ភ្នំពេញ ៖ បុរសជាបងថ្លៃអត់មានរកស៊ី ធ្វើការអីទេ បានតែផឹកស៊ី ស្រវឹងរករឿង ឈ្លោះប្រកែកគ្នាក្នុងគ្រួសារ បង្កឲ្យមានការភ្ញាក់ផ្អើលដល់អ្នកជិតខាង និងឈានដល់សមត្ថកិច្ចចុះទៅសម្របសម្រួលចប់ទៅហើយ តែព្រឹកឡើងទំនងប្អូនថ្លៃ ប្រុស ខឹងខ្លាំងពេករឿងបងថ្លៃខ្លួនឈ្លោះកូររករឿងពីពេលយប់ ទើបទាញបានមេសោ វាយក្បាលបែបឈាមឆុល សន្លប់ស្នូកមួយរំពេច ហើយសមត្ថកិច្ចចុះមកឃាត់ខ្លួនជនដៃដល់សាកសួរនៅប៉ុស្តិ៍។
ហេតុការណ៍នេះ បានកើតឡើង កាលពីវេលាម៉ោង៦ព្រឹក ថ្ងៃទី០៧ ខែឧសភា ឆ្នាំ២០១៩ នៅភូមិព្រៃសាលា សង្កាត់កាកាប២ ខណ្ឌពោធិ៍សែនជ័យ។
ភាគីបងថ្លៃរងគ្រោះ ឈ្មោះ ធីម សៀងហ៊ីម ភេទប្រុស អាយុ៣៥ឆ្នាំ មុខរបរគ្មាន រស់នៅផ្ទះកើតហេតុ។ ចំណែកប្អូនថ្លៃឈ្មោះ ចិន វិចិត្រ ភេទប្រុស អាយុ៣៥ឆ្នាំ រស់នៅផ្ទះកើតហេតុ។
តាមប្រភពពីក្រុមគ្រួសារបានឲ្យដឹងថា មុនកើតហេតុ កាលពីយប់ថ្ងៃទី០៦ ខែឧសភា ឆ្នាំ២០១៩ ជនរងគ្រោះ ត្រូវជាបងថ្លៃនេះ បានផឹកស៊ីស្រវឹង រករឿងក្នុងគ្រួសារ តែមិនដល់ថ្នាក់ប្រើកម្លាំងបាយនោះទេ គ្រាន់តែឈ្លោះ ពាក្យសម្ដី ហើយគ្រាដែលជនរងគ្រោះ ឈ្លោះសម្ដីក្នុងគ្រួសារប្រពន្ធ ធ្វើឲ្យ ប្អូនថ្លៃខឹង ក៏មិនមាត់ បានចាកចេញពីផ្ទះបាត់។
ប្រភពបន្ដថា បន្ទាប់មក ប៉ូលិសបានចុះទៅអន្តរាគមន៍ សម្របសម្រួល រវាងប្តីប្រពន្ធ ស្ងាត់ចូលដេករៀងខ្លួនបាត់ ស្រាប់តែដល់វេលាម៉ោង៦ព្រឹក ថ្ងៃទី០៧ ប្អូនថ្លៃវិលមកផ្ទះវិញ ហៅឲ្យបើកទ្វារ រួចទាញបានមេសោ វាយប្រាវ លើបងថ្លៃ បណ្តាលឲ្យរងរបួសធ្ងន់ សន្លប់ស្តូក ផ្អើលឆោឡោ សាជាថ្មី សែងជនរងគ្រោះទៅពេទ្យឯកជន តែស្ថានភាពរបួសធ្ងន់ពេក ពេទ្យមិនហ៊ានទទួលមើល ទើបក្រុមគ្រួសារ ហៅរថយន្តសង្គ្រោះដឹកបញ្ជូនជនរងគ្រោះទៅមន្ទីរពេទ្យព្រះកុសុមៈ រីឯប្អូនថ្លៃត្រូវបានប៉ូលិសហៅទៅសាកសួរនៅប៉ុស្តិ៍ ដើម្បីកសាងកសាងសំណុំរឿងបញ្ជូនទៅផ្នែកព្រហ្មទណ្ឌ៕
Source: Kampuchea Thmey Daily
0 Comments