ភ្នំពេញ ៖ យុវជនម្នាក់ បានស្លាប់ ក្រោយជួបគ្រោះថ្នាក់ចរាចរណ៍ ខណៈរថយន្តបត់ឆ្វេងមិនបានស៊ីញ៉ូ ម៉ូតូបើកទៅត្រង់ ជាន់ហ្វ្រាំងអូសដួលកៀបជាប់កង់រថយន្តស្លាប់ កាលពីវេលាម៉ោង៨និង៥នាទីព្រឹក ថ្ងៃទី២០ ខែមេសា ឆ្នាំ២០១៩ តាមបណ្ដោយផ្លូវជាតិលេខ៦ ចំណុចទល់មុខគូបូតាភ្នំពេញ ភូមិគៀនឃ្លាំង សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។
រថយន្តបង្កម៉ាកតាកូម៉ា ពណ៌ទឹកប្រាក់ ពាក់ស្លាកលេខភ្នំពេញ2R 5408 បើកដោយបុរសម្នាក់ រួមដំណើរជាមួយប្រពន្ធ និងកូន។
ម៉ូតូរងគ្រោះម៉ាកឌុក ពណ៌សលាយខ្មៅ ពាក់ស្លាកលេខភ្នំពេញ1FS 3353 បើកដោយ ឈ្មោះ ខន ចំរើន ភេទប្រុស អាយុ២២ឆ្នាំ រស់នៅភូមិថ្កូវ ឃុំត្រប់ ស្រុកបាធាយ ខេត្តកំពង់ចាម។
តាមប្រភពព័ត៌មាននៅកន្លែងកើតហេតុឲ្យដឹងថា នៅមុនពេលកើតហេតុ រថយន្ត និងម៉ូតូបើកស្របទិសគ្នា តាមបណ្ដោយផ្លូវជាតិលេខ៦អា ទិសដៅពីជើង ទៅត្បូង ដោយរថយន្តបើកមុខ ម៉ូតូបើកក្រោយ លុះមកដល់ចំណុចកើតហេតុ រថយន្តបត់ឆ្វេងបំណងឆ្លងផ្លូវ តែមិនបានស៊ីញ៉ូទេ ទើបធ្វើឲ្យម៉ូតូដែលបើកខាងឆ្វេងពីក្រោយ ជាន់ហ្វ្រាំងដួល អូសទៅកៀបជាប់កង់រថយន្ត ហើយត្រូវបានប្រជាពលរដ្ឋនាំគ្នាលើកចេញពីរថយន្ត ហើយប្រហែលជាងកន្លះម៉ោងក្រោយមក ជនរងគ្រោះ ក៏បានស្លាប់តែម្តង។
ចំណែក បុរសអ្នកបើករថយន្ត ក្រោយកើតហេតុ បាននៅជួយមើលជនរងគ្រោះដែរ តែដោយស្ថានភាពជនរងគ្រោះកាន់ធ្ងន់ទៅៗ ក៏សម្រេចគេចខ្លួនបាត់តែម្តង។
ក្រោយកើតហេតុ សមត្ថកិច្ចមូលដ្ឋាន បានទាក់ទងសមត្ថកិច្ចជំនាញមកវាស់វែងយករថយន្ត និងម៉ូតូទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយទៅតាមច្បាប់នៅពេលក្រោយ។ រីឯសព ត្រូវបានប្រគល់ឲ្យសាច់ញាតិយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments