គ្រូបង្វឹកបឹងកេត​ រីករាយ​នឹង​កៅអី​កំពូល​តារាង​ឡើងវិញ មុន​ចប់​ជើង​ទី​១​ពានរង្វាន់​លី​គ​កំពូល​កម្ពុជា

ក្រុមបាល់ទាត់​ម្ចាស់​ជើងឯក​៣​សម័យកាល​បឹងកេត បាន​ឡើងឈរ​កំពូល​តារាង​ពានរង្វាន់​លីគ​កំពូល​កម្ពុជា (Metfone Cambodian League 2018) ត្រឹម​សប្ដាហ៍​ទី​១១​ដែល​រៀបចំ​ពី​សំណាក់​គណៈកម្មការ​ប្រកួត​បាល់ទាត់​ជាតិ (CNCC) សេនាធិការ​របស់​សហ​ព័ន្ធ​កីឡាបាល់ទាត់​កម្ពុជា​ពោលគឺ​ក្រោយ​បញ្ចប់​ជើង​ទី​១​កាលពី​ចុង​សប្ដាហ៍​ថ្មីៗ​នេះ ខណៈ​លោក ហៅ សុជាតិ ដែល​ជា​គ្រូបង្វឹក​រីករាយ​ជាមួយ​លទ្ធផល​ដែលជា​ស្នាដៃ​របស់​កូនក្រុម​នៅលើ​ទីលាន​។

​លោក ហៅ សុជាតិ បាន​លើក​ឡើង​ថា «​កីឡាករ​យើង​ធ្វើ​បាន​ល្អ​មែនទែន ហើយ​ទាំងអស់គ្នា​មាន​ឆន្ទៈ​ខ្ពស់​។ យើង​មាន​ចំណុច​ខ្វះខាត​ច្រើន​នៅ​តំបន់​ការពារ តែ​កីឡាករ​យើង​ទាំងអស់​ខិតខំ​អស់ពី​កម្លាំងកាយ​កម្លាំងចិត្ត ជួយ​ប៉ះប៉ូវ​គ្នា​ទៅវិញទៅមក​។ ខ្ញុំ​ពិតជា​សរសើរ​ពួកគេ​ខ្លាំងណាស់ ហើយ​សង្ឃឹមថា​ពួកគេ​នឹង​រក្សា​ស្មារតី​និង​ឆន្ទៈ​បែបនេះ​សម្រាប់​ការប្រកួត​ខាងមុខៗ​ទៀត​»​។



​យ៉ាង​ណា​ក្តី​ពេល​ជើង​ទី​២ នៅ​ចុង​សប្ដាហ៍​នេះ​មកដល់​ក្រុម​បឹងកេត មាន​កីឡាករ​សំខាន់​ជា​ជំនួយ​បន្ថែម​មកជួយ​ក្រុម​នោះ​គឺ ចាន់ វឌ្ឍនាកា ដែល​ក្លិប​ទើបតែ​ប្រកាស​បង្ហាញមុខ​កាលពី​ប៉ុន្មាន​សប្ដាហ៍​មុន​។ តែ​យ៉ាង​ណា​ក្តី​ក្លិប​ត្រូវ​បាត់បង់​អ្នកចាំទី ស៊ូ យ៉ា​ទី សមាជិក​ក្នុង​ក្រុម​ជម្រើសជាតិ​កម្ពុជា ក្រោយពេល​រូបគេ​ចាក​ចេញទៅ​ចូលរួម​ជាមួយ​ក្រុម​ណាហ្គា​វើ​ល នៅ​ដើម​សប្ដាហ៍​នេះ​។

បឹងកេត តាមរយៈ​១១​ប្រកួត​មកនេះ​នៅ​មិនទាន់​ស្គាល់​បរាជ័យ​នៅឡើយ​នោះ​ទេ ពោល​គឺ​ធ្លាប់បាន​យកឈ្នះ​ក្រុម​អាស៊ី​អឺរ៉ុប ៤​ទល់​៣ ហើយ​ឈ្នះ​វេ​ស្ទើ​ន​ភ្នំពេញ ៣​ទល់​១ បន្ត​ឈ្នះ​អគ្គស្នងការដ្ឋាន​នគរ​បាល​ជាតិ ៥​ទល់​១ តែ​ស្មើ​សូល​ទី​ឡូ​អង្គរ ១​ទល់​១ ហើយ​យកឈ្នះ​ក្រសួងការពារជាតិ ២​ទល់​០ ឈ្នះ​ព្រះខ័ន​រាជ​ស្វាយរៀង ៣​ទល់​១ ស្មើ​ជាមួយ​អគ្គីសនី​កម្ពុជា ១​ទល់​១ ឈ្នះ​អង្គ​រថា​យ​ហ្គឺ​រ ៤​ទល់​០ ឈ្នះ​ភ្នំពេញ​ក្រោ​ន ៣​ទល់​២ ស្មើ​វិសាខា ១​ទល់​១ និង​ឈ្នះ​ណាហ្គា​វើល ៣​ទល់​២​។



