ភ្នំពេញ ៖ ស្ត្រីម្នាក់ជិះម៉ូតូមកផ្សារ ដើម្បីទិញអីវ៉ាន់ ធ្វើម្ហូបលក់នៅមុខរោងចក្រត្រូវបានក្រុមចោរប្លន់ប្រដាប់ដោយកាំបិតមកភ្ជង់គំរាមយកលុយអស់២០ម៉ឺនរៀល កាលពីវេលាម៉ោង៤និង៣០នាទីទៀបភ្លឺ ឈានចូលថ្ងៃទី១៦ ខែសីហា ឆ្នាំ២០១៨ នៅជាប់របងសាលារៀន វិទ្យាល័យជម្ពូវ័នសង្កាត់ចោមចៅ៣ ខណ្ឌពោធិ៍សែនជ័យ។
ជនរងគ្រោះឈ្មោះ ឡាយ អូន ភេទស្រី អាយុ៤៩ឆ្នាំ មុខរបរលក់បាយនៅមុខរោងចក្រ មានទីលំនៅ ភូមិអង្គតាគៀត សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានពីស្ត្រីរងគ្រោះបាននិយាយថា នៅមុនពេលកើតហេតុ រូបគាត់បានជិះម៉ូតូម៉ាកគុបមកទិញម្ហូបនៅផ្សារជម្ពូវ័ន លុះជិះម៉ូតូមកដល់ជិតរបងសាលាវិទ្យាល័យជម្ពូវ័នស្រាប់តែមានជនសង្ស័យមានគ្នា៣នាក់ជិះម៉ូតូ២គ្រឿង ម៉ូតូទី១ម៉ាកហុងដាឌ្រីមសេ១២៥ អត់ស្គាល់ស៊េរី និងទី២ម៉ាក suzuki smahs ពណ៌ខ្មៅទាំង២គ្រឿង ជិះ ពីក្រោយគាត់ ហើយបានវ៉ាស្ទាក់ពីមុខរូបគាត់ដោយយកកាំបិតផ្គាក់ចំនួន២ដើមបានភ្ជង់ គំរាមឲ្យគាត់ឈប់ ហើយធ្វើសកម្មភាពយកលុយក្នុងហោប៉ៅខោរបស់គាត់អស់។
ប្រភពព័ត៌មានបានបន្តទៀតថា ខណៈពេលយកលុយបានភ្លាមៗស្រាប់តែពេលនោះមានម៉ូតូមួយគ្រឿងជិះស្របពីក្រោយគាត់ផងដែរ។ បន្ទាប់មកគាត់បានស្រែកថាចោរៗពេលនោះជនសង្ស័យទាំង ៣នាក់បានជិះម៉ូតូចេញ ២នាក់បានជិះម៉ូតូទៅផ្លូវជាតិលេខ ៤និងម្នាក់ទៀតបានជិះត្រឡប់ក្រោយវិញ ហើយបន្ទាប់មក ប្រជាពលរដ្ឋដែលជិះម៉ូតូមកពីក្រោយគាត់ដោយមិនបានលឺ ដោយឃើញជនសង្ស័យជិះម៉ូតូកាត់មុខដែរ លុះជិះម៉ូតូមកដល់គាត់ទើបដឹងថា ពួកនោះជាចោរប្លន់។
ក្រោយពេលកើតហេតុជនរងគ្រោះមិនដាក់ពាក្យបណ្ដឹងឡើយដោយគ្រាន់តែជិះម៉ូតូមកប្រាប់សមត្ថកិច្ចតែប៉ុណ្ណោះហើយមិនទាន់ជួបសមត្ថកិច្ចផង គាត់បានត្រឡប់ទៅផ្ទះវិញ ព្រោះភ័យខ្លាំងពេកណាមួយអស់លុយទិញអីវ៉ាន់ផង៕
Source: Kampuchea Thmey Daily
0 Comments