បុរស​ជនជាតិ​កាណាដា​ប្រយុទ្ធ​ប្រឆាំងនឹង​ការកាត់ទោស​ប្រហារជីវិត​របស់​ចិន​នៅក្នុង​បណ្តឹង​ឧទ្ធរណ៍

តុលាការ​ចិន​ត្រូវបាន​គេ​រំពឹងថា​នឹង​បើកសវនាការ​នៅ​ថ្ងៃ​ព្រហស្បតិ៍​លើ​បណ្តឹងឧទ្ធរណ៍​រប​ស់បុ​រស​ជនជាតិ​កាណាដា​ម្នាក់​ប្រឆាំងនឹង​ការកាត់ទោស​ប្រហារជីវិត​ពីបទ​រត់ពន្ធ​គ្រឿងញៀន​នៅក្នុង​ករណី​មួយ​ដែល​ធ្វើ​ឲ្យ​មាន​ភាព​តានតឹង​កាន់តែខ្លាំង​ផ្នែក​ការទូត​រវាង​ទីក្រុង​ប៉េកាំង​និង​ទីក្រុង​អូ​តា​វ៉ា​។​

លោក Robert Lloyd Schellenberg អាយុ​៣៦​ឆ្នាំ​ត្រូវបាន​ផ្តន្ទាទោស​ប្រហារជីវិត​នៅក្នុង​ខែមករា​បន្ទាប់ពី​តុលាការ​ចាត់ទុក​ការកាត់ទោស​ជាប់ពន្ធនាគារ​រយៈពេល​១៥​ឆ្នាំ​របស់គាត់​លើក​មុន​ថា​ធូររលុង​ពេក​។​

សវនាការ​លើ​បណ្តឹងឧទ្ធរណ៍​នេះ​បាន​កើតឡើង​មួយថ្ងៃ​បន្ទាប់ពី​នាយក​ប្រតិបត្តិ​ក្រុមហ៊ុន​ទូរគមនាគមន៍​ដ៏​ធំ​របស់​ចិន Huawei លោកស្រី Meng Wanzhou បានបង្ហាញ​ខ្លួន​ក្នុង​តុលាការ​នៅ​ប្រទេស​កាណាដា​ដើម្បី​ប្រឆាំងនឹង​ការប៉ុនប៉ង​ធ្វើ​បត្យាប័ន​របស់​សហរដ្ឋ​អាមេរិក​ដែលជា​ហេតុ​បង្ក​ឲ្យ​មាន​ជម្លោះ​ការទូត​។​

ករណី​របស់លោក Schellenberg ត្រូវបាន​គេ​មើលឃើញថា​ជា​អានុភាព​សម្រាប់​លោកស្រី Meng ដែល​ត្រូវបាន​ចាប់ខ្លួន​តាម​សំណើ​ធ្វើ​បត្យាប័ន​របស់​សហរដ្ឋ​អាមេរិក​ទាក់ទង​នឹង​ការរំលោភ​ទណ្ឌកម្ម​អ៊ីរ៉ង់​។​

បន្ទាប់ពី​ការចាប់ខ្លួន​នាយក​ប្រតិបត្តិ​របស់​ក្រុមហ៊ុន Huawei នៅក្នុង​ខែធ្នូ​, ប្រទេស​ចិន​បាន​ឃុំឃាំង​អតីត​អ្នកការទូត​កាណាដា​ឈ្មោះ Michael Kovrig និង​អ្នកជំនួញ​លោក Michael Spavor នៅក្នុង​អ្វីដែល​ក្រុម​អ្នកសង្កេតការណ៍​មើលឃើញថា​ជាការ​សងសឹក​។​

ស្របពេល​ជាមួយគ្នា​នោះ នាយករដ្ឋមន្ត្រី​កាណាដា​លោក Justin Trudeau បាន​និយាយថា ប្រទេស​ចិន​បានជ្រើសរើស​យក​ការកាត់ទោស​ប្រហារជីវិត​លោក Schellenberg ហើយ​រដ្ឋាភិបាល​របស់​លោក​បាន​អំពាវនាវ​សុំ​ឲ្យ​មានការ​អត់ធ្មត់​។​

ការប្តឹង​ឧទ្ធរណ៍​របស់លោក Schellenberg ត្រូវបាន​គេ​រំពឹងថា​នឹង​ប្រព្រឹត្តទៅ​នៅ​តុលាការ Dalian Intermediate People ក្នុង​ខេត្ត Liaoning ភាគ​ឦសាន​។​
​ក្រសួងការបរទេស​ចិន​បាន​និយាយថា ប្រទេស​ចិន​គឺជា​ប្រទេសមួយ​ដែល​គ្រប់គ្រង​ដោយ​ច្បាប់​ហើយនឹង​ការពារ​សិទ្ធិ​ស្របច្បាប់​របស់លោក Schellenberg ។​

គួរ​បញ្ជាក់ថា ពីដំបូង លោក Schellenberg ត្រូវបាន​ផ្តន្ទាទោស​ឲ្យ​ជាប់ពន្ធនាគារ​រយៈពេល​១៥​ឆ្នាំ​និង​ពិន័យ​ជា​ប្រាក់​១៥០,០០០​យ័ន (២២,០០០​ដុល្លារ​អាមេរិក​) នៅក្នុង​ខែវិច្ឆិកា​។​

ប៉ុន្តែ​បន្ទាប់ពី​ការប្តឹង​ឧទ្ធរណ៍​មួយ តុលាការ​កំពូល​ក្នុង​ខេត្ត Liaoning បានសម្រេច​កាលពី​ខែធ្នូ​ថា ការ ផ្តន្ទាទោស​នេះ​គឺ​ស្រាល​ពេក​ដោយសារតែ​ភាព​ធ្ងន់ធ្ងរ​នៃ​ឧក្រិដ្ឋកម្ម​របស់គាត់​៕ AFP

​

Source: Kampuchea Thmey Daily