កំពង់ឆ្នាំង ៖ ជនសង្ស័យម្នាក់មានរហស្សនាមកណ្ដុរជ្រែកដី ក្នុងចំណោមបក្សពួក៤នាក់ត្រូវបានកម្លាំងនគរបាលព្រហ្មទណ្ឌក្រុងកំពង់ឆ្នាំងដេញចាប់ឃាត់ខ្លួនបាននៅវេលាម៉ោង១០និង៣០នាទីយប់ថ្ងៃទី៥ ខែមករា ឆ្នាំ២០១៥ នៅចំណុចមុខមុខស្ថានីយវិទ្យុ មហាសាលស្ថិតក្នុងភូមិធម្មយុត្តិ សង្កាត់កំពង់ឆ្នាំង ក្រុងកំពង់ឆ្នាំង ខណៈដែលជនសង្ស័យរូបនោះបានគំរាមកាប់បុរសម្នាក់ ដែលគ្រាន់តែគាត់ក្អកសោះ។
លោក ម៉ា យន្ត នាយផ្នែកនគរបាលព្រហ្មទណ្ឌក្រុងកំពង់ឆ្នាំង បានឲ្យដឹងថា នៅមុនពេលកើតហេតុ មានក្រុមក្មេងទំនើងមួយក្រុមមានគ្នា៤នាក់ បានស្រែកឡូឡានៅចំណុចសួនច្បារផ្សារក្រោម ពេលនោះសមត្ថកិច្ចបានដេញឲ្យត្រឡប់ទៅផ្ទះវិញ កុំស្រែកឡូឡានៅទីនេះទៀត។ បន្ទាប់មកក្រុម ក្មេងទាំងនេះបានដើរត្រឡប់មកវិញ ពេលមកដល់ចំណុចមុខស្ថានីយវិទ្យុមហាសាល មានមនុស្សចាស់ មួយក្រុមដែលអង្គុយចាំរថយន្ត គាប់ជួនពេលនោះមានបុរសម្នាក់បានក្អក ក៏ស្រាប់តែជនសង្ស័យម្នាក់ក្នុង ចំណោម៤នាក់ បានស្រែកសម្លុតថា អាក្អក អញ្ចឹងបានក្បាលមួយដាវទើបសមមុខ គ្រាន់តែឮគំរាមដូច្នេះ នោះបុរសដែលក្អកនោះក៏ភ័យខ្លាច ក៏បានទូរស័ព្ទប្តឹងនគរបាល ហើយពេលនោះកម្លាំងនគរបាលដែលកំពុងចេញល្បាតស្រាប់ផងនោះក៏បានទៅដល់កន្លែងកើតហេតុព័ទ្ធចាប់ក្រុមក្មេងទំនើងទាំងនោះតែគេបានរត់គេចខ្លួនអស់ គឺចាប់បានតែម្នាក់ក្នុងចំណោមពួកគេ៤នាក់។
លោក ម៉ា យន្តបានឲ្យដឹងទៀតថា ជនសង្ស័យរូបនោះមានឈ្មោះ សុខ ម៉ាក់ អាយុ១៩ឆ្នាំ មានទីលំនៅភូមិធម្មយុត្តិ សង្កាត់ប្អេរ ក្រុងកំពង់ឆ្នាំង ជាមុខសញ្ញាចាស់ ដែលមានរហស្សនាមកណ្ដុរជ្រែកដី គឺពូកែលួចណាស់ គឺមានមុខរបរលួចតាំងពីកុមារភាពរហូតដល់ធំពេញវ័យ។
ជនសង្ស័យខាងលើត្រូវបាននគរបាលក្រុងកំពង់ឆ្នាំង កសាងសំណុំរឿងបញ្ជូនទៅស្នងការដ្ឋាន នគរបាលខេត្ត ដើម្បីកសាងសំណុំរឿងបន្តទៅតុលាការខេត្ត ដោយចោទពីបទប៉ុនប៉ងបង្ករបួសស្នាម និងចរាចរណ៍អាវុធខុសច្បាប់បង្កគ្រោះថ្នាក់៕
0 Comments