យក្ស​សាជីវកម្ម​៣​ជំរុញ​ការ វិនិយោគ​ថៃ​ នៅ​វៀតណាម

សារព័ត៌មាន​តំបន់​ឲ្យដឹងថា​ ក្រុម​សាជីវកម្ម​ថៃ​បី​ធំ​ជាង​គេ​បង្អស់ បាន​ស្នើ​ជា​គម្រោង​លក់រាយ និង​ឧស្សាហកម្ម នៅ​ប្រទេស​វៀតណាម ដែល​អាច​បង្កើន​ការវិនិយោគ​របស់​ថៃ​នៅក្នុង​ប្រទេស សមាជិក​អាស៊ាន​មួយ​នេះ ​ដល់ ៥០០%​។ យោងតាម VietnamNet ប្រធាន​កំពូលៗ នៃ​ក្រុមហ៊ុន PTT Plc, the Central Group និង Amata Corp Plc បាន​ស្នើ​សុំ​ទៅ​នាយករដ្ឋមន្ត្រី ង្វៀន តាន់ យុង នូវ​គម្រោង​មួយ​ចំនួន ដែល​បើ​សម្រេច​បាន​សព្វគ្រប់ នឹង​បង្កើន​ការ​វិនិយោគ​នៃ​ប្រទេស​ថៃ បួន ទៅ ប្រាំ​ដង នៃ​ទំហំ​បច្ចុប្បន្ន​៧ ពាន់​លាន​ដុល្លារ ជា​ទុន​ចុះបញ្ជី។

គម្រោង​ទាំងនោះ​រួមមាន​ការពង្រីក គម្រោង​ចម្រាញ់​ប្រេង នៅ​តំបន់​សេដ្ឋកិច្ច​ពិសេស Nhom Hoi ក្នុង​ខេត្ត ប៊ិ​ញ​ឌិ​ញ គម្រោង​នគរោបនីយកម្ម​ ៥ ពាន់​លាន​ដុល្លារ​របស់ Amata ក្នុង​ខេត្ត ក្វាង​និ​ញ និង​ការពង្រីក​មជ្ឈមណ្ឌល​លក់​ដូរ Robins Shopping Centre ពី​ក្រុង ហាណូយ​ទៅ​ក្រុង ហូជីមិញ​។ គិត​ត្រឹម​ថ្ងៃ ១៥ ធ្នូ ក្រុម​អ្នកវិនិយោគ​ថៃ បានដាក់​ឲ្យ​ដំណើរការ​គម្រោង​ចំនួន ៣៧៤ នៅ​ប្រទេស​វៀតណាម មាន​ទំហំ​ប្រមាណ ៦,៧ ពាន់​លាន​ដុល្លារ ដាក់​ប្រទេស​ថៃ​នៅ​លំដាប់​ទី ១០ ក្នុងចំណោម​ប្រទេស​ និង​ទឹកដី ១០១ ដែល​បាន​វិនិយោគ នៅ​វៀតណាម។

អ្នកវិនិយោគ​ថៃ បាន​ផ្តោតជាសំខាន់​ទៅលើ​ឧស្សាហកម្ម​កែច្នៃ និង​កម្មន្តសាល​កម្ម ជាមួយ ១៧៩ គម្រោង និង​ប្រាក់​ទុន​ចុះបញ្ជី​សរុប ៥,៧ ពាន់​លាន​ដុល្លារ ព្រមទាំង​វិស័យ​កសិកម្ម ព្រៃឈើ និង​នេសាទ មាន ២៨ គម្រោង និង​មាន​ទុន ៤៧៥ លាន​ដុល្លារ​។ វិស័យ​ផ្សេងទៀត ដែលមាន​ការចាប់អារម្មណ៍​ដែរ រួមមាន សំណង់ ពាណិជ្ជកម្ម​ជា​ដុំ និង​រាយ​ ការ​ស្នាក់នៅ និង​ការបម្រើ​អាហារ៕