ភ្នំពេញ ៖ នគរបាលខណ្ឌសែនសុខ បានឃាត់ខ្លួនបុរស៤នាក់ ពីបទក្លែងបន្លំធ្វើជាសង្ឃ ឆបោកគេដើរបិណ្ឌបាតរកលុយតាមផ្លូវសាធារណៈ ដែលប្រព្រឹត្តជាក់ស្តែង កាលពីព្រឹកថ្ងៃទី៦ ខែឧសភា ឆ្នាំ២០១៩ នៅសង្កាត់គោកឃ្លាង ខណ្ឌសែនសុខ តាមបណ្តឹងរាយការណ៍សម្ងាត់ពីប្រជាពលរដ្ឋមកឲ្យសមត្ថកិច្ចមូលដ្ឋាន។
សមត្ថកិច្ចបានឲ្យដឹងថា ក្រុមជនដែលតែងខ្លួនជាសង្ឃក្លែងក្លាយទាំងនោះ ១.ឈ្មោះ ជា ផានី ហៅនីអាយុ២៨ឆ្នាំ មុខរបរមិនពិតប្រាកដ ស្នាក់នៅបន្ទប់ជួល ក្នុងភូមិត្រពាំងស្វាយ សង្កាត់គោកឃ្លាង ខណ្ឌសែនសុខ។ ២.ឈ្មោះ ជឹម សាម៉ុន ហៅម៉ុន អាយុ៣៩ឆ្នាំ គ្មានមុខរបរ ស្នាក់នៅបន្ទប់ជួលក្បែរគ្នា។ ៣.ឈ្មោះ ស៊ីណា អាយុ៣២ឆ្នាំ មុខរបរមិនពិតប្រាកដ ស្នាក់នៅបន្ទប់ជួលក្បែរគ្នា ភូមិត្រពាំងស្វាយ សង្កាត់គោកឃ្លាង ខណ្ឌសែនសុខ។ និងជនទី៤.ឈ្មោះ សួង ពិសិទ្ឋ អាយុ៣២ឆ្នាំ ជាអ្នកបើកបររ៉ឺម៉កម៉ូតូកង់បី ដឹកជញ្ជូន ស្នាក់នៅភូមិម័រ សង្កាត់ដង្កោ ខណ្ឌដង្កោ។
ប៉ូលិសខណ្ឌសែនសុខបានឲ្យដឹងថា នៅមុនពេលកើតហេតុ មានប្រជាជនបានរាយការណ៍សម្ងាត់មកថា មានបុរសមួយក្រុមរកស៊ីឆបោកគេដោយក្លែងខ្លួនធ្វើជាព្រះសង្ឃដើរបិណ្ឌបាត រកលុយតាមភូមិនានា ដោយមានរ៉ឺម៉កម៉ូតូមួយគ្រឿងមកដឹកជាប្រចាំ។ ក្រោយពីបានទទួលព័ត៌មាននេះរួច ក៏បានតាមឃ្លាំមើលឃើញពួកចេញដំណើរនៅវេលាម៉ោង៥ព្រឹកមកដល់ គោលដៅប៉ុស្តិ៍យាម២៤ម៉ោង ផ្លូវសម្ដេច ជា ស៊ីម ស្ថិតក្នុងសង្កាត់គោកឃ្លាង ក៏ឃាត់ឆែកឆេររកឃើញមានស្បង់ចីវរចំនួន៣ កំប្លេ ឆត្រចំនួន៣ និងបាតសម្រាប់ដាក់បាយរបស់ព្រះសង្ឃចំនួន៣ទៀត ទើបចាប់ឃាត់ខ្លួនពួកគេយកមកសួរនាំនៅអធិការដ្ឋានតែម្តង កសាងសំណុំរឿងបញ្ជូនទៅតុលាការផ្ដន្ទាទោសតាមផ្លូវច្បាប់។
កន្លងកាលពីថ្ងៃទី២៦ ខែមីនា ឆ្នាំ២០១៩ សមត្ថកិច្ចបានចាប់ខ្លួនក្លែងក្លាយចំនួន៣នាក់ និងអ្នកផ្សំគំនិតម្នាក់ទៀតជាអ្នកបើករ៉ឺម៉កម៉ូតូដឹកជញ្ជូន ដូចគ្នានេះដែរ នៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ទើបតែបានរយៈពេលជាង១ខែសោះ ឥឡូវចាប់បានក្រុមជនបែបនេះបាន១ក្រុមទៀតនៅពេលនេះ ពួកគេប្រាប់ថា មានស្រុកកំណើត នៅខេត្តព្រៃវៃង ស្រុកមេសាង ដែលមានឈ្មោះ ភួង ឆាយ ឈ្មោះ ភិន ភារម្យ ឈ្មោះ ប៉ យ៉ាត និងចុងក្រោយឈ្មោះ រុន ភារម្យ ជាអ្នកបើករ៉ឺម៉ក។
លោកវរសេនីយ៍ឯក ហួរ ម៉េងវ៉ាង អធិការនគរបាលខណ្ឌសែនសុខ បានមានប្រសាសន៍ថា ក្រុមជនសង្ស័យទាំងនេះ កំពុងកសាងឯកសារបញ្ជូនទៅតុលាការ ពីបទឆបោកយកប្រាក់ និងធ្វើឲ្យប៉ះពាល់ដល់សាសនាទៀតផង៕
Source: Kampuchea Thmey Daily
0 Comments