ភ្នំពេញ ៖ អ្នកនាំពាក្យក្រសួងការពារជាតិ នាយឧត្ដមសេនីយ៍ ឈុំ សុជាត បានអះអាងថា មានមានជនទុច្ចរិតមួយចំនួនបានបង្កើតហ្វេសប៊ុក (Facebook) ក្លែងបន្លំ ដោយប្រើប្រាស់រូបទាហាន ហើយវាយប្រហារលើរាជរដ្ឋាភិបាល ជាមួយគ្នានោះ អ្នកនាំពាក្យបានស្នើឲ្យស្ថាប័នមានសមត្ថកិច្ចចាត់វិធានការតាមផ្លូវច្បាប់ ចំពោះជនក្លែងបន្លំ Facebook។ នេះបើតាមសេចក្ដីប្រកាសព័ត៌មាន ចុះថ្ងៃទី០៤ ខែមេសា ឆ្នាំ២០១៩។
តាមរយៈសេចក្ដីប្រកាសរបស់ខ្លួន អ្នកនាំពាក្យក្រសួងការពារជាតិបានលើកឡើងថា នាពេលថ្មីៗនេះ មានជនទុច្ចរិតមួយចំនួនបានបង្កើត Facebook បន្លំយករូបនាយទាហានមួយចំនួន ទៅប្រើប្រាស់ ដើម្បីបង្ហោះរូបភាព និងខ្លឹមសារ ញុះញង់វាយប្រហារមកលើរាជរដ្ឋាភិបាលកម្ពុជា និងបានចាត់ទុកថា សកម្មភាពទាំងនេះ គឺជាអំពើខុសច្បាប់ ដែលមិនអាចអត់ឱនឲ្យបាន ហើយសូមស្នើឲ្យស្ថាប័ន មានសមត្ថកិច្ច ចាត់វិធានការតាមផ្លូវច្បាប់ឲ្យបានម៉ឺងម៉ាត់បំផុត។
តាមនាយឧត្ដមសេនីយ៍ ឈុំ សុជាត បញ្ជាក់ថា មកដល់ពេលនេះ កងយោធពលខេមរភូមិន្ទ រក្សាជំហរស្មោះត្រង់ ការពាររាជរដ្ឋាភិបាលស្របច្បាប់ និងសុខសន្តិភាពរបស់ប្រជាពលរដ្ឋ។
កងយោធពលខេមរភូមិន្ទ ប្រឆាំងដាច់ខាតចំពោះការប៉ុនប៉ង បង្កភាពវឹកវរដល់សង្គម ក៏ដូចជាការបំផ្លាញដល់សន្តិភាពរបស់ប្រទេស ហើយអំពាវនាវដល់កងយោធពលខេមរភូមិន្ទទាំងអស់ ឲ្យមានការប្រុងប្រយ័ត្ន ក្នុងការប្រើប្រាស់បណ្តាញសង្គមនានា ដោយរក្សាការពារសន្តិសុខ ការងារសម្ងាត់របស់អង្គភាព។ ជាមួយគ្នានោះ ក៏បានអំពាវនាវដល់ប្រជាពលរដ្ឋទាំងអស់ ត្រូវមានទំនុកចិត្តមកលើ កងយោធពលខេមរភូមិន្ទ ហើយសូមកុំចាញ់ឧបាយកល ក្រុមទុច្ចរិតទាំងនោះឲ្យសោះ។
គួររំលឹកថា នេះមិនមែនជាលើកទីមួយទេ ដែលក្រុមទុច្ចរិតប្រើប្រាស់បណ្តាញហ្វេសប៊ុក ដោយដាក់រូបទាហាន ហើយវាយប្រហារលើថ្នាក់ដឹកនាំ ក៏ដូចជារាជរដ្ឋាភិបាល ដែលសកម្មភាពទាំងនោះ ត្រូវបានគេមើលឃើញថា បានកើតឡើងស្របពេលដែល លោក សម រង្ស៊ី បានប្រកាសចេញនូវចលនាសង្គ្រោះជាតិ នៅសហរដ្ឋអាមេរិក ដែលពេលនេះ លោក សម រង្ស៊ី ប្រកាសធ្វើចលនាទៅលើកងទ័ព ដើម្បីប្រឆាំងរដ្ឋាភិបាលកម្ពុជា ហើយក្រោយការប្រកាសបែបនេះ ក៏មានសកម្មភាពក្លែងបន្លំ Facebook កងទ័ព ហើយវាយប្រហារលើរដ្ឋាភិបាល ជាបន្តបន្ទាប់៕
Source: Kampuchea Thmey Daily
0 Comments