អ្នកប្រដាល់នូវ ស៊ីថា ក្លិបតាឡីដំរីមានរិទ្ធ នឹងជួបប្រកួតជម្រះបញ្ជីជាមួយសោម តឿ ទី អ្នកប្រដាល់ក្លិបខ្លារខិនមានរិទ្ធ នៅលើសង្វៀនSEA-TV នាព្រឹកថ្ងៃអាទិត្យទី១១ ខែមករា ឆ្នាំ២០១៥នេះ។
អ្នកប្រដាល់ទាំងពីរនាក់នេះ ធ្លាប់ប៉ះគ្នាម្តងកាលពីថ្ងៃទី២៤ ខែកុម្ភៈ ឆ្នាំ២០១៣ ដែលកាល ណោះពួកគេប្រកួតស្មើពិន្ទុគ្នា។ រយៈពេលជិត២ឆ្នាំ ដែលមិនបានជួបគ្នានេះ ទាំងនូវ ស៊ីថា ទាំងសោម តឿទី សុទ្ធតែមានការរីកចម្រើនជាងមុនដូចគ្នា។
នូវ ស៊ីថា ជាអ្នកប្រដាល់ដែលវាយអាងកម្លាំងបាយ ហើយស្នៀតប្រចាំត្រកូលរបស់គេ គឺកណ្តាប់ដៃនេះឯង ដែលមួយដៃៗដែលគេវាយចេញទៅលើគូប្រកួតនោះ គឺមានកម្លាំងខ្លាំង ហើយបើគូប្រកួតភ្លាត់ត្រូវកណ្តាប់ដៃរបស់គេនោះ ប្រាកដជាសន្លប់មិនខាន។ ប៉ុន្តែយ៉ាងណា ការប្រកួតរបស់នូវ ស៊ីថា ប៉ុន្មានប្រកួតចុងក្រោយ ពិសេសក្នុងការប្រកួតជម្រុះខ្សែក្រវាត់កន្លងមកនេះ គឺជួបសំណាងអាក្រក់ជានិច្ច ពោលគឺពុំដែលបានឈ្នះគេនោះទេ។ ការប្រកួតចុងក្រោយនេះ ស៊ីថាវាយចាញ់ថៃ ប៊ុនហាន អ្នកប្រដាល់ក្លិបឫទ្ធីពោធិសែនជ័យក្នុងទឹកទី១។
សោម តឿទី គេក៏មិនខុសពីនូវ ស៊ីថា ប៉ុន្មានដែរ គឺប្រកួតមិនដែលឈ្នះនរណាទេ។ តឿទីនេះ ក៏ជាអ្នកប្រដាល់មានជំនាញខាងកណ្តាប់ដៃដែរ ហើយក៏ជាអ្នកនិយមប្រើកម្លាំងបាយ ដើម្បីដោះស្រាយភាពឈ្នះចាញ់ផងដែរ។ ការប្រកួតចុងក្រោយនេះ តឿទីវាយចាញ់ ផាន់ ចំណាន អ្នកប្រដាល់ក្លិបគុជសាកីឡាក្នុងទឹកទី១ដែរ។
សម្រាប់ការជួបគ្នារវាងនូវ ស៊ីថា និង សោម តឿទីនេះ ពិបាកសន្និដ្ឋានមុនថា អ្នកណាឈ្នះ អ្នកណាចាញ់នោះណាស់ ព្រោះកម្រិតសមត្ថភាពបច្ចេកទេសប្រដាល់របស់ពួកគេទាំងពីរ មានភាពប្រដំប្រសងគ្នា ។ ចាំមើល ការជួបគ្នាលើកទី២នេះ តើនរណាជាអ្នកទទួលបានជ័យជំនះនោះ? នឿន វ៉ាន់ឌី អ្នកប្រដាល់ក្លិបអេភូថងកីឡា នឹងត្រូវជួបប្រកួតជាមួយឯក កៃឈៀង អ្នកប្រដាល់ក្លិបម្កុដរាជសីហ៍ ក្នុងប្រភេទទម្ងន់៦៥គីឡូក្រាម។ ពីរនាក់នេះ មិនធ្លាប់ដែលជួបគ្នាទេពីមុនមក។
ឯក កៃឈៀង គេមិនសូវបានបង្ហាញមុខញឹកញាប់លើសង្វៀនទេ គឺយូរៗបានឡើងម្តងប៉ុណ្ណោះ។ ជាអ្នកប្រដាល់ដែលមិនមានឈ្មោះល្បីនោះ គេកម្រចាប់ផ្គូឲ្យប្រកួតណាស់។ ប៉ុន្តែទោះជាយ៉ាងនេះក្តី នឿន វ៉ាន់ឌី មិនអាចមើលស្រាលកៃឈៀងនោះទេ ព្រោះថា កៃឈៀងពេលខ្លះ គេវាយមានផ្លែល្អគួរសមដែរ ពិសេសគឺស្នៀតកែងរបស់គេ។
សម្រាប់ការជួបគ្នារវាងនឿន វ៉ាន់ឌី និង ឯក កៃឈៀងនេះ ក៏គ្មាននរណាហ៊ានទស្សន៍ទាយមុនថា អ្នកណាជាអ្នកឈ្នះនោះដែរ ? ការប្រកួតចុងក្រោយរបស់វ៉ាន់ឌី គឺវាយឈ្នះសុខ ចិន្តា អ្នកប្រដាល់ក្លិបឃ្លាំងមឿងកីឡាក្នុងទឹកទី២។ ចំពោះការប្រកួតចុងក្រោយរបស់ឯកកៃឈៀងវិញ គឺវាយឈ្នះមាសឆូយអ្នកប្រដាល់ក្លិបយុវជនកម្ពុជាមានជ័យក្នុងទឹកទី២។
ប៊ិត ប៊ុនធឿន អ្នកប្រដាល់ក្លិបតាព្រហ្មមានជ័យ ត្រូវគេផ្គូឲ្យជួបប្រកួតជាមួយសា ន រាជសីហ៍ អ្នកប្រដាល់ក្លិបក្រសួងការពារជាតិ ដោយប្រកួតក្នុងទម្ងន់៦៣,៥០០គីឡូក្រាម។ ពួកគេទាំងពីរនាក់នេះ ពុំដែលធ្លាប់ជួបគ្នាទេកន្លងមក។
ទាំងប៊ិត ប៊ុនធឿន ទាំងសាន រាជសីហ៍ ពួកគេបានខកខានឡើងប្រកួតយូរមកហើយដូចគ្នា។ ដូច្នេះសម្រាប់ការជួបគ្នានេះ ពុំដឹងថានរណាឈ្នះ នរណាចាញ់នោះឡើយ ? ម៉ន រិទ្ធី អ្នកប្រដាល់ក្លិបការិយាល័យទី៥ កងទ័ពជើងគោក នឹងប្រកួតជាមួយសាង សី អ្នកប្រដាល់ក្លិបឃ្លាំងមឿងកីឡា ក្នុងទម្ងន់ស្រាល៥១គីឡូក្រាម។ អ្នកប្រដាល់ជើងថ្មីពីរ នាក់នេះល្អ និងខ្លាំងគួរសម ដោយពួកគេវាយមិនដកដៃទេ តែអ្នកណាឈ្នះអ្នកណាចាញ់ នោះ មិនអាចថាមុនបានទេ៕
0 Comments