ការស្ទង់មតិ​ ៖ ​គណបក្សប្រឆាំង​អូស្ត្រាលី ​កំពុង​ស្ថិតនៅ​លើផ្លូវ​ឆ្ពោះទៅរក​ការ​ឈ្នះឆ្នោត​

ការស្ទង់មតិ​ចំនួន​ពីរ​ បានបង្ហាញ​នៅ​ថ្ងៃ​ចន្ទ​ថា គណបក្សប្រឆាំង​អូស្ត្រាលី​គឺ​គណបក្ស​ការងារ​កំពុងមាន​សង្ឃឹម​ទទួល​ជ័យជម្នះ​ក្នុងការ​បោះឆ្នោត​ថ្នាក់ជាតិ​ ដែល​គ្រោង​នឹង​រៀបចំឡើង​ក្នុង​ខែឧសភា ​ប៉ុន្តែ​ការនាំ​មុខ​របស់ខ្លួន​មាន​គម្លាត​តិចតួច​ណាស់​លើ​រដ្ឋាភិបាលចម្រុះ​អភិរក្សនិយម​។​

ការស្ទង់មតិ Newspoll ដែល​ធ្វើឡើង​សម្រាប់​កាសែត​អូស្ត្រាលី​បានបង្ហាញ​ថា គណបក្ស​ការងារ​បាន​នាំ មុខ​រដ្ឋាភិបាលចម្រុះ​ដោយ​សំឡេង​៥២​ទល់​៤៨​លើ​មូលដ្ឋាន​គណបក្ស​ពីរ​ប៉ុន្តែ​វា​បាន​ធ្លាក់ចុះ​ពី​៥៤​មក​៤៦​សំឡេង​នៅក្នុង​ការស្ទង់មតិ​ចុងក្រោយ​កាលពី​ខែមីនា​។​

ការស្ទង់មតិ​មួយទៀត​របស់ Ipsos ដែល​ចេញផ្សាយ​ដោយ​កាសែត Sydney Morning Herald បានបង្ហាញ​ថា គណបក្ស​ការងារ​កំពុង​នាំមុខ​៥៣​ទល់នឹង​៤៧​សំឡេង​។​
​នៅ​សប្តាហ៍​នេះ លោកនាយក​រដ្ឋមន្ត្រី Scott Morrison ត្រូវបាន​គេ​រំពឹងថា​នឹង​អំពាវនាវ​ឲ្យ​រៀបចំ​ការបោះឆ្នោត​មួយ​ដែល​ទំនងជា​នឹងធ្វើ​ឡើង​នៅ​ថ្ងៃទី​១១​ខែឧសភា​ឬ​ថ្ងៃទី​១៨​ខែឧសភា​។​

លោក Morrison បាន​ប្រាប់​ក្រុម​អ្នកយកព័ត៌មាន​កាលពី​ថ្ងៃអាទិត្យ​ថា “​ការបោះឆ្នោត​នឹងត្រូវ​បាន​អំពាវ នាវ​នៅ​ខែមេសា​ហើយ​ការបោះឆ្នោត​នឹង​ប្រព្រឹត្តទៅ​នៅ​ខែឧសភា​។ យើង​មិន​ធ្វើបែបនេះ​ដោយ​ប្រញាប់​ទេ​ហើយ​យើង​មិន​ធ្វើ​វា​ដោយ​ការពន្យារពេល​ឡើយ​”​។

បើទោះបីជា​មានការ​នាំមុខ​ដោយ​គណបក្ស​ការងារ​នៅក្នុង​ការស្ទង់មតិ​កាលពី​ឆ្នាំមុន​ក៏ដោយ​ក៏​លោក Morrison នៅតែ​ជា​នាយករដ្ឋមន្ត្រី​ដែល​គេ​ពេញចិត្ត​ជាង​មេដឹកនាំ​គណបក្ស​ការងារ​លោក Bill Shorten​។​

Newspoll បាន​ស្ទង់​មតិ​អ្នកបោះឆ្នោត​ចំនួន​១,៧៩៩​នាក់​នៅ​ទូទាំងប្រទេស​ចាប់ពី​ថ្ងៃទី​៤​ដល់​ថ្ងៃទី​៦​ខែមេសា​បន្ទាប់ពី​ការបញ្ចេញ​កញ្ចប់​ថវិកា​របស់​រដ្ឋាភិបាល​នៅ​ថ្ងៃទី​២​ខែមេសា​និង​ការឆ្លើយតប​របស់​គណ​បក្ស​ការងារ​នៅ​ពីរ​ថ្ងៃ​ក្រោយមក​។​

ចំណែក​ការស្ទង់មតិ​របស់ Ipsos បាន​ស្ទាបស្ទង់​មតិ​អ្នកបោះឆ្នោត​ចំនួន​១,២០០​នាក់​ចាប់ពី​ថ្ងៃទី​៣​ដល់​ថ្ងៃទី​៦​ខែមេសា​ហើយ​មាន​កំហុសឆ្គង​២,៩​ភាគរយ​៕ REUTERS

​

Source: Kampuchea Thmey Daily