នគរបាលគ្រប់គ្រងអាវុធគ្រឿងផ្ទុះ និងអគ្គិភ័យ សហការជាមួយរដ្ឋបាលក្រុងសិរីសោភ័ណ ចុះអប់រំផ្សព្វផ្សាយណែនាំដល់អាជីវករនៅផ្សាចំការគរការប្រើប្រាស់បំពង់ពន្លត់អគ្គិភ័យ

Cambodia News April 05, 2019

បន្ទាយមានជ័យ ៖ នៅព្រឹកថ្ងៃទី៥ ខែមេសា ឆ្នាំ២០១៩នេះ នៅបរិវេណផ្សារចំការគរ ស្ថិតក្នុងភូមិផ្សារថ្មី២ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ស្នងការដ្ឋាននគរបាលខេត្តបន្ទាយមានជ័យ ដឹកនាំដោយ លោកវរសេនីយ៍ឯក ប៊ុន ផេង ស្នងការរងនគរបាលខេត្ត ទទួលការងារគ្រប់គ្រងអាវុធគ្រឿងផ្ទុះ និងអគ្គិភ័យ តំណាងឲ្យលោកឧត្ដមសេនីយ៍ទោ អាត់ ខែម ស្នងការនគរបាលខេត្ត បានសហការជាមួយរដ្ឋបាលក្រុងសិរីសោភ័ណ ដឹកនាំដោយ លោក នាង ហាវ អភិបាលរងក្រុងសិរីសោភ័ណ តំណាងឲ្យ លោក ហ៊ឹល រ៉ាយ៉ា អភិបាលក្រុងសិរីសោភ័ណ បានចុះអប់រំផ្សព្វផ្សាយណែនាំដល់អាជីវករ នៅផ្សាចំការគរ ហៅផ្សារថ្មី ក្រុងសិរីសោភ័ណ អំពីវិធានការបង្ការ ការពារករណីអគ្គិភ័យ ដែលតែងតែកើតមានឡើងក្នុងក្រុងសិរីសោភ័ណជាញឹកញាប់ និងបានប្រាប់ពីរបៀប នៃការប្រើប្រាស់បំពង់ពន្លត់អគ្គិភ័យជាដើម។

លោកវរសេនីយ៍ឯក ប៊ុន ផេង ប្រាប់អ្នកព័ត៌មានឲ្យដឹងថា តាមការអំពាវនាវរបស់ក្រសួងមហាផ្ទៃលេខ៦៤០ សជណ សេចក្ដីណែនាំរបស់អគ្គស្នងការនគរបាលជាតិលេខ០០៣ សណន ដោយមានការចង្អុលបង្ហាញ ពីលោកឧត្ដមសេនីយ៍ទោ អាត់ ខែម ស្នងការនគរបាលខេត្ត លោកបានដឹកនាំក្រុមគ្រូបង្គោល ការិយាល័យបង្ការពន្លត់អគ្គិភ័យ និងសង្គ្រោះ ចុះផ្សព្វផ្សាយនូវវិធានការបង្ការ គ្រោះថ្នាក់អគ្គិភ័យ និងវិធីសង្គ្រោះ ជម្លៀសខ្លួនចេញពីកន្លែងមានគ្រោះអគ្គិភ័យ បឋម នៅតាមបណ្ដាគោលដៅនានា ក្នុងទីប្រជុំជនក្រុង ស្រុកទាំង៩ ក្នុងភូមិសាស្ត្រខេត្ត និងធ្វើការអំពាវនាវដល់មហាជន អាជីវករ អាជ្ញាធរ គ្រប់ជាន់ថ្នាក់ នាឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខនេះឲ្យមានការប្រុងប្រយ័ត្នខ្ពស់នូវគ្រោះថ្នាក់អគ្គិភ័យ ណែនាំ បង ប្អូន កូន ចៅ កុំឲ្យលេងច្រកទឹកដាក់ថង់ ឬបឺត ប៉ោងដាក់ទឹកគប់គ្នា ដែលបង្កឲ្យមានគ្រោះថ្នាក់ដល់អ្នកដទៃ និងប៉ះពាល់ដល់កិត្តិយស សេចក្ដីថ្លៃថ្នូររបស់ជាតិយើង។

លោកសង្ឃឹមថា ក្រោយពីចេញសេចក្ដីប្រកាសនេះហើយ បងប្អូនប្រជាពលរដ្ឋទាំងអស់ និងយកទៅអនុវត្តឲ្យបានគ្រប់ៗគ្នាឲ្យបានល្អ៕