*ការឃោសនាបោះឆ្នោត នឹងចាប់ផ្តើមពីថ្ងៃទី១៧ ដល់ថ្ងៃទី២៤ ខែឧសភា ឆ្នាំ២០១៩ មន្ត្រីជាន់ខ្ពស់ គ.ជ.ប អំពាវនាវឲ្យសមត្ថកិច្ចពាក់ព័ន្ធ ចាត់វិធានការម៉ឺងម៉ាត់ ច្បាស់លាស់ និងប្រកបដោយប្រសិទ្ធភាព ដើម្បីធានាឲ្យសកម្មភាពឃោសនាប្រព្រឹត្តទៅដោយរលូន
ភ្នំពេញ ៖ លោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិបានអះអាងថា ថ្វីត្បិតតែស្ថានភាពសន្តិសុខ និងសណ្តាប់ធ្នាប់ទូទៅនៅកម្ពុជា មានលក្ខណៈល្អប្រសើរក៏ដោយ ប៉ុន្តែតាមព័ត៌មានដែលទទួលបាន និងផ្អែកតាមមូលដ្ឋានជាក់ស្តែងមួយចំនួន បានបង្ហាញថា ពួកឧទ្ទាមក្រៅច្បាប់នៅតែព្យាយាមប្រើប្រាស់គ្រប់ឧបាយកល ក្នុងការព្យាយាមប៉ុនប៉ងផ្ដួលរំលំរដ្ឋាភិបាលស្របច្បាប់ ដណ្ដើមអំណាច ផ្ទុយពីគោលការណ៍នៃលទ្ធិប្រជាធិបតេយ្យ ដែលមិនអាចអត់អោនឲ្យបានឡើយ។
នាយឧត្តមសេនីយ៍ សន្តិបណ្ឌិត នេត សាវឿន មានប្រសាសន៍បែបនេះ ខណៈចូលរួមជាអធិបតីនៅក្នុងកិច្ចប្រជុំផ្សព្វផ្សាយសេចក្តីណែនាំរួម ស្ដីពីសកម្មភាព និងការរៀបចំភ្នាក់ងារសន្តិសុខបោះឆ្នោត ការពារការបោះឆ្នោតជ្រើសរើសក្រុមប្រឹក្សា រាជធានី ខេត្ត ក្រុង ស្រុក ខណ្ឌ អាណត្តិទី៣ និងការពិនិត្យបញ្ជីឈ្មោះ ចុះឈ្មោះបោះឆ្នោតឆ្នាំ២០១៩ កាលពីព្រឹកថ្ងៃទី២៦ ខែមេសា ឆ្នាំ២០១៩ នៅសាលប្រជុំក្រសួងមហាផ្ទៃ។ ដែលកិច្ចប្រជុំនេះ មានការអញ្ជើញចូលរួមពី លោកនាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត (គ.ជ.ប) និងមានការចូលរួមពីស្ថាប័នពាក់ព័ន្ធជាច្រើន ដូចជា នគរបាល កងរាជអាវុធហត្ថ កងយោធពលខេមរភូមិន្ទ តំណាងគណបក្សនយោបាយ សង្គមស៊ីវិល និងអ្នកសារព័ត៌មានយ៉ាងច្រើន។
លោក ទេព នីថា បានលើកឡើងថា គិតត្រឹមថ្ងៃទី២៦ ខែមេសា ឆ្នាំ២០១៩ ដំណើរការរៀបចំការបោះឆ្នោតជ្រើសរើសក្រុមប្រឹក្សាអាណត្តិទី៣ ឆ្នាំ២០១៩ បានឆ្លងកាត់២ដំណាក់កាលរួចមកហើយ ដែលក្នុងនោះរួមមាន ការចុះឈ្មោះអ្នកបោះឆ្នោត និងការចុះបញ្ជីគណបក្សនយោបាយឈរឈ្មោះបោះឆ្នោត ដែលបានដំណើរការទៅដោយរលូន ពុំមានបញ្ហាអសន្តិសុខអ្វីកើតឡើងនោះឡើយ។ លោកបន្តថា នៅពេលខាងមុខនេះ គឺជាដំណាក់កាលឃោសនាបោះឆ្នោត ដែលមានរយៈពេល៨ថ្ងៃ ដែលតម្រូវឲ្យមានការគ្រប់គ្រង និងសម្របសម្រួលឲ្យបានល្អ ដើម្បីឲ្យគណបក្សនយោបាយ និងបេក្ខជនធ្វើការផ្សព្វផ្សាយគោលនយោបាយ និងកម្មវិធីនយោបាយរបស់ខ្លួនដល់អ្នកបោះឆ្នោត។
