ភ្នំពេញ ៖ ថៅកែសិប្បកម្មកាត់ដេរសំលៀកបំពាក់តូចមួយសង្ស័យគ្មានច្បាប់គ្មានយីហោ ដែលមានថៅកែជាជនជាតិចិន បានដាក់បម្រាមដល់ក្រុមកម្មកររបស់ខ្លួន ដែលធ្វើការក្នុងនោះថា បើសុំឈប់១ថ្ងៃ ត្រូវកាត់លុយចំនួន៧ថ្ងៃ ពោលគឺកាត់លុយគុណនឹង៧ដងឯណោះ ដោយសារតែបែបនេះ ទើបកម្មករកើតទុក្ខមិនសុខចិត្តផ្ទុះការតវ៉ា កាលពីល្ងាចថ្ងៃទី១៥ ខែសីហា ឆ្នាំ២០១៨ នេះនៅមុខសិប្បកម្មគ្មានយីហោ តាមផ្លូវលំក្នុងភូមិព្រៃព្រីងត្បូង២ សង្កាត់ចោមចៅ៣ ខណ្ឌពោធិ៍សែនជ័យ។
សិប្បកម្មខាងលើគ្មានលើកស្លាកយីហោទេ គ្រាន់តែហៅឈ្មោះឆេង យ័ន្ត និងមានកម្មករ បម្រើការងារក្នុងសិប្បកម្មខាងលើមានជិត១០០នាក់ខែមុនៗ មិនដូចខែនេះទេ បើកម្មករឈប់មានធុរៈចាំបាច់សម្រាកឈឺ ដោយមានច្បាប់ត្រឹមត្រូវនោះមិនបានកាត់លុយឡើយ ទើបតែមកដល់ខែនេះកុំថាឡើយឈប់អត់ច្បាប់សូម្បីឈប់មានច្បាប់ត្រឹមត្រូវ បែរជាថៅកែកាត់លុយ ឈប់១ថ្ងៃ កាត់១សប្តាហ៍ មានកម្មករខ្លះគាត់ឈឺបានឈប់សម្រាក៣ថ្ងៃដល់កាត់លុយស្មើ៣សប្តាហ៍ ពោលគឺស្មើ២១ថ្ងៃ អស់បាត់ប្រាក់ខែ១ខែ ទើបកម្មករប្រមាណជាង៤០នាក់ ផ្ទុះការតវ៉ាទាមទារឲ្យក្រុមហ៊ុនគោរពទៅនឹងលក្ខខណ្ឌការងារដែលក្រសួងដាក់ចុះ។
កម្មករប្រមាណជាង៤០នាក់ មិនសុខចិត្តដោយសារលក្ខខណ្ឌរបស់ថៅកែហួសហេតុពេកឈប់មានច្បាប់១ថ្ងៃ កាត់លុយ១សប្តាហ៍បែបនេះ បានប្រមូលផ្តុំគ្នាតវ៉ារកយុត្តិធម៌ ខណៈដែលកម្មករកំពុងតវ៉ាក៏មានវត្តមានអាជ្ញាធរខណ្ឌចុះទៅសម្របសម្រួលដែរតែមិនទាន់មានដំណោះស្រាយណាមួយសមស្របនៅឡើយទេ៕
Source: Kampuchea Thmey Daily
0 Comments