ភ្នំពេញ ៖ ក្រសួងការងារ និងបណ្ដុះបណ្ដាលវិជ្ជាជីវៈ បានអះអាងថា ការទូទាត់ប្រាក់បំណាច់អតីត ភាពការងារជូនកម្មករនិយោជិត ដែលបាននិងកំពុងប្រើប្រាស់កិច្ចសន្យាការងារ មានថិរវេលាមិនកំណត់ (កិច្ចសន្យារយៈពេលវែង) នឹងទទួលបានការទូទាត់ប្រាក់បំណាច់អតីតភាពការងារ២ដង ក្នុងមួយឆ្នាំ គឺក្នុងខែមិថុនា និងខែធ្នូ ដោយនឹងត្រូវចាប់ផ្ដើមអនុវត្តចាប់ពីខែមិថុនា ឆ្នាំ២០១៩តទៅ។
យោងតាមសេចក្ដីប្រកាសព័ត៌មានរបស់ក្រសួងការងារ និងបណ្ដុះបណ្ដាលវិជ្ជាជីវៈចេញផ្សាយកាលពីថ្ងៃទី២៨ធ្នូកន្លងទៅនេះបានឲ្យដឹងថា ក្រសួងការងារ និងបណ្ដុះបណ្ដាលវិជ្ជាជីវៈសូមជូនដំណឹងដល់សាធារណជន សមាគម សហជីព និងកម្មករនិយោជិតឲ្យបានជ្រាបថា ការទូទាត់ប្រាក់បំណាច់អតីតភាពការងារ២ដង ក្នុងមួយឆ្នាំ គឺក្នុងខែមិថុនា និងខែធ្នូ ដោយនឹងត្រូវចាប់ផ្ដើមអនុវត្តចាប់ពីខែមិថុនា ឆ្នាំ២០១៩តទៅនេះ គឺយោងទៅតាមច្បាប់ ស្ដីពីវិសោធនកម្មមាត្រា៨៧ ចំណងជើងចំណុចគផ្នែកទី៣ នៃជំពូកទី៤ មាត្រា៨៩ មាត្រា៩០ មាត្រា៩១ មាត្រា៩៤ មាត្រា១១០ មាត្រា១២០ និងមាត្រា១២២ នៃច្បាប់ ស្ដីពីការងារ ដែលត្រូវបានព្រះរាជក្រមប្រកាសដាក់ឲ្យប្រើកាលពីថ្ងៃទី១៣ ខែមីនា ឆ្នាំ២០១៧កន្លងទៅ។
សេចក្ដីប្រកាសព័ត៌មានដដែលបានបញ្ជាក់ទៀតថា ការទូទាត់បើករំលឹកប្រាក់បំណាច់អតីតភាពការងាររបស់កម្មករនិយោជិត ដែលមានមុនឆ្នាំ២០១៩ ក្រសួងកំពុងធ្វើការពិភាក្សាជាមួយវិស័យឯកជន ដើម្បីកំណត់កាលវិភាគជាក់លាក់មួយ ក្នុងការតម្រូវឲ្យសហគ្រាស គ្រឹះស្ថាន អនុវត្តកាតព្វកិច្ចបើករំលឹកប្រាក់បំណាច់អតីតភាពការងារនេះ។
យ៉ាងណាក៏ដោយក្នុងអំឡុងពេល នៃការទូទាត់បើករំលឹកប្រាក់បំណាច់អតីតភាពការងារនេះ ក្រសួងសូមធានាចំពោះអត្ថប្រយោជន៍ស្របច្បាប់នានា ដែលបងប្អូនកម្មករនិយោជិតមាន ហើយដែលសហគ្រាស គ្រឹះស្ថានក្ស័យធន ឬបិទទ្វារណាមួយមិនទាន់បានទូទាត់ជូនបងប្អូនកម្មករនិយោជិត។
ចុងក្រោយក្រសួងការងារ និងបណ្ដុះបណ្ដាលវិជ្ជាជីវៈ បានស្នើដល់សមាគម សហជីព និងកម្មករនិយោជិត ត្រូវរក្សាភាពនឹងនរក្នុងចិត្តចៀសវាងការចាញ់បោកបញ្ឆោតពីសំណាក់ជនខិលខូចមួយចំនួនដែលមានបំណងញុះញង់បង្កអស្ថិរភាពនកក្នុងសហគ្រាសគ្រឹះស្ថានដែលអាចបំផ្លាញការងារអចិន្ត្រៃយ៍របស់បងប្អូនកម្មករនិយោជិត៕
Source: Kampuchea Thmey Daily
0 Comments