ភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ដ្រីក្រសួងមហាផ្ទៃ បានមានប្រសាសន៍ថា ក្នុងការកំណត់អត្តសញ្ញាណប្រជាជនទាំងអស់នៅកម្ពុជាឲ្យមានប្រសិទ្ធភាពខ្ពស់ពេលនេះ រាជរដ្ឋាភិបាលកម្ពុជាកំពុងយកចិត្តទុកដាក់បង្កើតច្បាប់ថ្មីមួយដើម្បីប្រសិទ្ធភាព គួរឲ្យទុកចិត្តនិងស្របតាមស្តង់ដារអន្តរជាតិ។
សម្តេចក្រឡាហោម បានលើកឡើងបែបនេះនៅក្នុងកិច្ចប្រជុំលើកទី២ របស់គណៈកម្មាធិការជាតិដឹកនាំ តម្រង់ទិសការងារ អត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម ដែលបានធ្វើឡើងនៅទីស្ដីការក្រសួងមហាផ្ទៃនាព្រឹកថ្ងៃទី២៦ មិថុនា ឆ្នាំ២០១៨។
កិច្ចប្រជុំបានពិភាក្សាគ្នា ទទួលបានលទ្ធផលជាច្រើនក្នុងការត្រៀមរៀបចំសេចក្តីព្រាងច្បាប់ស្តីពី អត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម។ នេះបើយោងតាមក្រុមអ្នកសារព័ត៌មានទទួលបានខ្លឹមសារនៃកិច្ចប្រជុំនោះ។
បើយោងតាមសេចក្តីសង្ខេបរបាយការណ៍សម្រាប់រៀបចំច្បាប់នេះ បានបញ្ជាក់ថា ច្បាប់ស្តីពី អត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម ក្រោយពេលបង្កើតរួចហើយដាក់ឲ្យអនុវត្តនោះ នឹងផ្តល់អំណាចស្របច្បាប់ដល់រដ្ឋាភិបាល ក្នុងការអនុវត្តប្រព័ន្ធរួមបញ្ចូលគ្នា នៃប្រព័ន្ធចុះបញ្ជីអត្រានុកូលដ្ឋាន ប្រព័ន្ធគ្រប់គ្រងអត្តសញ្ញាណកម្ម និងស្ថិតិអត្រានុកូលដ្ឋាន ស្របតាមផែនការយុទ្ធសាស្ត្រជាតិ ស្តីពីអត្តសញ្ញាណកម្ម និងផែនការអនុវត្តស្របតាមស្តង់ដារអន្តរជាតិ៕
Source: Kampuchea Thmey Daily
0 Comments