បន្ទាយមានជ័យ ៖ លោក លី សារី អភិបាលរងខេត្តបន្ទាយមានជ័យបានចូលរួមក្នុងពិធីប្រកាសកំណត់តំបន់ធ្វើការវិនិច្ឆ័យលើចុះបញ្ជីដីធ្លីមានលក្ខណៈជាប្រព័ន្ធ ស្ថិតក្នុងខេត្តបន្ទាយមានជ័យ នៅឃុំរហាល ស្រុកព្រះនេត្រព្រះ ចំនួន៣ភូមិ ភូមិចក ព្រៃមាន់ និងភូមិឫស្សី លោកសង្ឃឹមថាបងប្អូនប្រជាពលរដ្ឋដែលបានចូលរួមស្តាប់នាពេលនេះ នឹងយកការយល់ដឹងទាំងនេះទៅផ្សព្វផ្សាយជូនប្រជាពលរដ្ឋ ក្នុងភូមិរបស់ខ្លួនឲ្យបានយល់ដឹង ហើយបើមានទំនាស់ព្រំអ្នកជិតខាង ក៏ត្រូវសម្របសម្រួលគ្នាដើម្បីឲ្យក្រុមការងារងារស្រួលនឹងចុះបញ្ជីដីធ្លីត្រឹមត្រូវ ហើយដើម្បីទទួលបានប័ណ្ណកម្មសិទ្ធិស្របច្បាប់នាពេលខាងមុខនេះផងដែរ នៅព្រឹកថ្ងៃទី២៨ ខែធ្នូ ឆ្នាំ២០១៨។ និងដែលមានអ្នកចូលរួម លោក ប្រាក់ ប៉ូលី ប្រធានមន្ទីររៀបចំដែនដី នគរោបនីយកម្ម សំណង់ និងសុរិយោដីខេត្តបន្ទាយមានជ័យ មន្ត្រី និងប្រជាពលរដ្ឋពាក់ព័ន្ធនឹងដីធ្លីជាច្រើននាក់ផងដែរ។
ក្នុងនោះ លោក ប្រាក់ ប៉ូលី បានមានប្រសាសន៍ឲ្យដឹងថា ការប្រកាសកំណត់តំបន់វិនិច្ឆ័យលើការចុះបញ្ជីដីធ្លីមានលក្ខណៈជាប្រព័ន្ធ ជាដំណាក់កាលជាច្រើនដង ហើយនៅស្រុកព្រះនេត្រព្រះនេះនីតិវិធី នៃការចុះបញ្ជីដីធ្លីមានលក្ខណៈជាប្រព័ន្ធមាន៥ដំណាក់កាល ទី១-ត្រៀមរៀបចំ គឺជាការកំណត់តំបន់ធ្វើការវិនិច្ឆ័យ បង្កើតដោយគណៈកម្មការរដ្ឋបាលជូនដំណឹង ប្រជុំផ្សព្វផ្សាយ និងដំណើរការផ្សព្វផ្សាយពីការចុះបញ្ជីដីមានលក្ខណៈជាប្រព័ន្ធ។ ទី២-ប្រតិបត្តិការបច្ចេកទេស គឺជាការចុះកំណត់ព្រំ វាស់វែង និងវិនិច្ឆ័យ ដើម្បីកសាងប្លង់ និងបញ្ជីឈ្មោះម្ចាស់ដី។ ទី៣-បិទផ្សាយជាសាធារណៈនូវឯកសារ នៃការវិនិច្ឆ័យប្លង់សុរិយោដី និងបញ្ជីឈ្មោះម្ចាស់មានរយៈពេល១៥ថ្ងៃ ដើម្បីទុកលទ្ធភាពឲ្យម្ចាស់ដី និងអ្នកពាក់ព័ន្ធធ្វើការផ្ទៀងផ្ទាត់ ឈ្មោះ ស្ថានភាពគ្រួសារ និងក្បាលដីរបស់ខ្លួន ព្រមទាំងធ្វើការតវ៉ា ក្នុងករណីមានការខុសឆ្គង បើផុតរយៈពេលកំណត់ នៃការបិទផ្សាយបងប្អូនប្រជាពលរដ្ឋមិនអាចជំទាស់តវ៉ាបានទៀតឡើយ។ ទី៤-សម្រេចលើឯកសារវិនិច្ឆ័យ របាយការណ៍ពីលទ្ធផល នៃការបិទផ្សាយជាសាធារណៈនូវឯកសារ នៃការវិនិច្ឆ័យរបស់គណៈកម្មការរដ្ឋបាលជូនអភិបាលខេត្ត ដើម្បីពិនិត្យ និងសម្រេចលើការផ្តល់សិទ្ធចំពោះក្បាលដីណាដែលមិនមានទំនាស់។ ទី៥-ចុះបញ្ជីចេញប័ណ្ណ និងជូនម្ចាស់ដី។
