ក្រុមឃ្លាំមើលមួយបាននិយាយកាលពីថ្ងៃអង្គារថា ក្រុមរដ្ឋឥស្លាមបានដោះលែងពួកគ្រិស្ដសាសនិកជនជាតិអាហ្ស៊ីរី ចំនួន២២នាក់ក្នុងចំណោមពួកគេមួយចំនួនដែលក្រុមនេះបានចាប់ពង្រត់ពីភូមិនៅប៉ែកឦសានប្រទេសស៊ីរី កាលពីដើមឆ្នាំនេះ។
វាមិនច្បាស់ទេថា តើមានជនជាតិអាហ្ស៊ីរី ប៉ុន្មាននាក់ ដែលនៅតែស្ថិតក្នុងដៃរបស់ពួកសកម្មប្រយុទ្ធឥស្លាមជ្រុលនិយមមួយនេះ ប៉ុន្តែលោក Rami Abdulrahman ដែលជាប្រធានក្រុមអង្កេតការណ៍សិទ្ធិមនុស្សស៊ីរី មានមូលដ្ឋានក្នុងចក្រភពអង់គ្លេស បាននិយាយថា ពួកគេបានបន្តឃុំខ្លួនមនុស្សជាង១៥០នាក់ទៀត។
ក្រុមឥស្លាមជ្រុលនិយមនេះបានចាប់ខ្លួនជនជាតិអាហ្ស៊ីរី ជាង២០០នាក់ នៅខែកុម្ភៈ នៅពេលដែលពួកយុទ្ធជនរបស់ខ្លួនបានរាតត្បាតតាមភូមិជាច្រើនដែលរស់នៅដោយពួកគ្រិស្តសាសនិកនៅជិតទីក្រុង Hasaka ដែលជាទីក្រុងភាគឦសាន ភាគច្រើនរស់នៅដោយជនជាតិឃើដ។
ប្រធានក្រុមជនជាតិអាហ្ស៊ីរី-ស៊ីរី នៅក្នុងប្រទេសស៊ុយអែត លោក Afram Yakoub បានបញ្ជាក់ពីការដោះលែងនេះ ហើយបាននិយាយថា ចំណាប់ខ្មាំងទាំងអស់ដែលត្រូវបានដោះលែងនេះ គឺជាបុរស និងស្ត្រីវ័យចំណាស់។
លោកបានបន្ថែមទៀតថា ពួកសកម្មប្រយុទ្ធបានសម្រេចចិត្តដោះលែងចំណាប់ខ្មាំងទាំងនេះប្រហែលជាដោយសារតែបញ្ហាសុខភាព និងវ័យចំណាស់របស់ពួកគេ៕
Reuters
ពួកគ្រិស្ដសាសនិក២២នាក់ ក្នុងចំណោមចំណាប់ខ្មាំងជាង១៥០នាក់ ត្រូវបានក្រុម ISដោះលែង
0 Comments