ភ្នំពេញ ៖ លោករដ្ឋមន្ត្រីក្រសួងព័ត៌មាន ខៀវ កាញារីទ្ធ បានបង្ហាញពីចំណុចខ្សោយរបស់យើងថា យើងមានវិទ្យុស្ទើរគ្រប់កន្លែង ប៉ុន្តែការផ្សាយរបស់យើងហាក់ដូចមិនសូវបានលទ្ធផលល្អ គឺដោយសារយើងមិនអាចក្ដាប់បានថាតើប្រជាជនគាត់ចង់ដឹងអ្វីខ្លះ យើងផ្សាយតែព័ត៌មានពិធីការ ផ្សាយតែរឿងអ្នកធំ ចៅហ្វាយខេត្តចុះធ្វើនេះ ចុះធ្វើនោះ ប៉ុន្តែអ្វីដែលជាកង្វល់របស់ប្រជាពលរដ្ឋយើងដោះមិនចេញ។
ក្នុងពិធីប្រគល់ត្រាចូលកាន់តំណែងរបស់លោក ផុស សុវណ្ណ អគ្គនាយកព័ត៌មាន និងសោតទស្សន៍ នៃក្រសួងព័ត៌មាន ជំនួសលោក ប៊ុត បូវុធ ដែលត្រូវចូលនិវត្តន៍ នារសៀលថ្ងៃទី០៦ ខែមករា ឆ្នាំ២០១៥ នៅទីស្ដីការក្រសួង លោក រដ្ឋមន្ត្រីថ្លែងថា ក្នុងការជំរុញការផ្សាយព័ត៌មានតាមប្រព័ន្ធព័ត៌មានវិទ្យាឲ្យកាន់តែសកម្ម ដែលបច្ចុប្បន្ន ការផ្សាយព័ត៌មានកំពុងស្ថិតក្នុងស្ថានភាពមួយរង់ចាំព្រនង់ច្រើនជាងការវាយលុក ដូច្នេះស្នើឲ្យប្រព័ន្ធផ្សព្វផ្សាយទាំងអស់ប្រើយុទ្ធសាស្ត្រខ្យង (រឿងព្រេងខ្មែរខ្យង និងទន្សាយ) ដើម្បីឲ្យការផ្សាយព័ត៌មានកាន់តែមានប្រសិទ្ធភាពនោះ។
លោករដ្ឋមន្ត្រីក្រសួងព័ត៌មានបានបញ្ជាក់ថា កន្លងមកព័ត៌មានយើងបញ្ជូនព័ត៌មានមកតែភ្នំពេញ ប៉ុន្តែយើងមិនបញ្ជូនទៅខេត្តគ្នាឯង ដូច្នេះយើងត្រូវប្រើយុទ្ធសាស្ត្រតូច គឺយុទ្ធសាស្ត្រខ្យង ព្រោះថាសត្វខ្យងស្រែកបណ្ដាក់គ្នាទើបឈ្នះទន្សាយ ដូច្នេះយើងក៏ដូចគ្នាដែរមធ្យោបាយយើងតិច ប៉ុន្តែបើយើងចេះបណ្ដាក់គ្នា យើងអាចបញ្ចូលសំឡេងហ្នឹងបាន។ ចំណុចខ្សោយយើងមួយទៀត យើងមានវិទ្យុស្ទើរគ្រប់កន្លែង ប៉ុន្តែការផ្សាយរបស់យើងហាក់ដូចមិនសូវបានលទ្ធផលល្អ គឺដោយសារយើងមិនអាចក្ដាប់បានថាតើប្រជាជនគាត់ចង់ដឹងអ្វីខ្លះ យើងផ្សាយតែព័ត៌មាន ពិធីការ ផ្សាយតែរឿងអ្នកធំ ចៅហ្វាយខេត្តចុះធ្វើនេះ ចុះធ្វើនោះ ប៉ុន្តែ អ្វីដែលជាកង្វល់របស់គាត់យើងដោះមិនចេញ។
លោករដ្ឋមន្ត្រីបន្តថា នៅដើមឆ្នាំថ្មីនេះវិទ្យុAMនឹងចាប់ដំណើរការ ដែល មានកម្លាំង៦០០គីឡូវ៉ាត់ គ្រប់គ្រាន់សម្រាប់ការផ្សាយហើយ សង្ឃឹមថាមួយឆ្នាំ ឬពីរឆ្នាំទៀតទូរទស្សន៍ឌីជីថល យើងអាចបំបែក៣ កាណាល់បាន ដូច្នេះអ្នកដឹកនាំត្រូវចេះគ្រប់គ្រងព័ត៌មាន គ្រប់គ្រងបុគ្គលិក រក្សាសាមគ្គីផ្ទៃក្នុងជាការចាំបាច់បំផុត។
លោក ខៀវ កាញារីទ្ធ បន្ថែមថា យើងនឹងខិតខំរួមគ្នា ហើយត្រូវយល់ថា ការងារព័ត៌មានជាការងារសមូហភាព វាមិនអាចដាច់ដោយឡែកៗបានទេ យើងម្នាក់ឯងមិនអាចធ្វើអ្វីបានទាំងអស់ គឺទៅមិនរួចទេ ដូច្នេះត្រូវយល់ពីស្មារតីសមូហភាពនេះជាការសំខាន់ណាស់ ក្នុងការជំរុញឲ្យការងារព័ត៌មានរបស់យើងបានទទួលជោគជ័យ។ លោករដ្ឋមន្ត្រីសង្ឃឹមថា ពីឆ្នាំ២០១៥នេះទៅយើងធ្វើការផ្លាស់ប្ដូរការផ្សាយរបស់យើងឲ្យកាន់តែរស់រវើកថែមទៀត៕
0 Comments