តាមលោក ទេព នីថា ការឃោសនាបោះឆ្នោត និងត្រូវចាប់ដំណើរការពីថ្ងៃទី១៧ ដល់ថ្ងៃទី២៤ ខែឧសភា ឆ្នាំ២០១៩ ហើយតាមនីតិវិធីឃោសនាបោះឆ្នោត គ្រប់សកម្មភាពឃោសនារបស់គណបក្សនយោបាយត្រូវចាប់ផ្ដើមពីម៉ោង៦ព្រឹកដល់ម៉ោង១០យប់។ សកម្មភាពឃោសនារបស់គណបក្សនយោបាយត្រូវឈប់សម្រាកនៅចន្លោះពីម៉ោង១០យប់ ដល់ម៉ោង៦ព្រឹក ហើយចំពោះសកម្មភាពឃោសនា ដោយឧបករណ៍បំពង់សំឡេងត្រូវហាមឃាត់ចាប់ពីម៉ោង ១២ថ្ងៃត្រង់ ដល់ម៉ោង២រសៀល ហាមឃាត់នៅក្បែរមន្ទីរពេទ្យ និងសាលារៀន ឬគ្រឹះស្ថានសិក្សាក្នុងម៉ោងសិស្សកំពុងសិក្សា ហើយការឃោសនាបោះឆ្នោត ត្រូវបញ្ចប់២៤ ម៉ោងមុនថ្ងៃបោះឆ្នោត។
លោក ទេព នីថា បានអះអាងថា តាមបទពិសោធន៍កន្លងមក ក្នុងអំឡុងពេលឃោសនាបោះឆ្នោត មានរឿងរ៉ាវជាច្រើន គួបផ្សំ នឹងសភាពការណ៍ ដែលកើតឡើងដូចជាបាតុភាពផ្សេងៗ ក្នុងសង្គម ឃាតកម្ម អំពើហិង្សាក្នុងគ្រួសារ ទំនាស់ដីធ្លី រួមនឹងឧបទ្ទវហេតុផ្សេងៗទៀត ត្រូវបានគណបក្សនយោបាយមួយចំនួនយកធ្វើជាប្រធានបទឃោសនា ដើម្បីផលប្រយោជន៍នយោបាយ នាំឲ្យមានទំនាស់ និងការប្ដឹងផ្ដល់គ្នា រំខានដល់ដំណើរការឃោសនាបោះឆ្នោត ដែលបញ្ហានេះ តម្រូវឲ្យចាត់វិធានការម៉ឺងម៉ាត់ច្បាស់លាស់ និងប្រកបដោយប្រសិទ្ធភាព ដើម្បីធានាឲ្យសកម្មភាពឃោសនាប្រព្រឹត្តទៅដោយរលូន។
ដោយឡែកទាក់ទងទៅនឹងការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០១៩ លោក ទេព នីថា បានលើកឡើងថា គ.ជ.ប បាននឹងកំពុងរៀបចំការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០១៩ ដែលបានដំណើរការបិទផ្សាយបញ្ជីឈ្មោះ ទីតាំងការិយាល័យចុះឈ្មោះបោះឆ្នោត និងការិយាល័យបោះឆ្នោត និងបញ្ជីបោះឆ្នោតចុងក្រោយ ដែលត្រូវប្រើប្រាស់ ដើម្បីធ្វើបច្ចុប្បន្នភាពបញ្ជីបោះឆ្នោតឆ្នាំ២០១៩ ហើយនៅសល់តែបួនថ្ងៃទៀតប៉ុណ្ណោះ ក្រុមចុះឈ្មោះបោះឆ្នោត គ.