ព្រះវិហារ ៖ កម្លាំងនគរបាល នៃនាយកដ្ឋានសន្តិសុខផ្ទៃក្នុង នៃក្រសួងមហាផ្ទៃ បានសហការជាមួយកម្លាំងនគរបាល នៃស្នងការដ្ឋាននគរបាល ខេត្តព្រះវិហារ បើកប្រតិបត្តិការឡោមព័ទ្ធទីតាំងមួយកន្លែងចាប់ជំរិតជនជាតិថៃកាលពីពេលថ្មីៗនេះ ស្ថិតនៅក្នុងភូមិ ស្រអែម ឃុំ ស្រអែម ស្រុកជាំក្សាន្ត ខេត្តព្រះវិហារ។
ស្នងការនគរបាលខេត្តព្រះវិហារ លោកឧត្ដមសេនីយ៍ ទោ យិន ចំណាន បានថ្លែងប្រាប់អ្នកសារព័ត៌មានថា បន្ទាប់ពីទទួលបានការណែនាំពីអគ្គស្នងការដ្ឋាននគរបាលជាតិ កម្លាំងនគរបាលខេត្តព្រះវិហារ ប្រមាណ៤០នាក់ បានសហការជាមួយកម្លាំងនគរបាល នៃនាយកដ្ឋានសន្តិសុខផ្ទៃក្នុង បានចុះទៅដល់ទីតាំងខាងលើ និងធ្វើការឡោមព័ទ្ធទីតាំងខាងលើ មួយយប់ទល់ភ្លឺ រហូតឈានទៅឃាត់ខ្លួនជនសង្ស័យ៥នាក់ សុទ្ធតែស្លៀកពាក់ឯកសណ្ឋានកងទ័ព ព្រមទាំងដកហូតសម្ភារៈមួយចំនួន និងរំដោះនារីជនជាតិថៃពីរនាក់។
សមត្ថកិច្ចមិនទាន់បង្ហាញឈ្មោះក្រុមជនសង្ស័យនៅឡើយទេ ដោយសារប្រញាប់ប្រញាល់បញ្ជូនបន្តទៅភ្នំពេញនាពេលនោះ។
លោកស្នងការនគរបាលបញ្ជាក់ថា ក្រោយការឃាត់ខ្លួន ជនសង្ស័យទាំង៥នាក់ រួមនឹងវត្ថុតាង ត្រូវបានបញ្ជូនបន្តទៅកាន់រាជធានីភ្នំពេញ ដើម្បីចាត់ការទៅតាមនីតិវិធី នៃច្បាប់។ រីឯនារីរងគ្រោះ ជាជនជាតិថៃ ត្រូវបានបញ្ជូនខ្លួនទៅកាន់រាជធានីភ្នំពេញផងដែរ៕
Source: Kampuchea Thmey Daily
0 Comments