អភិបាលខេត្ត​សៀមរាប​ បើក​កិច្ចប្រជុំ​ពិភាក្សា​ការងារ​

សៀមរាប ៖ នា​រសៀល​ថ្ងៃ​ទី​១២ ខែ​កុម្ភៈ ឆ្នាំ​២០១៩​ មាន​ជំនួប​ពិភាក្សា​ការងារ​លើ​គម្រោង​សាកល្បង​អំពី​បច្ចេកវិទ្យា​ថ្មី​សាងសង់​កម្រាល និង​ចិញ្ចើម​ផ្លូវ​ដោយ​បេតុង​ជ្រាប​ទឹក តាម​បណ្ដោយ​ផ្លូវ ២​ធ្នូ ប្រវែង​៩៣​ម៉ែត្រ ពី​ចំណុចប្រសព្វ Pub Street ដល់​មុខ​ខ្លោងទ្វារ​មន្ទីរពេទ្យបង្អែក​ខេត្ត​សៀមរាប។



តាមរយៈ​ព្រមព្រៀង​រវាង​JICA និង​មន្ទីរ​សាធារណការ និង​ដឹកជញ្ជូន​ខេត្ត លោក ទៀ សីហា អភិបាល​ខេត្ត​សៀមរាប បាន​អនុញ្ញាត​ឲ្យ​ក្រុមហ៊ុន Omura Ceratec Co.,Ltd ជួប​ពិភាក្សា​ការងារ និង​អនុវត្ត​សាកល្បង​(Pilot Project) ដើម្បី​ធ្វើ​បទ​បង្ហាញ​អំពី​បច្ចេកវិទ្យា​ថ្មី សាងសង់​កម្រាល និង​ចិញ្ចើម​ផ្លូវ​ដោយ​បេតុង​ជ្រាប​ទឹក តាម​បណ្ដោយ​ផ្លូវ ២​ធ្នូ ប្រវែង​៩៣​ម៉ែត្រ ពី​ចំណុចប្រសព្វ Pub Street ដល់​មុខ​ខ្លោងទ្វារ​មន្ទីរពេទ្យ​បង្អែក​ខេត្ត​សៀមរាប​រួមមាន ​កម្រាល​ផ្លូវ ចំណត និង​ចិញ្ចើម​ផ្លូវ ដែល​គម្រោង​នេះ​ចាប់ផ្ដើម​អនុវត្ត​ថ្ងៃ​១២ ខែ​កុម្ភៈ ឆ្នាំ​២០១៩ គ្រោង​បញ្ចប់​ទាំងស្រុង​ក្នុង​ខែ​មិថុនា ឆ្នាំ​២០១៩​។

ជំនួប​ពិភាក្សា​នេះ ក៏មាន​ការចូលរួម​ពី លោក ពិន ប្រាកដ អភិបាលរង​ខេត្ត លោកនាយក​រដ្ឋបាល​ខេត្ត មន្ទីរ អង្គភាព ជំនាញ​ដែល​ពាក់ព័ន្ធ និង​សាលាក្រុង​សៀមរាប​។​
​
គម្រោង​សាកល្បង​នេះ ​មាន​គោលបំណង​រួមចំណែក​ការពារ​ទឹកជំនន់ ដក់​លើ​ផ្លូវ និង​ចិញ្ចើម​ផ្លូវ​ក្នុង​ទីក្រុង ដោយ​ប្រើ​កម្រាល​ដុំ​បេតុង​ជម្រាប​ទឹក (Permeable Interlocking Block Pavement)​ ជា​បច្ចេកវិទ្យា និង​ស្តង់ដារ​ជប៉ុន​៕

 



 

Source: Kampuchea Thmey Daily