មេប៉ូលិសលោក Chandana Wickramaratne បាននិយាយកាលពីថ្ងៃអង្គារថា អាជ្ញាធរសន្តិសុខស្រីលង្កាបានសម្លាប់ឬចាប់ខ្លួនជនជីហាដទាំងអស់ដែលទទួលខុសត្រូវចំពោះការបំផ្ទុះគ្រាប់បែកអត្តឃាតអំឡុងពិធីបុណ្យ Easter ដែលបណ្ដាលឲ្យមនុស្សចំនួន២៥៧នាក់ស្លាប់។
លោក Wickramaratne បាននិយាយនៅក្នុងសេចក្ដីថ្លែងការណ៍ជាសំឡេងមួយថា ប៉ូលិសបានកម្ចាត់មនុស្សគ្រប់រូបដែលពាក់ព័ន្ធនឹងការវាយប្រហារកាលពីថ្ងៃទី២១ខែមេសាលើព្រះវិហារចំនួនបីកន្លែងនិងសណ្ឋាគារប្រណីតចំនួន៣កន្លែង។
លោកបាននិយាយថា “អ្នកដែលរៀបចំនិងអនុវត្តការវាយប្រហារដោយគ្រាប់បែកអត្តឃាតទាំងអស់បានស្លាប់ឬស្ថិតនៅក្នុងការឃុំឃាំងរបស់យើង។ អ្នកជំនាញបំផ្ទុះគ្រាប់បែកពីរនាក់របស់ក្រុមនេះត្រូវបានសម្លាប់។ យើងបានរឹបអូសគ្រាប់ផ្ទុះដែលពួកគេបានរក្សាទុកសម្រាប់ការវាយប្រហារនាពេលអនាគត”។
លោក Wickramaratne ដែលត្រូវបានតែងតាំងជាមេប៉ូលិសស្ដីទីកាលពីសប្ដាហ៍មុនបន្ទាប់ពីលោកប្រធានាធិបតី Maithripala Sirisena បានព្យួរអតីតមេបញ្ជាការដោយសារតែការបរាជ័យរបស់ គាត់ក្នុងការព្រមានអំពីការវាយប្រហារនេះបាននិយាយថា ជីវិតសាធារណៈបានវិលត្រលប់យឺតៗទៅរកភាពធម្មតាវិញខណៈបម្រាមគោរចរណ៍ដែលដាក់បន្ទាប់ពីការបំផ្ទុះគ្រាប់បែកត្រូវបានដកចេញ។
រដ្ឋាភិបាលបានបើកសាលារៀនរដ្ឋឡើងវិញកាលពីថ្ងៃចន្ទប៉ុន្តែការចូលរៀនបានធ្លាក់ចុះដល់ក្រោម១០ភាគរយនៅកន្លែងជាច្រើនដោយសារតែឪពុកម្តាយនៅតែមានការភ័យខ្លាចអំពីការវាយប្រហារ។ លោក Wickramaratne មិនបាននិយាយថាតើមានមនុស្សប៉ុន្មាននាក់ត្រូវបានគេឃុំឃាំងពាក់ព័ន្ធការបំផ្ទុះគ្រាប់បែកនោះទេប៉ុន្តែអ្នកនាំពាក្យប៉ូលិសលោក Ruwan Gunasekera បាននិយាយកាលពីថ្ងៃចន្ទថា មនុស្សចំនួន៧៣នាក់រួមទាំងស្ត្រី៩នាក់ផងដែរត្រូវបានចាប់ខ្លួន។
ការបំផ្ទុះគ្រាប់បែកនេះត្រូវបានគេស្តីបន្ទោសទៅលើក្រុមក្នុងតំបន់មួយឈ្មោះថា Thowheeth Jama'ath (NTJ) ប៉ុន្ដែក្រុមរដ្ឋឥស្លាមក៏បានអះអាងទទួលខុសត្រូវផងដែរ។ប៉ូលិសបាននិយាយថា ការចាប់ខ្លួនមនុស្សពីរនាក់ត្រូវបានធ្វើឡើងហើយជនសង្ស័យជាច្រើននាក់ត្រូវបានកំណត់អត្តសញ្ញាណតាមរយៈវីដេអូកាមេរ៉ាសុវត្ថិភាព៕ AFP
Source: Kampuchea Thmey Daily
0 Comments