សារព័ត៌មានតំបន់ឲ្យដឹងថា ការជួលការិយាល័យនៃប្រទេសសិង្ហបុរី កំពុងតែត្រៀមខ្លួនកើនឡើងខ្លាំងបំផុត ក្នុងរយៈពេល៤ឆ្នាំ គិតត្រឹមឆ្នាំ ២០១៤ និងអាចពន្យារការបានផលនៅឆ្នាំនេះ ក្នុងទីផ្សារដែលមានការផ្គត់ផ្គង់មិនទាន់គ្រប់គ្រាន់។ សន្ទស្សន៍នៃការជួលការិយាល័យ សម្រាប់តំបន់ល្អសំខាន់ៗ បានកើនឡើង ៨,៧% ក្នុងរយៈពេល ៩ ខែដើមឆ្នាំ កាលពីឆ្នាំកន្លងទៅ ដែលជាការជម្រុលទៅរកការទទួលបានផលចំណេញធំបំផុតរបស់ខ្លួន គិតតាំងពីឆ្នាំ ២០១០ ពេលដែល បានឡើងថ្លៃដល់ ១២%។ យោងតាមទិន្នន័យទទួលពីអាជ្ញាធរអភិវឌ្ឍនគរោបនីយកម្មឡើងវិញ។
ការផ្គត់ផ្គង់មិនគ្រប់គ្រាន់ នូវលំហការិយាល័យធំថ្មីៗ ក្នុងពេលពីរឆ្នាំកន្លងទៅ ធៀបទៅនឹងសេចក្តីត្រូវការពីក្រុមហ៊ុននានា ដែលស្វែងរកទីតាំងការិយាល័យកណ្តាល អាចនឹងរុញការឡើងថ្លៃឈ្នួល រហូតដល់ប្រមាណ ១៤% (យោងតាមក្រុមហ៊ុនយកកម្រៃពីការលក់អចលនទ្រព្យ Savills Plc.)។ ការមានការផ្គត់ផ្គង់មិនទាន់គ្រប់អាចនឹងបន្តមាននៅឆ្នាំនេះ និងឆ្នាំក្រោយ សូម្បីតែសេចក្តីត្រូវការមានការស្រាកបន្តិច ពេលដែលសេដ្ឋកិច្ចថយកម្លាំង។ មានការលើកឡើងថា ចូលឆ្នាំ ២០១៥ សេចក្តីត្រូវការអាចនឹងឡើងមកប្រដំប្រសងគ្នានឹងការផ្គត់ផ្គង់ទីកន្លែងការិយាល័យ និងថា ម្ចាស់អាគារ ក៏កំពុងស្ថិតក្នុងជំហរមួយរឹងមាំ ទប់ទល់នឹងការទាមទារបញ្ចុះថ្លៃ ដល់កម្រិតណាមួយ រហូតទីកន្លែងថ្មីនៅឆ្នាំនេះ និងឆ្នាំក្រោយធ្វើហើយ។
នៅឆ្នាំ ២០១៥ មានទីកន្លែងការិយាល័យថ្មី ប្រមាណ ១,១៥ លានហ្វ៊ីតក្រឡា នឹងធ្វើហើយ ធៀបទៅ ១,៨៥ លានហ្វ៊ីតក្រឡា ក្នុងឆ្នាំ ២០១៤ (តាមការអះអាង របស់ Alice Tan នាយកនៃក្រុមហ៊ុនយកកម្រៃលក់អចលនទ្រព្យ ផ្នែកពិគ្រោះយោបល់ និងស្រាវជ្រាវ Frank LLP)។ មានម្ចាស់ខ្លះ ជំរុញឲ្យអ្នកជួលទទួលយកនូវការជួលរយៈពេលវែងខុសពីធម្មតា ក្នុងក្តីបារម្ភថាទីកន្លែងការងារថ្មីច្រើនទៀត នឹងអាចធ្វើហើយ សម្រាប់ជួល ក្នុងរយៈពេល ២ ឆ្នាំ គិតពីពេលនេះ ដែលនឹងធ្វើឲ្យទីផ្សារលែងរឹងមាំ។
ជំនួសឲ្យការជួលរយៈពេល ៣ ឆ្នាំ ជាប្រពៃណី សម្រាប់ការជួលការិយាល័យ ម្ចាស់អាគារបានឆ្លើយតបទៅការនឹងមានការផ្គត់ផ្គង់បន្ថែម ដោយសូមឲ្យមានការព្រមព្រៀងជួលពី ៥ ទៅ ៦ ឆ្នាំ ដើម្បីស្រេះថ្លៃខ្ពស់បច្ចុប្បន្ន។ អ្នកជួលក៏សូមឲ្យមានការចុះថ្លៃ ក្នុងការដោះដូរឲ្យមានការជួលរយៈពេលវែង។ សន្ទស្សន៍ថ្លៃឈ្នួល សម្រាប់ទីតាំងការិយាល័យ នៅតំបន់កណ្តាល បានកើនឡើងដល់ ១៩២,៣ នៅដំណាច់ខែកញ្ញា កាលពីឆ្នាំកន្លងទៅ ឡើងពី ១៧៦,៩០ នៅដំណាច់ឆ្នាំ ២០១៣ និងខ្ពស់បំផុត គិតតាំងពីការចប់ត្រីមាស ខែធ្នូ ឆ្នាំ ២០០៨៕
0 Comments