ព្រះសីហនុ ៖ អភិបាល នៃគណៈអភិបាលខេត្តព្រះសីហនុ នៅព្រឹកថ្ងៃទី៩ឧសភានេះ បានជួបសំណេះសំណាលជាមួយកម្មករ កម្មការិនី និងនិយោជករោងចក្រតំបន់សេដ្ឋកិច្ចពិសេសបិតត្រាំង ស្រុកព្រៃនប់ ខេត្តព្រះសីហនុ ដើម្បីអបអរសាទរខួបលើកទី១៣៣ ទិវាពលកម្មអន្តរជាតិ ថ្ងៃ១ ខែឧសភា ឆ្នាំ២០១៩។
ថ្លែងក្នុងពិធីនេះដែរ លោក យន្ត មីន បានចូលរួមអបអរសាទរ និងបានអរគុណដល់បុគ្គលិក កម្មករ កម្មការិនី និងនិយោជក ដែលបានបំពេញ ការងារក្នុងចង្វាក់ផលិតកម្មតាមរោងចក្រ សហគ្រាសនានានៅក្នុងខេត្តព្រះសីហនុ ក្នុងនោះក៏បានរួមចំណែកដល់ការអភិវឌ្ឍកំណើនសេដ្ឋកិច្ចជាតិ ស្របពេលដែលប្រទេសជាតិមានសុខសន្តិភាព ក្រោមការដឹកនាំប្រកប ដោយកិត្តិបណ្ឌិតរបស់ប្រមុខរាជរដ្ឋាភិបាល មាន សម្ដេចអគ្គមហាសេនាបតីតេ ជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ធ្វើឲ្យប្រទេសជាតិមានការអភិវឌ្ឍន៍រីកចម្រើន ជាពិសេសការរីកចម្រើនរបស់ខេត្តព្រះសីហនុនាពេលបច្ចុប្បន្ន មានអគារពាណិជ្ជកម្មធំៗ កំពុងកើតមានឡើងជាបន្តបន្ទាប់ ដែលមានកម្ពស់រហូត ដល់ជាង៤០ជាន់។
លោកអភិបាលខេត្តព្រះសីហនុ ក៏បានលើកទឹកចិត្តដល់អ្នកវិនិយោគជាតិ និងបរទេស ដែលបានមកបណ្តាក់ទុនបង្កើត រោងចក្រ សហគ្រាសនៅតំបន់សេដ្ឋកិច្ចពិសេសបិតត្រាំងមានការកើនឡើងជាបន្តបន្ទាប់។ បង្កើតឲ្យមានទីផ្សារការងារច្រើនដល់ប្រជាពលរដ្ឋកម្ពុជា ក្នុងការចូលរួមចំណែកជួយកាត់បន្ថយភាពក្រីក្រ និងលើកកម្ពស់ជីវភាពរស់នៅរបស់ប្រជាពលរដ្ឋកាន់តែល្អប្រសើរឡើង៕
Source: Kampuchea Thmey Daily
0 Comments