លោកបានបន្តថា យោងតាមក្រសួងសេដ្ឋកិច្ច និងហិរញ្ញវត្ថុ បានកំណត់ជាមួយក្រសួងរៀបចំដែនដីនគរោបនីយកម្ម និងសំណង់ ដ យ តម្រូវឲ្យម្ចាស់ក្បាលដីអ្នកកាន់កាប់ដីបង់សេវា នៃការចុះបញ្ជីដីធ្លីមានលក្ខណៈជាប្រព័ន្ធតែមួយគត់ពេលមកទទួលប័ណ្ណ ត្រូវបង់ក្នុងតម្លៃ ដីកសិកម្មជនបទ ស្មើ១រៀល ក្នុង១ម៉ែត្រការ៉េ ដីលំនៅឋានជនបទគឺ១ម៉ែត្រការ៉េ ស្មើ១០រៀល ដីទីប្រជុំជនស្រុកគឺ១ម៉ែត្រការ៉េ ស្មើ២០រៀល ដីទីប្រជុំជនខេត្ត ឬដីជាទីប្រជុំជនរាជធានីភ្នំពេញ គឺ១ម៉ែត្រការ៉េ ស្មើ២៥០រៀល ដីទីប្រជុំជនរាជធានីភ្នំពេញ គឺ១ម៉ែត្រការ៉េ ស្មើ៥០០រៀល។
ក្នុងនោះ លោក លី សារី បានមានប្រសាសន៍ កោតសរសើរ និងវាយតម្លៃខ្ពស់ចំពោះថ្នាក់ដឹកនាំក្រសួងរៀបចំដែនដីនគរោបនីយកម្ម និងសំណង់ ដែលតែងតែយកចិត្តទុកដាក់ក្នុងការកសាងធនធានមនុស្ស សំដៅពង្រឹងសមត្ថភាពជំនាញបង្កើតការទទួលខុសត្រូវចំពោះតួនាទី និងភារកិច្ចក្នុងការបម្រើប្រជាពលរដ្ឋ ក៏ដូចជាប្រទេសជាតិ ប្រកបដោយ ប្រសិទ្ធភាពខ្ពស់។
លោក លី សារី បានថ្លែងអំណរគុណចំពោះប្រជាពលរដ្ឋដែលបានចូលរួមស្វែងយល់អំពីការចុះបញ្ជីដីធ្លីមានលក្ខណៈជាប្រព័ន្ធ នៅស្រុកព្រះនេត្រព្រះយើងនេះ ដើម្បីពិនិត្យថា តើការចុះបញ្ជីមានលក្ខណៈជាប្រព័ន្ធ មានភាពសុក្រឹតទាំងការងារបច្ចេកទេស និងផ្លូវច្បាប់ត្រឹមត្រូវ ហើយឬនូវ ក៏ដូចជាការរួមចំណែក នូវសុវត្ថិភាព នៃការកាន់កាប់ដីធ្លី កាត់បន្ថយទំនាស់ និងជំរុញឲ្យមានទីផ្សារដីធ្លីប្រកបដោយ ប្រសិទ្ធភាពខ្ពស់កាត់បន្ថយភាពក្រីក្រ ស្ថិរភាពសង្គម និង ការអភិវឌ្ឍន៍សេដ្ឋកិច្ចឲ្យ កាន់តែប្រសើរឡើង ស្របតាមគោលនយោបាយរបស់រាជរដ្ឋាភិបាល ដែលមានសម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីអាណត្តិទី៦នេះ៕
Source: Kampuchea Thmey Daily
0 Comments