ភ្នំពេញ ៖ មន្ត្រីជាន់ខ្ពស់ក្រសួងអប់រំបានជំរុញឲ្យយុវជន ខ្មែរអ៊ីស្លាមទាំងអស់អភិវឌ្ឍចំណេះដឹងឲ្យបានកាន់តែប្រសើរឡើងថែមទៀតដើម្បីអភិវឌ្ឍសហគមន៍របស់ខ្លួន និង សង្គមកម្ពុជាខណៈកម្រិតវប្បធម៌របស់យុវជនខ្មែរអ៊ីស្លាមមួយចំនួន នៅមានកម្រិតនៅឡើយ។
លោក ណុះ ស្លេះ អនុរដ្ឋលេខាធិការក្រសួងអប់រំយុវជននិងកីឡាក៏បានអំពាវនាវឲ្យយុវជនខ្មែរ អ៊ីស្លាមទាំងអស់ខិតខំសិក្សាចំណេះទូទៅនិងជំនាញវិជ្ជាជីវៈផ្សេងៗឲ្យបានច្រើនថែមទៀតផងដែរស្របពេលដែលបច្ចុប្បន្នមានយុវជនខ្មែរ អ៊ីស្លាមមួយចំនួនសិក្សាផ្តោតតែទៅលើខាងសាសនាប៉ុណ្ណោះ។
ថ្លែងក្រោយសិក្ខាសាលាស្តីពីតម្លៃការអប់រំនិងការអភិវឌ្ឍន៍យុវជនក្រោមប្រធានបទ ដើម្បីកសាងសហគមន៍ខ្មែរអ៊ីស្លាមបញ្ហាប្រឈមនិងយុទ្ធសាស្ត្រកាលពីព្រឹកថ្ងៃទី១៦ ខែសីហា ឆ្នាំ២០១៨ នៅមជ្ឈមណ្ឌលសហប្រតិបត្តិការកម្ពុជាកូរ៉េ លោកបានជំរុញឲ្យគ្រឹះស្ថានអប់រំផ្នែកអ៊ីស្លាមទាំងអស់ត្រូវរួបរួមនិងឯកភាពគ្នាតែមួយ ទៅលើកម្មវិធីសិក្សាឲ្យស្របទៅនឹងកម្មវិធីសិក្សាគោលរបស់ក្រសួងអប់រំយុវជននិងកីឡាដើម្បីឲ្យសិស្សខ្មែរ អ៊ីស្លាមទទួលបានចំណេះដឹងទូទៅនិងជំនាញចូលរួមអភិវឌ្ឍសង្គមកម្ពុជាឲ្យកាន់តែរីកចម្រើន។
លោក ហូសេន មូហាំម៉ាត់ ហ្វារី ទីប្រឹក្សាក្រសួងធម្មការនិងសាសនានិងជាប្រធានអង្គការសម្ព័ន្ធបញ្ញវន្តមុស្លីមកម្ពុជាដែលបានចូលរួមនៅក្នុងសិក្ខាសាលាដែរនោះបានមានប្រសាសន៍ថាបច្ចុប្បន្នមានយុវជនខ្មែរអ៊ីស្លាមមួយចំនួនមានការលំបាកក្នុងការស្វែងរកការងារធ្វើដោយសារតែពួកគាត់រៀនតែខាងសាសនាដោយមិនបានរៀនចំណេះទូទៅនិងជំនាញផ្សេងៗទៀត។
លោកបានបន្តថា «បញ្ហាយុវជនខ្មែរអ៊ីស្លាមមានការប្រឈមបញ្ហាច្រើនដោយសារតែមិនបានរៀនចំណេះដឹងទូទៅ និង ជំនាញវិជ្ជាជីវៈសិក្ខាសាលានេះ នឹងជួយជំរុញឲ្យពួកគេចាប់ផ្តើមគិតពិចារណារៀនចំណេះដឹងនិងជំនាញផ្សេងៗដើម្បីអភិវឌ្ឍខ្លួនឯងផង គ្រួសារនិងសង្គមជាតិផង»។
លោកបានបន្ថែមថា យុវជនខ្មែរអ៊ីស្លាមត្រូវតែរៀនទាំងពីរ គឺរៀនផ្នែកខាងសាសនាផងនិងរៀនចំណេះដឹងទូទៅផង ព្រោះថាបើរៀនតែផ្នែកសាសនាតែមួយមុខនឹងជួបការលំបាកក្នុងការស្វែងរកការងារធ្វើនៅក្នុងសង្គមដែលត្រូវការអ្នកធ្វើការដែលមានជំនាញវិជ្ជាជីវៈខ្ពស់ៗដូចជាផ្នែកបច្ចេកវិទ្យាជាដើម។
លោក ហូសេន មូហាំម៉ាត់ ហ្វារី បានឲ្យដឹងទៀតថា ដើម្បីឲ្យយុវជនខ្មែរអ៊ីស្លាមទទួលបានចំណេះដឹង និង ចំណេះធ្វើនោះអង្គការបានរៀបចំជាសិក្ខាសា លាជាច្រើនដើម្បីផ្តល់ចំណេះដឹងនិងបទពិសោធន៍ល្អៗដល់យុវជនដើម្បីតម្រង់ទិសពួកគេសម្រាប់ថ្ងៃអនាគតឲ្យបានល្អប្រសើរនិងផ្តល់អាហារូបករណ៍ថ្នាក់អនុបណ្ឌិតនិងបណ្ឌិតដើម្បីឲ្យយុវជនបានបន្តការសិក្សានៅតាមសាកលវិទ្យាល័យនានានៅក្នុងស្រុកនិងនៅប្រទេសម៉ាឡេស៊ី។
លោកបានបញ្ជាក់ថា នាពេលខាងមុខនេះ អង្គការគ្រោងនឹងសហការជាមួយដៃគូនានាដើម្បីបង្កើតសាកលវិទ្យាល័យមួយសម្រាប់និស្សិតខ្មែរអ៊ីស្លាមបានសិក្សារៀនសូត្រកាន់តែខ្ពស់ថែមទៀតដើម្បីចូលរួមអភិវឌ្ឍសហគន៍អ៊ីស្លាមឲ្យមានការរីកចម្រើននិងជឿនលឿនថែមទៀតខណៈបច្ចុប្បន្ននេះនៅប្រទេសកម្ពុជា មានជនជាតិអ៊ីស្លាមប្រមាណ៧០ម៉ឺននាក់ នៅទូទាំងប្រទេសដែលភាគច្រើនជាយុវជន៕
Source: Kampuchea Thmey Daily
0 Comments