អ្នកចាំទី អ៊ុំ សេរីរ័ត្ន របស់ក្រុមបាល់ទាត់ក្រសួងការពារជាតិ (ទ័ព) កំពុងមានបញ្ហារបួសសរសៃជើង ក្រោយបង្ហាញខ្លួនក្នុងពានរង្វាន់សម្តេចតេជោ ហ៊ុន សែន (Hun Sen Cup) ឆ្នាំ២០១៨ នាពេលកន្លងទៅ ហើយរបួសនេះតម្រូវឲ្យរូបគេសម្រាកព្យាបាលនិងវៈកាត់បានត្រឹមត្រូវទើបអាចចូលហ្វឹកហាត់ជាមួយមិត្តរួមក្រុមបានឡើងវិញ។
យោងតាមការបញ្ជាក់ពីសំណាក់សាមីខ្លួនបានអះអាងថា របួសសរសៃជើងនេះគឺកើតឡើងទៅលើរូបខ្លួនអំឡុងក្រោយជួយឲ្យក្រសួងការពារជាតិ ឈ្នះណាហ្គាវើល ដោយលទ្ធផល ៣-១ ឡើងវគ្គផ្តាច់ព្រ័ត្រពានរង្វាន់សម្តេចតេជោ ហ៊ុន សែន ឆ្នាំ២០១៨។ ប៉ុន្តែរបួសនេះមិនសូវជាធ្ងន់ពេក តែក្រោយមករូបគេបានហ្វឹកហាត់ក្នុងក្រុមក៏បត់ជង្គង់ធ្ងន់ធ្ងរតែម្តង។
អតីតកីឡាករជម្រើសជាតិកម្ពុជា រូបនេះបញ្ជាក់ថា «មកទល់ពេលនេះ ខ្ញុំអត់ទាន់អាចហាត់ខ្លាំងបានទេបង ទាំងលើទីលាន និង ការហាត់សាច់ដុំ ព្រោះរបួសខាងក្នុងនៅឈឺនៅឡើយ។ រាល់ថ្ងៃពេទ្យណែនាំឲ្យដើរ និង ធាក់កង់ឲ្យបានច្រើន ក៏ដូចជាធ្វើលំហាត់មួយចំនួន តាមពួកគាត់បានប្រាប់ ដើម្បីឲ្យឆាប់ជាសះស្បើយ តែក៏មិនប្រាកដពេលច្បាស់លាស់ដែរ យ៉ាងហោចក៏១ទៅ២ខែដែរ ទើបអាចចាប់ផ្ដើម Gym យកសាច់ដុំឡើងវិញ មុនចូលទីលានដូចធម្មតា»។
របួសនេះបានធ្វើឲ្យប៉ះពាល់កៅអីរបស់កីឡាករ អ៊ុំ សេរីរ័ត្ន ក្នុងក្រុមជម្រើសជាតិនាពេលខាងមុខដែលត្រៀមប្រកួតប្រចាំពានរង្វាន់ធំប្រចាំតំបន់អាស៊ាន AFF Suzuki Cup 2018។ រូបគេបានតាំងចិត្តថែរក្សាសុខភាពដើម្បីឲ្យបានជាសះស្បើយបានលឿន។ រូបគេត្រូវបានក្លិបដាក់ក្នុងអ្នកចាំទីដៃទី២ បន្ទាប់ពីបងប្រុសបង្កើតរបស់ខ្លួនគឺ អ៊ុំ វិចិត្រ ជាប់ឈ្មោះជាអ្នកចាំទីដៃទី១។
កីឡាករ អ៊ុំ សេរីរ័ត្ន វិវត្តន៍ខ្លួនចេញពីក្រុមយុវជនថ្នាលរបស់ក្រុមក្រសួងការពារជាតិ ហើយនៅឆ្នាំ២០១៣ រូបគេត្រូវបានលោក ទេព ឡុងរចនា គ្រូបង្វឹកនៅជំនាន់នោះចុះឈ្មោះក្នុងបញ្ជីក្រុមធំ ខណៈនៅឆ្នាំនោះដែរត្រូវបានក្លិបអាស៊ីអឺរ៉ុប ខ្ចីជើងពាក់កណ្ដាលរដូវកាល រូបគេធ្លាប់ជាប់ឈ្មោះក្នុងក្រុមជម្រើសជាតិកម្ពុជា គិតតាំងពីឆនាំ២០១៣ រហូតដល់ឆ្នាំ២០១៧ ថ្មីៗនេះផងដែរ។ អ៊ុំ សេរីរ័ត្ន ធ្លាប់ជួយក្រុមឈ្នះជើងឯកនៅឆ្នាំ២០១៦ ខណៈរូបគេធ្លាប់ឈ្នះស្រោមដៃមាសទាំងក្នុងលីគនិងពានរង្វាន់សម្ដេចតេជោ នៅឆ្នាំដំណាលគ្នានោះផងដែរ៕
Source: Kampuchea Thmey Daily
0 Comments