មន្ទីរប៉ងតាហ្កេន បាននិយាយនៅថ្ងៃពុធថា យន្តហោះដែលដឹកនាំដោយសហរដ្ឋអាមេរិក បានទម្លាក់គ្រាប់បែកជិត៥០០០គ្រាប់ នៅក្នុងសង្គ្រាមអាកាសប្រឆាំងនឹងពួកជីហាដនិយមរដ្ឋឥស្លាមនៅក្នុងប្រទេសអ៊ីរ៉ាក់ និងប្រទេសស៊ីរី ដោយធ្វើឲ្យខូចខាត និងកំទេចគោលដៅជាង៣០០០គោលដៅ ដែលក្នុងនោះរួមមានរថក្រោះដែរ។
តួលេខចុងក្រោយបង្អស់ដែលបានផ្សាយដោយយោធាសហរដ្ឋអាមេរិក ជាសញ្ញាបង្ហាញឲ្យឃើញការពង្រីកជាលំដាប់នូវទំហំនៃយុទ្ធនាការអាកាស ដែលបានធ្វើនៅក្នុងខែសីហា ហើយក៏បានបង្ហើបឲ្យដឹងដែរថា សត្រូវមានរថពាសដែក និងរថយន្តទំនើបៗរាប់រយគ្រឿងទៀត។
តាមស្ថិតិពីមន្ទីរប៉ង់តាហ្កេន បានឲ្យដឹងថា ចាប់តាំងពីការវាយប្រហារឆ្មក់តាមអាកាសរបស់ក្រុមចម្រុះ បានចាប់ផ្តើមនៅក្នុងប្រទេសអ៊ីរ៉ាក់នៅក្នុងខែសីហា និងនៅក្នុងប្រទេសស៊ីរីនៅចុងខែកញ្ញានោះយន្តហោះសហរដ្ឋអាមេរិក និងយន្តហោះរបស់សម្ព័ន្ធមិត្ត បានវាយប្រហារទៅលើរថក្រោះ៥៨គ្រឿង រថពាសដែក Humvee 184 គ្រឿងរថយន្តកាត់ដំបូល៣០៣គ្រឿង រថពាសដែក២៦គ្រឿង និងរថយន្តផ្សេងៗទៀតចំនួន៣៩៤គ្រឿង។
រថយន្តភាគច្រើនដែលត្រូវបានផលិតដោយសហរដ្ឋអាមេរិកនោះ ត្រូវបានរឹបអូសដោយពួកយុទ្ធជនរដ្ឋឥស្លាមពីកងទ័ពអ៊ីរ៉ាក់ ដែលដកថយ៕
0 Comments