ភ្នំពេញ ៖ ស្ត្រីចំណាស់ម្នាក់ស្លាប់ភ្លាមៗនៅកន្លែងកើតហេតុ ចំណែកចៅប្រុស ស្រី២នាក់ទៀតរងរបួសធ្ងន់ នៅក្នុងហេតុការណ៍គ្រោះថ្នាក់ចរាចរមួយខណៈជនរងគ្រោះទាំង៣ជិះម៉ូតូមួយគ្រឿង បើកបរដោយចៅប្រុស បើកបោះពួយល្បឿនលឿន វ៉ាជែងរថយន្តខាងមុខ ជ្រុលទៅបុកឡើងសួនទ្រូងផ្លូវ ដួលបោក តែម្តង។
ហេតុការណ៍ដ៏រន្ធត់នេះ បានកើតឡើងកាលពីវេលាម៉ោង៤និង១៥នាទីរសៀល ថ្ងៃទី១៦ ខែសីហា ឆ្នាំ២០១៨ ស្ថិតនៅលើកំណាត់ផ្លូវជាតិ៦អា ភូមិក្តីចាស់ សង្កាត់បាក់ខែង ខណ្ឌជ្រោយចង្វារ។
ជនរងគ្រោះ ស្លាបើនៅកន្លែងមានឈ្មោះ មូ ថេង ភេទស្រី អាយុ៥៤ឆ្នាំ មានទីលំនៅភូមិមេសព្រះច័ន្ទ ឃុំមេសព្រះច័ន្ទ ស្រុកពារាំង ខេត្តព្រៃវែង។ ចំណែកចៅ២នាក់រងរបួសធ្ងន់ ១ ឈ្មោះ ខេមរា ជីវ័ន្ត ភេទប្រុស អាយុ១៤ឆ្នាំ។ ទី២ ឈ្មោះ ខេមរា លក្ខិណាពេជ្រ ភេទស្រី អាយុ៧ឆ្នាំ។ ជនរងគ្រោះទាំង៣នាក់ ជិះម៉ូតូមួយគ្រភង ម៉ាកស្កុបពីពណ៌ស ពាក់ស្លាកលេខ ភ្នំពេញ 1FA-4694 ដោយចៅប្រុសឈ្មោះ ខេមរា ជីវ័ន្ត ជាអ្នកបើកបរ។
តាមលោក កែវ ឈីម បានឲ្យដឹងថា មុនកើតហេតុ ជនរងគ្រោះ៣នាក់ ជីដូននិងចៅ ជិះម៉ូតូស្កុបពី ចៅប្រុសជាអ្នកបើកបរ បើកក្នុងល្បឿនលឿនពីត្បូងទៅជើង លុះដល់ចំណុចកើតហេតុ វ៉ាជែងរថយន្តខាងមុខពីខាងឆ្វេងដៃ តែដោយសារកង្វះការប្រុងប្រយ័ត្ន ម៉ូតូរេចង្កូតបុកឡើងសួនទ្រូងផ្លូវ បណ្តាលឲ្យដួលបោក ស្លាប់ជីដូនភ្លាមៗនៅកន្លែង ចំណែកចៅប្រុស-ស្រីទាំង២នាក់រងរបួសជើងធ្ងន់។
ក្រោយកើតហេតុ ជនរងគ្រោះ២នាក់ បងប្អូនត្រូវបានរថយន្តសង្គ្រោះដឹកបញ្ជូនទៅមន្ទីរពេទ្យគន្ធបុប្ផា ចំណែកសាកសពជីដូន ក្រោយសមត្ថកិច្ចជំនាញពិនិត្យស្លាកស្នាម ទំនាក់ទំនងទៅក្រុមគ្រួសារ មកដឹកយកទៅធ្វើបុណ្យតាមប្រពៃណីឯស្រុកពារាំង ដោយឡែកម៉ូតូ សមត្ថកិច្ចយកទៅរក្សាទុក នៅផ្នែកជំនាញ ជាបណ្តោះអាសន្ន៕
Source: Kampuchea Thmey Daily
0 Comments