ជ.ប និងចាប់ផ្ដើមសកម្មភាពការងាររបស់ខ្លួនដោយចាប់ពីថ្ងៃទី០១ ដល់ថ្ងៃទី២២ ខែឧសភា ឆ្នាំ២០១៩ នៅតាមការិយាល័យចុះឈ្មោះបោះឆ្នោត ដែលមានទីតាំងនៅសាលាឃុំ សង្កាត់ និងនៅតាមភូមិមួយចំនួនក្នុងឃុំ សង្កាត់នីមួយៗ។
ចំណែកលោកនាយឧត្តមសេនីយ៍ សន្តិបណ្ឌិត នេត សាវឿន បានមានប្រសាសន៍ថា ការបោះឆ្នោតជ្រើសរើសក្រុមប្រឹក្សា អាណត្តិទី៣ ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០១៩ ដែលនឹងប្រព្រឹត្តទៅនៅពេលខាងមុខនេះ គឺជាព្រឹត្តិការណ៍ប្រវត្តិសាស្ត្រ ដែលមានសារៈសំខាន់ និងមានសារប្រយោជន៍សម្រាប់ប្រទេសកម្ពុជា ហើយព្រឹត្តិការណ៍នយោបាយនេះ ក៏ជាសក្ខីកម្មឆ្លុះបញ្ចាំងឲ្យឃើញពីការអភិវឌ្ឍទៅមុខប្រកបដោយភាពរឹងមាំ និងនិរន្តរភាព នៃការអនុវត្តលទ្ធិប្រជាធិបតេយ្យ ការគោរពសិទ្ធិមនុស្ស និងការពង្រឹងនីតិរដ្ឋនៅកម្ពុជា។ ហេតុនេះការការពារសន្តិសុខសុវត្ថិភាព នៅក្នុងព្រឹត្តិការណ៍នេះ គឺជាកត្តាអាទិភាព ដែលគណៈបញ្ជាការសន្តិសុខអចិន្ត្រៃយ៍សម្រាប់ការបោះឆ្នោត និងគណៈកម្មាធិការជាតិរៀបចំការបោះឆ្នោតបានរួមគ្នារៀបចំឡើងនូវសេចក្តីណែនាំមួយ ដើម្បីធ្វើឲ្យបានសម្រេចនូវគោលបំណងសំខាន់ៗ ដែលមានដូចជាការចាត់វិធានការ ទប់ស្កាត់ឧបាយកលផ្សេងៗ និងការប៉ុនប៉ងបំផ្លិចបំផ្លាញ ធ្វើឲ្យរាំងស្ទះដល់ដំណើរការរៀបចំការបោះឆ្នោតជ្រើសរើសសក្រុមប្រឹក្សា អាណត្តិទី៣ នៅពេលខាងមុខ តាមគ្រប់រូបភាព និងធានាឲ្យបាន នូវបរិយាកាសអព្យាក្រឹត ដើម្បីការបោះឆ្នោត និងការចុះឈ្មោះបោះឆ្នោត ប្រព្រឹត្តទៅដោយសេរី ត្រឹមត្រូវ និងយុត្តិធម៌ តាមគោលការណ៍លទ្ធិប្រជាធិបតេយ្យ ប្រកបដោយសុវត្ថិភាព គ្មានការគំរាមកំហែង គ្មានការបំភិតបំភ័យ និងអំពើហិង្សា។ ព្រមទាំងផ្ដល់សេវាសន្តិសុខ ស្មើភាពគ្នា ចំពោះមុខច្បាប់ ជូនអ្នកបោះឆ្នោត ក៏ដូចជាបេក្ខជន វាគ្មិនគណបក្សនយោបាយ ដែលឈរឈ្មោះបោះឆ្នោត ប្រជាពលរដ្ឋដែលមានសិទ្ធិបោះឆ្នោត អញ្ជើញទៅពិនិត្យបញ្ជីឈ្មោះ ក៏ដូចជាចុះឈ្មោះបោះឆ្នោត ទាំងអ្នកសង្កេតការណ៍ជាតិ អន្តរជាតិ ដែលបានចូលរួមសង្កេតការណ៍។
