ភ្នំពេញ ៖ តាមកម្មវិធីគ្រោងទុក នាថ្ងៃទី០៨ ខែមេសា ឆ្នាំ២០១៩នេះ ក្រុមប្រឹក្សាជំនុំជម្រះតុលាការកំពូល ដែលមានសមាសភាពចៅក្រម៩រូប នឹងបើកសវនាការលើកទី២ ដើម្បីកាត់ទោសមេខ្លោងផលិតគ្រឿងញៀនដ៏ល្បីម្នាក់ តាំងពីឆ្នាំ២០០៧មកម្ល៉េះ។
ប្រភពព័ត៌មានពីតុលាការកំពូលបានឲ្យដឹងថា សវនាការនេះ ត្រូវលើកពេលដោយមិនកំណត់ទៅវិញ ដោយសារខាងពន្ធនាគារមិនទទួលបានដីកាបង្គាប់ឲ្យនាំជនត្រូវចោទមកតុលាការ។ រឿងក្ដីឡាំ សុខខេង ឡាំ គឹមលាង និងបក្សពួក ត្រូវបានតុលាការកំពូលកាត់ទោសម្ដងរួចមកហើយ តែជនត្រូវចោទកើតទុក្ខមិនសុខចិត្ត ទើបឲ្យមេធាវីរបស់គេប្ដឹងសារទុក្ខ ទើបការកាត់ទោសលើកទី២ ត្រូវមានចៅក្រម៩រូបដើម្បីបើកសវនាការ។
សូមរំលឹកថា តាំងពីឆ្នាំ២០០៧ , ២០០៨ តុលាការថ្នាក់ក្រោមបានកាត់ទោស និងផ្ដន្ទាទោសឈ្មោះ ឡាំ គឹមលាង ឡាំ សុខខេង ដាក់ពន្ធនាគារអស់មួយជីវិត ប៉ុន្តែឧក្រិដ្ឋជនគ្រឿងញៀននេះមិនសុខចិត្ត ទើបប្ដឹងឡើងសាលាឧទ្ធរណ៍ និងតុលាការជាបន្តបន្ទាប់ទៀត។
ជនត្រូវចោទ ឈ្មោះ ឡាំ សុខខេង អាយុ៥១ឆ្នាំ ត្រូវបានចាប់ខ្លួននៅថ្ងៃទី០១ ខែសីហា ឆ្នាំ២០០៧។
ឈ្មោះ ម៉ៅ សុគុណ ហៅជ្រូក ភេទប្រុស អាយុ៣៦ឆ្នាំ ចាប់ខ្លួនបាននៅថ្ងៃទី៥ ខែតុលា ឆ្នាំ២០០៧ ,។ ឈ្មោះ គឹម ហាន ភេទប្រុស អាយុ៣៩ឆ្នាំ។ ឈ្មោះ ញឺម សំបូរ ហៅហីម ហៅខ្មៅ ភេទប្រុស អាយុ ២៥ឆ្នាំ ចាប់ខ្លួននៅថ្ងៃទី១៥ ខែតុលា ឆ្នាំ២០០៧។ និងឈ្មោះ គ្រុយ សេងឡេង ភេទប្រុស អាយុ៥៤ឆ្នាំ ចាប់ខ្លួន ថ្ងៃទី២៥ ខែធ្នូ ឆ្នាំ២០០៨។
ក្រៅពីពាក់ព័ន្ធការផលិតគ្រឿងញៀន ក្រុមឧក្រិដ្ឋជនចាប់ជំរិតខាងលើ គឺជាសមាជិក ក្រុម ឧក្រិដ្ឋជនស្ថិតនៅក្នុងក្រុមរបស់ ឈ្មោះ សោម ណារ៉ា ហៅ អារ៉ាស្មាច់ ដែលជាមេខ្លោងធំ ល្បីឈ្មោះនៅ ក្នុងឆ្នាំ១៩៩៨-១៩៩៩ ដែលត្រូវបានកម្លាំងសមត្ថកិច្ចបង្ក្រាបបាញ់សម្លាប់កន្លងមក ហើយលុះដល់ឆ្នាំ២០០៧ ឈ្មោះ ឡាំ គីម លាង ហៅ ឡាយ សេង នេះ ក៏បានទៅរកស៊ី ផលិត និងជួញដូរ គ្រឿងញៀន ជាមួយមេខ្លោង ឈ្មោះ ឡាំ សុខ ខេង (ដែលត្រូវជាក្មួយ របស់ ឈ្មោះ ឡាំ គីមលាង) ដែលត្រូវកម្លាំងកងរាជអាវុធហត្ថបង្ក្រាបបាន ហើយដកហូតវត្ថុតាង ពាក់ព័ន្ធការផលិតគ្រឿងញៀន ជាច្រើន ជាពិសេសម៉ាស៊ីនផលិតគ្រឿងញៀនដ៏ទំនើប។
តាមការវាយតម្លៃពីមន្ត្រី នៃមន្ទីរគ្រឿងញៀន ក្រសួងមហាផ្ទៃបានបញ្ជាក់ថា ម៉ាស៊ីននេះផលិត ថ្នាំញៀន ក្នុងមួយម៉ោងជាងមួយម៉ឺនគ្រាប់ឯណោះ៕
Source: Kampuchea Thmey Daily
0 Comments