់ខ្លួនឲ្យចៀសវាងកន្លែងគោរពបូជាផងដែរនៅចុងសប្ដាហ៍នេះបន្ទាប់ពីអាជ្ញាធរបានរាយការណ៍ថា អាចមានការវាយប្រហារបន្ថែមទៀតដែលកំណត់គោលដៅលើមជ្ឈមណ្ឌលសាសនា។ប្រទេសស្រីលង្កានៅតែមានភាពតក់ស្លុតបន្ទាប់ពីការវាយប្រហារបំផ្ទុះគ្រាប់បែកអត្តឃាតលើព្រះវិហារគ្រិស្ត៣កន្លែងនិងសណ្ឋាគារ៤កន្លែងដែលក៏បង្ករបួសដល់មនុស្សប្រហែល៥០០នាក់ផងដែរ។
យោធាបាននិយាយនៅថ្ងៃសុក្រថា ទាហានជិត១០,០០០នាក់ត្រូវ បានដាក់ ពង្រាយនៅទូទាំងរដ្ឋកោះមហាសមុទ្រឥណ្ឌាមួយនេះដើម្បីធ្វើការឆែកឆេរនិងផ្ដល់សន្តិសុខសម្រាប់មជ្ឈមណ្ឌលសាសនា។ការភ័យខ្លាចនៃអំពើហិង្សានិកាយសងសឹកបានជំរុញឲ្យសហគមន៍មូស្លីមភៀសខ្លួនចេញពីលំនៅដ្ឋានរបស់ពួកគេរួចទៅហើយចំពេលមានការភ័យខ្លាចអំពីការបំផ្ទុះគ្រាប់បែកនិងការបោសសម្អាតសន្តិសុខ។
All Ceylon Jamiyathul Ullama ដែលជាស្ថាប័នសាសនាឥស្លាមដ៏សំខាន់របស់ប្រទេសស្រីលង្កាបានជំរុញឲ្យជនមូស្លីមធ្វើការសូត្រធម៌នៅឯផ្ទះនៅថ្ងៃសុក្រក្នុងករណីមានតម្រូវការការពារគ្រួសារនិងទ្រព្យសម្បត្តិ។ ព្រះសង្ឃកាឌីណាល់ Malcolm Ranjith ក៏បានអំពាវនាវដល់បព្វជិតកុំឲ្យធ្វើការទេសនានៅព្រះវិហារគ្រិស្តផងដែររហូតដល់មានការជូនដំណឹងបន្ថែមទៀត។ លោកនិយាយថា “សន្តិសុខគឺសំខាន់ណាស់”។រហូតមកដល់ពេលនេះ ប៉ូលិសបានឃុំឃាំងមនុស្សយ៉ាងតិច៧៦នាក់រួមទាំងជនបរទេសមកពីប្រទេសស៊ីរីនិងអេហ្ស៊ីបផងដែរនៅក្នុងការស៊ើបអង្កេតរបស់ពួកគេ ។
ទោះបីជាយ៉ាងណាក៏ដោយ ក្រុមរដ្ឋឥស្លាមមិនបានផ្តល់ភស្តុតាងដើម្បីគាំទ្រការអះអាងរបស់ខ្លួនដែលថាខ្លួននៅពីក្រោយការវាយប្រហារនោះទេ។ ប្រសិនបើវាជាការពិតមែននោះ វានឹងក្លាយជាការវាយប្រហារដ៏អាក្រក់បំផុតមួយដែលធ្វើឡើងដោយក្រុមនេះនៅខាងក្រៅប្រទេសអ៊ីរ៉ាក់និងស៊ីរី៕ REUTERS
Source: Kampuchea Thmey Daily
0 Comments