ភ្នំពេញ ៖ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម កាលពីរសៀលថ្ងៃទី២៥មេសា រួមនឹងក្រុមកាងារ ថ្នាក់ដឹកនាំក្រសួង បានអញ្ជើញ ចុះពិនិត្យ ប្រព័ន្ធធារាសាស្ត្រដំណាក់អំពិលការដ្ឋានសាងសង់ប្រព័ន្ធធារាសាស្ត្រ ដំណាក់ឈើក្រំ ស្រុកភ្នំក្រវាញ ខេត្តពោធិ៍សាត់ ដែលកំពុងដំណើរសាងសង់យ៉ាងសកម្ម។
ក្រសួងធនធានទឹកបានឲ្យដឹងថា បន្ទាប់ពីបានចុះពិនិត្យការដ្ឋានសាងសង់ប្រព័ន្ធធារាសាស្ត្រ លំហាច នៅខេត្តកំពង់ឆ្នាំងរួចមក នាថ្ងៃដដែលនេះ (ថ្ងៃទី២៥ ខែមេសា ឆ្នាំ២០១៩) លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងក្រុមការងារជាថ្នាក់ដឹកនាំក្រសួង អមដំណើរដោយលោកប្រធានមន្ទីរធនធានទឹក និងឧតុនិយម ខេត្តពោធិ៍សាត់ បានបន្តដំណើរចុះទៅពិនិត្យ៖១) ការធ្វើទំនើបកម្មប្រព័ន្ធបើក-បិទទ្វារទឹក ដំណាក់អំពិល និងប្រឡាយធ្វើអំពីបេតុងនៃប្រព័ន្ធធារាសាស្ត្រដំណាក់ អំពិល ស្ថិតក្នុងសង្កាត់លលក ស ក្រុងពោធិ៍សាត់។ ២) ការដ្ឋានសាងសង់ប្រព័ន្ធធារាសាស្ត្រ ដំណាក់ឈើក្រំ ស្រុកភ្នំក្រវាញ ខេត្តពោធិ៍សាត់។
សូមជម្រាបថា គម្រោងធ្វើទំនើបកម្មប្រព័ន្ធបើក-បិទទ្វារទឹកដំណាក់អំពិល និងប្រឡាយធ្វើអំពីបេតុងនៃប្រព័ន្ធធារាសាស្ត្រដំណាក់អំពិល ត្រូវបានអនុវត្តក្រោមឥណទានសម្បទានរបស់ជប៉ុន ក្នុងទឹកប្រាក់ចំនួនប្រមាណ ១,៥០ លានដុល្លាអាមេរិក សម្រាប់រយៈពេល ០២ ឆ្នាំ (២០១៨-២០១៩) និងបច្ចុប្បន្នការងារសម្រេចបាន ៩០ភាគរយ។ ដោយឡែក ការងារសាងសង់ប្រព័ន្ធធារាសាស្ត្រ ដំណាក់ឈើក្រំ ក្រោមប្រាក់កម្ចីនិងជំនួយឥតសំណង ចំនួន ៤៧.៧លានដុល្លាអាមេរិក របស់ធនាគារអភិវឌ្ឍន៍អាស៊ី ត្រូវអនុវត្តរយៈពេល ០៣ឆ្នាំ (២០១៧-២០១៩) ហើយរហូតមកដល់បច្ចុប្បន្ននេះ ការងារសម្រេចបានប្រមាណ ៣០ ភាគរយ។ គម្រោងនេះ ពេលសាងសង់រួច មានលទ្ធភាពស្រោចស្រពលើផ្ទៃដី ចំនួន ១៦ ១០០ហិកតា នៅរដូវវស្សា និងចំនួន៥០០០ ហិកតា នៅរដូវប្រាំង។
នៅពេលចុះពិនិត្យទីតាំងគម្រោងខាងលើ លោក រដ្ឋមន្ត្រី បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែង និងលទ្ធផលដែលក្រុមការងារសម្រេចបានរហូតមកដល់ពេលនេះ ព្រមទាំងបានណែនាំលើលក្ខណៈបច្ចេកទេសដែលត្រូវយកចិត្តទុកដាក់ដើម្បីពង្រឹងលើគុណភាពសំណង់ដែលកំពុងសាងសង់ សម្រាប់ការប្រើប្រាស់ជាប្រយោជន៍នាពេលបច្ចុប្បន្ន និងអនាគតយូរអង្វែងទៅមុខ៕
Source: Kampuchea Thmey Daily
0 Comments