ប្រភពព័ត៌មានពីកន្លែងកើតហេតុបានឲ្យដឹងថា នៅវេលាកើតហេតុគេឃើញរថយន្តហាយប្រ៊ីត ពណ៌ទឹកប្រាក់ ពាក់ស្លាកលេខភ្នំពេញ 2Q-2203 បើកបរដោយយុវជនម្នាក់មានសភាពស្រវឹងស្រា បានបើកតាមបណ្ដោយផ្លូវលេខ២៤០ ទិសដៅពីកើតទៅលិច លុះមកដល់ចំណុចកើតហេតុ ក៏បានរេចង្កូតជ្រុលទៅបុកជញ្ជាំងការដ្ឋានសំណង់ និងបង្គោលស្លាកសញ្ញាចរាចរណ៍រងការខូចខាត។
ប្រភពព័ត៌មានបានបន្តថា ក្រោយកើតហេតុអ្នកបើកបរ រថយន្តបង្កបានគេចខ្លួនបាត់បន្សល់ទុកតែរថយន្តនៅនឹងកន្លែងកើតហេតុ ហើយមួយសន្ទុះក្រោយមកក៏មានមិត្តភ័ក្ដិ បងប្អូន បានមកដោះស្រាយជាមួយនឹងសមត្ថកិច្ចផងដែរ។
ប៉ុន្តែអ្វីដែលមិនប្រក្រតីនៅក្នុងគ្រោះថ្នាក់ចរាចរណ៍នេះ គឺខាងភាគីរថយន្តបង្កហេតុបានទំនាក់ទំនងសុំការអន្តរាគមន៍ ដើម្បីយករថយន្តនេះចេញពីកន្លែងកើតហេតុ ដោយសំអាងថាជារឿងបន្តិចបន្តួច ហើយមួយសន្ទុះក្រោយមកសមត្ថកិច្ចមូលដ្ឋានហាក់ដូចជាត្រូវរ៉ូវគ្នា ក៏បានអនុញ្ញាតឲ្យរថយន្តបង្កនោះចេញទៅបាត់តែម្តង ខណៈដែលសមត្ថកិច្ចជំនាញមិនទាន់នឹងទៅដល់កន្លែងកើតហេតុផងនោះ៕
រថយន្តហាយប្រ៊ីតរេចង្កូតជ្រុលបុកជញ្ជាំងការដ្ឋានសំណង់ និងបង្គោលស្លាកសញ្ញាចរាចរណ៍
0 Comments