ភ្នំពេញ ៖ ក្រុមចោរឆក់ទូរស័ព្ទគេនៅតាមផ្លូវសាធារណៈចំនួន២នាក់ ត្រូវបានសមត្ថកិច្ចនគរបាល បង្ក្រាបបានភ្លាមៗខណៈពួកគេកំពុងធ្វើសកម្មភាពឆក់យកទូរស័ព្ទពីស្ត្រីអ្នកដំណើរជនបរទេសម្នាក់មិនបានសម្រេច កាលពីល្ងាច ថ្ងៃទី២៥ ខែមេសា ឆ្នាំ២០១៩ នៅសង្កាត់ភ្នំពេញថ្មី ខណ្ឌសែនសុខ។
អត្តសញ្ញាណក្រុមជនសង្ស័យជាចោរ ដែលត្រូវបានគេឃាត់ខ្លួនខាងលើ ឈ្មោះ ធុន ថុល ហៅផល អាយុ៣០ឆ្នាំ គ្មានមុខរបរ ស្នាក់នៅផ្ទះជួលម្តុំភូមិទួលសង្កែ សង្កាត់ទួលសង្កែ ខណ្ឌឫស្សីកែវ និងម្នាក់ទៀត ឈ្មោះ ជឹម សុខ ហៅរតនា អាយុ២៣ឆ្នាំ គ្មានមុខរបរ មានទីលំនៅ ភូមិសុភី ឃុំសុភី ស្រុកបាទី ខេត្តតាកែវ។ ប៉ូលិសនិយាយថា មុនពេលសមត្ថកិច្ចបង្ក្រាបពួកគេ(ចាប់ខ្លួន) សមត្ថកិច្ចបានទទួលព័ត៌មានតាមវិទ្យុទាក់ទងមកថា មានករណីចោរឆក់ទូរស័ព្ទដៃពីស្ត្រីជនជាតិកូរ៉េម្នាក់តែមិនបានសម្រេច នៅមុខផ្សារទំនើបមៃក្រូ ផ្លូវលេខ១០០៣ ភូមិបាយ៉ាប សង្កាត់ភ្នំពេញថ្មី។ ដោយសារបានស្គាល់ភិនភាគម៉ូតូម៉ាកសង់ពាក់ស្លាកលេខ កណ្តាល 1O-4063 សមត្ថកិច្ចផ្នែកអន្តរាគមន៍សហការជាមួយនគរបាលប៉ុស្តិ៍ តាមបង្ក្រាបភិនភាគជនសង្ស័យជាចោរនោះបានភ្លាមៗ ប៉ុន្តែទៅតាមរកជនរងគ្រោះវិញមិនឃើញ និងក៏មិនមកដាក់ពាក្យបណ្តឹងដែរ។
ប៉ូលិសបានបញ្ជាក់ថា ទោះបីយ៉ាងណា ជនសង្ស័យទាំង២នាក់បានសារភាពថា ពួកគេពិតជាបានធ្វើសកម្មភាពឆក់យកទូរស័ព្ទពីស្ត្រីជនជាតិកូរ៉េម្នាក់នោះពិតមែននិងមានសាក្សីបានឃើញផ្ទាល់ភ្នែកនៅកន្លែងកើតហេតុនោះ។
ទោសទណ្ឌរបស់ក្រុមចោរទាំង២នាក់នេះមិនមែនត្រឹមតែមានទោសរឿងឆក់ទូរស័ព្ទគេប៉ុណ្ណោះទេ គឺថែមទាំងមានប្រើប្រាស់(សេពឬជក់) ថ្នាំញៀនខុសច្បាប់ថែមមួយករណីទៀត ដែលសមត្ថកិច្ចបានរកឃើញតាមរយៈការត្រួតពិនិត្យនូវល្បាយទឹកនោមរបស់ពួកគេដោយឧបករណ៍វិទ្យាសាស្ត្រម្យ៉ាង៕
Source: Kampuchea Thmey Daily
0 Comments