តាមនាយឧត្តមសេនីយ៍ នេត សាវឿន រហូតមកដល់ពេលនេះរាជាណាចក្រកម្ពុជា នៅតែរក្សាបាននូវសន្តិសុខ សុវត្ថិភាព ធានាបាននូវស្ថិរភាព សន្តិសុខ ដោយបង្ការ ទប់ស្កាត់បាននូវអំពើភេរវកម្ម។ ជាពិសេសយើងបានសហការរួមគ្នា បំពេញភារកិច្ច ប្រកបដោយស្មារតីទទួលខុសត្រូវខ្ពស់ ក្នុងកិច្ចការពារថែរក្សាសន្តិសុខ និងសណ្តាប់ធ្នាប់ជូនប្រជាពលរដ្ឋទូទាំងប្រទេស ក៏ដូចជាបម្រើឲ្យព្រឹត្តិការណ៍ជាតិ អន្តរជាតិធំៗ ទទួលបានជោគជ័យយ៉ាងត្រចះត្រចង់។
នាយឧត្តមសេនីយ៍ នេត សាវឿន បញ្ជាក់ទៀតថា ថ្វីត្បិតតែស្ថានភាពសន្តិសុខ និងសណ្តាប់ធ្នាប់ទូទៅ មានលក្ខណៈល្អប្រសើរក៏ដោយ ប៉ុន្តែយើងមិនអាចវាយតម្លៃដោយអត្តនោម័តិ ចំពោះស្ថានការណ៍នយោបាយមួយឡើយ។ “តាមព័ត៌មានដែលយើងទទួលបាន និងផ្អែកតាមមូលដ្ឋានជាក់ស្តែងមួយចំនួន បានបង្ហាញឲ្យឃើញថា ពួកឧទ្ទាមក្រៅច្បាប់នៅតែព្យាយាមប្រើប្រាស់គ្រប់ឧបាយកល ក្នុងការព្យាយាមប៉ុនប៉ងផ្ដួលរំលំរដ្ឋាភិបាលស្របច្បាប់ ដណ្ដើមយកអំណាច ផ្ទុយពីគោលការណ៍នៃលទ្ធិប្រជាធិបតេយ្យ”។
ទន្ទឹមគ្នានេះ សកម្មភាពបទល្មើសព្រហ្មទណ្ឌនៅតែកើតមានជាបន្តបន្ទាប់ ដូចជាករណីលួច ឆក់ ប្លន់ អំពើឃាតកម្ម អំពើហិង្សាក្នុងគ្រួសារ នៅក្នុងសង្គម ព្រមទាំងសកម្មភាពអនាធិបតេយ្យ ឬបញ្ហាទំនាស់ផ្សេងៗជាដើម ដែលសកម្មភាពទាំងនេះ ទោះបីជាស្ថិតនៅក្នុងហេតុផលណាក៏ដោយ ក៏បានជះឥទ្ធិពលដល់បរិយាកាសសន្តិសុខសណ្តាប់ធ្នាប់សង្គមផង និងធ្វើឲ្យមានភាពអាប់អួរ ចំពោះស្ថានភាពសន្តិសុខនយោបាយផងដែរ។
ដោយផ្អែកទៅលើហេតុផលខាងលើនេះ នាយឧត្តមសេនីយ៍ នេត សាវឿន បានអះអាងថា ទើបគណៈបញ្ជាការសន្តិសុខអចិន្ត្រៃយ៍សម្រាប់ការបោះឆ្នោត និងគ.ជ.បបានឯកភាព ដាក់ចេញនូវការណែនាំ ឲ្យអគ្គលេខាធិការដ្ឋានធ្វើការផ្សព្វផ្សាយជាបន្ទាន់នូវសេចក្តីណែនាំស្ដីពីសកម្មភាព និងការរៀបចំភ្នាក់ងារសន្តិសុខបោះឆ្នោតនេះ៕
Source: Kampuchea Thmey Daily
0 Comments