​ជារួម​ក្រុម​បឹងកេត ប្រកួត​ឈ្នះ​៨​លើក ស្មើគ្នា​៣​លើក និង​មិន​ធ្លាប់​ចាញ់​មាន​២៧​ពិន្ទុ​ក្នុង​ដៃ ទាត់​ចូល​ទី​គេ​ចំនួន​៣០​គ្រាប់ ហើយ​របូត​១៣​គ្រាប់​។ លោក ហៅ សុជាតិ ត្រូវ​ក្លិប​តែងតាំង​ឲ្យ​ឈរឈ្មោះ​ជា​គ្រូបង្វឹក​ស្តីទី​កាលពី​រដូវ​កាល​ឆ្នាំ​២០១៦ កន្លងទៅ​ក្រោយ​ការ​ចាកចេញ​របស់​លោក ប្រាក់ សុវណ្ណារ៉ា ខណៈ​លោក​បាន​ចាប់ដៃ​ជាមួយ​លោក កែវ កុសល ដឹកនាំ​ក្រុម​កាលពី​ដើមរដូវ​កាល​ក៏ដូចជា​ក្នុង​យុទ្ធនា​ការប្រកួត​វគ្គ​ជម្រុះ​ពានរង្វាន់ AFC Cup 2018 ផងដែរ​។

​ក្លិប​បឹងកេត ឡើង​មកលេង​ពានរង្វាន់​លី​គ​កំពូល​កម្ពុជា នៅ​ឆ្នាំ​២០១២ ហើយ​ធ្លាប់​ឈ្នះ​ជើងឯក​ចំនួន​៣​លើក​គឺ​នៅ​ឆ្នាំ​២០១២,២០១៦ និង​២០១៧ ខណៈ​នៅ​ឆ្នាំ​២០១៣ និង​២០១៤ ត្រឹម​ឈរជើង​ឯក​រង​។ នៅ​ឆ្នាំ​២០១៧ ក្រុម​នេះ​ឈ្នះ​ពានរង្វាន់ CNCC Cup 2017 ផងដែរ​។ ចំណែក​ពានរង្វាន់​នៅ​ក្រៅ​ស្រុក​វិញ​ក្រុម​ដែលមាន​ប្រភព​មកពី​ខេត្តកំពង់ចាម មួយ​នេះ​ធ្លាប់​ចេញទៅ​ប្រកួត​វគ្គ​ជម្រុះ​តាម​ពូ​ល​ពានរង្វាន់ AFC President's Cup នៅ​ឆ្នាំ​២០១៣ ធ្លាប់​ឡើងដល់​វគ្គ​ផ្ដាច់ព្រ័ត្រ​ពានរង្វាន់ Toyota Mekong Club Championship 2015 តែ​ចាញ់​ក្រុម Buriram United របស់​ថៃ និង​ប្រកួត​ក្នុង​ពានរង្វាន់​នៅ​ឆ្នាំ​២០១៦ និង​២០១៧ ផងដែរ​។ នៅ​ឆ្នាំ​២០១៨​និង​២០១៨ ក្រុម​នេះ​មានឈ្មោះ​ចេញទៅ​លេង​ពានរង្វាន់​លំដាប់​ទី​២​ប្រចាំ​ទ្វីបអាស៊ី AF Cup ផងដែរ​តែ​ធ្លាក់​ត្រឹម​វគ្គ​ជម្រុះ​តាម​ពូ​ល​ដូចគ្នា​។

​សម្រាប់​ប្រកួត​បន្ទាប់​សប្ដាហ៍​ទី​១២ នៃ​ពានរង្វាន់​លី​គ​កំពូល​កម្ពុជា​ឆ្នាំ​២០១៨ នេះ​ក្រុម​បឹងកេត ត្រូវ​ប៉ះ​ក្រុម​អាស៊ី​អឺរ៉ុប នៅវេលា​ម៉ោង​៦​ល្ងាច​ថ្ងៃ​សៅរ៍ ទី​៣០ ខែមិថុនា ឆ្នាំ​២០១៨ ចុង​សប្តាហ៍​នេះ​លើ​ទីលានពហុកីឡដ្ឋាន​ជាតិ ​ក្នុងរាជធានីភ្នំពេញ៕

 

Source: Kampuchea Thmey Daily