ការប្រកួតកីឡាហែលទឹកពានរង្វាន់យុវជន ដែលឧបត្ថម្ភដោយ K-Cement នៅល្ងាចថ្ងៃទី៦ខែមករា ដែលជាថ្ងៃដំបូងនោះ មានរហូតដល់ទៅ១១វិញ្ញាសា ដែលវិញ្ញាសាភាគច្រើនគឺជាការប្រកួតជម្រុះតាមស៊េរីប៉ុណ្ណោះ។
បើតាមលោកហែម ថុន អគ្គលេខាធិការសហព័ន្ធកីឡាហែលទឹកកម្ពុជា ឲ្យដឹងនោះថា មានតែវិញ្ញាសាហែល១០០ម៉ែត្រ របៀបកង្កែបនារីអាយុលើ១៦ឆ្នាំតែមួយ ប៉ុណ្ណោះ ដែលប្រកួតផ្ដាច់ព្រ័ត្រដែលវិញ្ញាសានេះ មានកីឡាការិនីចូលរួមចំនួនតែ ៤ រូបប៉ុណ្ណោះ។
វិញ្ញាសានេះ ចំណាត់ថ្នាក់លេខ ១ បានទៅកីឡាការិនីហែមថុន វិទិនី សមាគមក្រសួងមហាផ្ទៃដែលហែលក្នុងថិរវេលា១នាទី២៦វិនាទី១២។ ចំណាត់ថ្នាក់លេខ ២ កីឡាការិនីសុខ វរល័ក្ខណ វិទ្យាល័យជម្ពូវ័ន្ដហែលក្នុងថិរវេលា១នាទី២៨វិនាទី ចំណាត់ថ្នាក់លេខ ៣ កីឡាការិនីសេង សម្ផស្ស ក្លឹបគមនាគមន៍ថិរវេលា១នាទី៤០វិនាទី៤១។
ចំពោះវិញ្ញាសាដទៃទៀតនោះ មានហែល១០០ម៉ែត្ររបៀបសេរីបុរសអាយុលើ១៦ ឆ្នាំមាន២ស៊េរី ដែលលេខ១ក្នុងស៊េរីនេះ គឺកីឡាករ ធឿន ចាន់ថុល ប្រើថិរវេលា១នាទី០១វិនាទី០១ លេខ២ កីឡាករហែម ថុនពន្លឺ ថិរវេលា ១នាទី០២វិនាទី១៦ លេខ៣ កីឡាករចេង ពិរោទ ថិរវេលា ១នាទី០២វិនាទី៦៩។ អ្នកជាប់លេខទាំងបីនេះ មកពីក្លឹបក្រសួងមហាផ្ទៃដូចគ្នា។ ហែល៥០ ម៉ែត្របុរសអាយុក្រោម១៦ឆ្នាំ លេខ១ក្នុងស៊េរីនេះ គឺកីឡាករ ម៉េត សុភក្ត្រា មជ្ឈមណ្ឌលជាតិហ្វឹកហ្វឺនកីឡា ថិរវេលា៣១វិនាទី៣៦ លេខ២ កីឡាករ ប៊ន កៅលាង ខេត្តកំពង់ចាម ថិរវេលា៣២វិនាទី៣៨ និងលេខ៣កីឡាករឆោម ច័ន្ទថន ក្រសួងមហាផ្ទៃ ថិរវេលា ៣៣វិនាទី២៩។
ចំណែកវិញ្ញាសាហែល៥០ម៉ែត្ររបៀបកង្កែបនារីអាយុក្រោម១៦ឆ្នាំវិញ លេខ១ក្នុងស៊េរីនេះ គឺកីឡាការិនីម៉េត ម៉ារីយ៉ាន ក្រសួងមហាផ្ទៃ ថិរវេលា៤៦វិនាទី៤៩ លេខ២កីឡាការិនី ម៉ក់ បុប្ផា ខេត្តកំពង់ចាម ថិរវេលា ៤៨វិនាទី៥៣ និងលេខ៣កីឡាការិនី អ៊ុំ រាជ្យនីធម៌ មជ្ឈមណ្ឌលជាតិហ្វឹកហ្វឺនកីឡា ថិរវេលា៥៨វិនាទី៤១។
សម្រាប់ការប្រកួតក្នុងថ្ងៃទីពីរ(០៧មករា២០១៥)នេះ ជាការប្រកួតបញ្ចប់លើវិញ្ញាសា១០០ម៉ែត្រកង្កែបបុរសអាយុលើ១៦ឆ្នាំមាន២ស៊េរី វិញ្ញាសា១០០ម៉ែត្រសេរីនារីអាយុលើ១៦ឆ្នាំ។
វិញ្ញាសាហែល៥០ម៉ែត្រកុមារាអាយុក្រោម១២ឆ្នាំមាន៣ស៊េរី វិញ្ញាសាហែល៥០ម៉ែត្ររបៀបសេរីកុមារីអាយុក្រោម១២ឆ្នាំមាន ២ ស៊េរី ។ វិញ្ញាសាហែល១០០ម៉ែត្ររបៀបសេរីនារីអាយុក្រោម១៦ឆ្នាំនិង វិញ្ញាសា១០០ម៉ែត្រហែលរបៀបកង្កែបបុរសអាយុក្រោម១៦ឆ្នាំមាន៣ ស៊េរី។
តាមការគ្រោងទុក ការប្រកួតកីឡាហែលទឹកពានរង្វាន់យុវជន នេះ នឹងបញ្ចប់នៅល្ងាចថ្ងៃទី០៨ ខែមករា ឆ្នាំ២០១៥នេះ៕
0 Comments